Հուշարձանների պահպանության գործակալության պետին այլ աշխատանք են առաջարկել, չսպասելով պատասխանին՝ ազատել պաշտոնից

ՀՀ կրթության, գիտության, մշակույթի եւ պորտի նախարարության պատմության եւ հուշարձանների պահպանության գործակալության պետ Արմեն Աբրոյանն ազատվել է զաղեցրած պաշտոնից: Այս մասին Աբրոյանը տեղեկացրել է ֆեյսբուքյան իր էջ միջոցով:

«Հայկական ժամանակի» հետ զրույցում գործակալության արդեն նախկին պետը հայտնեց, որ հրամանի մասին իրեն պաշտոնական փաստաթղթաշարժի համակարգով տեղեկացրել է նախարարության կադրերի բաժնի ավագ մասնագետը։ «Սակայն նույն համակարգով որեւէ փաստաթուղթ բացելու իմ հնարավորությունը նույն ժամանակ փակել են, եւ ես չեմ տեսել այդ հրամանը եւ այն ինձ պատշաճ չի ծանուցվել»,- ասաց Աբրոյանը:

Մեր հարցին, թե ի՞նչ հիմնավորմամբ են ազատել զբաղեցրած պաշտոնից, նա պաատսխանեց, որ իրեն ազատելը կապված է եղել Գործակալության վերակազմակերպման հետ. «Բայց խնդիրն այնքան ազատվելս չէ, որքան այն, որ նախարարությունում մասնագետներց ազատվելով (իրենց համար կամակատարների եւ ոչ մասնագետների փոխարինմամբ), ստորաբաժանման կարգավիճակն են թուլացնում:

Աբրոյանի վստահեցմամբ՝ ԿԳՄՍ նախարարությունում ոչ կոմպենտենտ լինելու, բնագավառի օրենսդրության խնդիրները չլուծելու, փաստերը թաքցնելու, որոշ այլ շահեր սպասարկելու (ո՛չ բնագավառի գերակայության) միտում կա։ «Այն, ինչ որ հեղափոխությունից հետո չպետք է շարունակվեր, շարունակվում է: Բնագավառը վտանգում են, որի փաստական օրինակներից են՝ Ֆիրդուսի դեպքը, Արամի 23-ի վերականգնումը չկատարելու նոր ռազմավարությունը, արգելոցում պոմիդոր-բիբար ցանելու «գիտնական-հնագետներին» թողտվության եւ այլն»,-ասաց նա՝ կարծիք հայտնելով, որ առաջիկայում նկատելի կլինեն նաեւ նախարարության մյուս բացթողումներն ու սխալ որոշումները:

Նկատենք, որ Արմեն Աբրոյանը տեւական ժամանակ է՝ բարձրաձայնում է, որ պատմության եւ հուշարձանների պահպանության գործակալությունն է այն մասնագիտական կառույցը, որն իրավունք ուներ Ֆիրդուսի տարածքում պատմական շենքերի քանդման համաձայնություն, եզրակացություն եւ թույլտվություն տալու, սակայն չի տվել, քանի որ նպատակահրամար չի գտել՝ արժեքավոր համարելով ապամոնտաժվող շենքերը:

ԿԳՄՍՆ լրատվական ծառայությունից, պարզաբանելով Աբրոյանի ազատան մասին տեղեկությունը, հայտնեցին, որ նախարարությունում տեղի են ունեցել կառուցվածքային փոփոխություններ. Պատմության եւ մշակույթի հուշարձանների պահպանության գործակալությունը կառավարության որոշմամբ վերակազմակերպվել է Պատմության եւ մշակույթի հուշարձանների պահպանության վարչության։ 

«Գործակալության բոլոր աշխատակիցներին, այդ թվում նախկին պետ Արմեն Աբրոյանին, առաջարկվել են պաշտոններ նոր ստեղծված վարչությունում։ Նրանցից մի քանիսը չեն ցանկացել զբաղեցնել առաջարկվող նոր պաշտոնները, եւ իրենց դիմումի համաձայն, գրանցված են կադրերի ռեզերվում, այդ թվում նաեւ՝ Արմեն Աբրոյանը»,- նշեցին ԿԳՄՍՆ-ից:

Աբրոյանն էլ հայտնեց, որ իրեն առաջարկել են ավագ մասնագետի աշխատանք եւ երբ նա ցանկացել է ծանոթանալ կանոնադրությանը, այն հրապարակված չի եղել: ԿԳՄՍՆ-ից տրամադրել են, սակայն չեն սպասել նրա պատասխանին. տեղեկացրել են, որ ազատված է պաշտոնից:

«Ինձ առաջարկվող աշխատանքի համար չի եղել հրապարակված ո՛չ տվյալ նոր պաշտոնի անձնագիրը, ո՛չ բաժնի եւ ո՛չ էլ վարչության կանոնադրությունները, հնարավոր չէր այդպես պատասխանել, ուստի առաջարկը օրենքի խախտումով եւ ոչ պատշաճ էր։ Այդ երեք օրը չլրացած ու իմ պատասխանը չստացած տեղեկացրեցին ազատմանս մասին»,- ասաց նա՝ վկայակոչելով «Վերակազմակերպումից եւ կառուցվածքային փոփոխությունից հետո անձնակազմի կառավարման ընթացակարգային առանձնահատկությունները  սահմանելու մասին» կառավարության 2019 թվականի մարտի 29-ի N170 որոշումը: Ըստ սույն որոշման 22-րդ կետի՝ քաղաքացիական ծառայողը համապատասխան առաջարկությունն ստանալուց հետո երեք աշխատանքային օրվա ընթացքում տալիս է գրավոր համաձայնություն կամ մերժում է առաջարկությունը:

Կբողոքարկի՞ նախարարի հրամանը դատական կարգով, թե չէ, Աբրոյանը դեռ չի որոշել:

ՀԳ. Աբրոյանը երեկ նաեւ հայնտել էր, որ Ֆիրդուսի թաղամասում պատմամշակութային արժեք ունեցող 2 շենքերի ապօրինի քանդման աշխատանքների համար ոստիկանություն է դիմել: «Նախարարի տեղակալ Նարինե Խաչատուրյանի (Թուխիկյանի) անգործության արդյունքում ստիպված եմ եղել ինքս օրենքով պահանջվող գործառույթն իրականացնել: Ֆիրդուսի (33-րդ) թաղամասում պատմամշակութային արժեք ունեցող 2 օբյեկտների (որոնք վերցված են պետական հաշվառման) ապօրինի քանդման աշխատանքների համար դիմել եմ ՀՀ ոստիկանությանը: Հուսով եմ՝ պահանջվող ընթացքը չեն լղոզի»,- ավելի վաղ գրել էր նա: