ՀՀ-ում գործող 150 միջմարզային երթուղիներից 3-ը չի սպասարկվում. մեկ փոխադրող էլ դիմել է սակագինը նվազեցնելու առաջարկով

Հայաստանում գործող 150 միջմարզային երթուղիներից այս պահին չի սպասարկվում միայն երեքը: Այս մասին ՀԺ-ին հայտնեց ՀՀ տարածքային կառավարման եւ ենթակառուցվածքների նախարարության ավտոմոբիլային տրանսպորտի քաղաքականության վարչության տեխնիկական բաժնի պետ Արման Կարապետյանը:

Նա հայտնեց, որ ժամանակավորապես իրենց երթեւեկությունը դադարեցրել են Սպիտակ-Գյումրի, Վանաձոր-Բերդ-Նորաշեն եւ Երեւան-Աբովյան փոխադրողները. վերջին ուղղությամբ կա 3 երթուղի, որոնցից միայն մեկը չի սպասարկվելու:

«Այս պահին միայն այդ երեքն են հրաժարվել, բայց ունենք նաեւ դիմումներ չվացուցակով սահմանված երթերը պակասեցնելու խնդրանքով: Երթուղիների համար փորձում ենք ժամանակավոր չվացուցակներ հաստատել: Համավարակի պատճառով նախկինի չափ ուղեւորափոխադրում չկա, եւ ստիպել փոխադրողին նույն քանակի երթեր իրականացնել, անիմաստ է»,- ասաց Կարապետյանը:

Այս պահին դեռ փոփոխված չվացուցակ չկա, բայց կան դիմումներ, որոնք քննարկման ու վերանայման փուլում են: Հայտնի չէ, թե ինչ չափով կնավեզցվի երթերի թիվը, բայց հայտնի է, թե ովքեր են դիմել: Դրանք են՝ Երեւան-Իջեւան, Երեւան-Վանաձոր, Երեւան-Գյումրի երթուղիները սպասարկող փոխադրողները: Արման Կարապետյանը նաեւ հայտնեց, որ վերանայվելու դեպքում էլ ժամանակավոր փոփոխություն է ենթադրում, քանի որ ամռանը՝ ուումնական պրոցեսի դադարից հետո, միշտ էլ ուղեւորի խնդիր եղել է: Այժմ, եթե նույնիսկ փոխվի, ապա ուսումնական պրոցեսը սկսվելուց հետո կրկին նախորդ կարգին կվերադառնան:

Կարապետյանը նաեւ նկատեց՝ չվացուցակ է փոխվել, բայց գնային փոփոխություն տեղի չի ունեցել, բացառությամբ մեկ երթուղու, որտեղ ուղեվարձը ոչ թե թանկացել է ուղեւորի նվազ լինելու պատճառով, այլ էժանացել:

Որքան էլ զարմանալի թվա, բայց ցածր ուղեւորահոսքի այս ընթացքում Սպիտակ-Երեւան երթուղին սպասարկող փոխադրողը դիմել է սակագինը նվազեցնելու խնդրանքով. այն նախկին 1200 ՀՀ դրամի փոխարեն նախատեսվում է դարձնել 1000 դրամ:

Նշենք, որ կորոնավիրուսի համավարակի պատճառով սույն թվականի մարտի վերջից հանրային տրանսպորտը Հայաստանում դադարել էր գործել: Երբ մայիսի 18-ից կրկին վերագործարկվեց հակահամաճարակային պարտադիր պահանջների կատարման պահպանման պայմանով, մի շարք տրանսպորտային միջոցներ, ինչպես Երեւանը սպասարկող, այդ թվում՝ նաեւ միջմարզային, սկսեցին բողոքել նվազ ուղեւորահոսքից: Բնակչության շրջանում արդեն մի քանի բողոքի ցույցեր են տեղի ունեցել: Մարզերի եւ համայնքների բնակիչները պնդում են, որ մնացել են Երեւանից կտրված եւ չեն կարողանում հասնել աշխատանքի:

ՀՀ տարածքային կառավարման եւ ենթակառուցվածքների նախարարությունը մշակել է մարզային տրանսպորտային հանգույցների բարելավման ծրագիր, մրցույթների փաթեթները պատրաստ են, սակայն կորոնավիրուսը խանգարել էր գործընթացին: Օրեր առաջ ՀՀ տարածքային կառավարման եւ ենթակառուցվածքների նախարար Սուրեն Պապիկյանը հայտնել էր, որ տրանսպորտային հանգույցների բարելավման ծրագիրը պատրաստ է: «Մենք առաջիկայում ունենալու ենք մարզային մեկ լոտով մրցույթներ, փաթեթը պատրաստ է, ընթացիկ իրադարձությունները մի փոքր առկախեցին: Այնուամենայնիվ, մինչեւ տարեվերջ մենք կունենանք այդ նախադեպը որեւէ մարզում»,- ասել էր Պապիկյանը:

Lինելու է նաեւ նախադեպ. առավել շատ միավորված համայնքներ ունեցող մարզում փորձարկել նաև երկրորդ մոդելը, այն է՝ պետական աջակցությամբ համայնքներին տրամադրել տրանսպորտային միջոցներ, որոնք կիրականացնեն խոշորացված համայնքի մաս կազմող բնակավայրերից դեպի կենտրոն, դեպի մայրաքաղաք, մարզկենտրոն, տարբեր ուղղություններով փոխադրումներ:

Կարապետյանից հետարքրքվեցինք, թե ծրագիրն ի՞նչ փուլում է: Նշեց, որ այս պահին նախգիծը ներկայացված է ՀՀ կառավարության աշխատակազմ, հավանության արժանանալու դեպքում կսկսեն աշխատանքները: Նոր կարգով մրցույթները կսկսեն այդ ժամանակ:

«Գործող օրենսդրությամբ նախկինում ամեն երթուղի առանձին է մասնակցել մրցույթի, իսկ նոր ծրագրով պլանավորում ենք միասնական լոտերով անել, ամբողջ մարզը միասնական փաթեթով, սկզբունքը հետեւյալն է. համայնքներից երթուղիները կգործեն մարզկենտրոններ, այնտեղից՝ Երեւան, այսինքն՝ գյուղերից Երեւան տրանսպորային կապ այլեւս չի լինի, գյուղերից մարզկենտրոն, այնտեղից էլ մեծ տարողությամբ ավտոբուսներով կուղեւորովեն Երեւան»,- մանրամասնեց նա: