Գյումրիում լուծարվեց վերջին գիշերօթիկը. հստակեցվում է առանց ծնողական խնամքի մնացած երեխաների հետագա ճակատագիրը

Գյումրու «Ֆրիտյոֆ Նանսենի անվան երեխաների խնամքի և պաշտպանության թիվ 2 գիշերօթիկ հաստատություն»-ը կառավարության որոշմամբ լուծարվեց երեկ՝ հունիսի 25-ին:

Մինչ այս, հաշվի առնելով երկրում հայտարարված արտակարգ դրությունը, հաստատությունն անցել էր փակ ռեժիմի: Նույն ժամանակահատվածում էլ հաստատության շահառու հանդիսացող 83 երեխաներից  52-ը, որոնք ունեն ծնողներ, վերադարձել են ընտանիք: Գիշերօթիկում էին մնացել 31-ը:

Ծնողները եկել, տարել են: Պետությունն էլ այդ ծնողներին մենակ չի թողել: Այս մասին ՀԺ-ի հետ զրույցում ասաց ՀՀ աշխատանքի եւ սոցիալական հարցերի նախարարության հավասար հնարավորությունների ապահովման վարչության երեխաների հիմնահարցերի բաժնի պետ Անահիտ Քալանթարյանը: Յուրաքանչյուր երեխայի հաշվով պետությունն այդ ընտանքիներին հատկացրել և շարունակում է տրամադրել բնաիրային փաթեթ: Այն աջակցությունը, որը երեխան ստանալու էր հաստատությունում, հիմա նույնը ստանում է տանը:

«2 շաբաթվա կտրվածքով յուրաքանչյուր երեխայի տրամադրվում  է սննդային փաթեթ: Մոտ 24 կգ փաթեթների մասին է խոսքը: Ընտանիքներին տրամադրված պարենն ու սնունդը եղել են բազմազան: Այն չափաբաժինը, որը նախատեսված է եղել, որ երեխան ստանա հաստատությունում,  այդ բազմազանությունն այս անգամ նա ստացել է իր ընտանիքում: Աջակցությունը տրամադրելիս հաշվի է առնվել, որ յուրաքանչյուր հաջորդ անգամ նույն պարենը չլինի, այսինքն, օրինակ, եթե նախորդ անգամ այնքան բրինձ է տրամադրվել, որ երկու շաբաթում հնարավոր չէր այն սպառել, հաջորդ անգամ դրա փոխարեն այլ պարեն է տրվել»,- ասաց Քալանթարյանը:

Աջակցության այս ծրագրից օգտվում են Նանսենից ընտանիք վերադարձած բոլոր երեխաների ընտանիքները: Մինչ այսօր ընտանիք վերադարձած 52  երեխաներն ընդգրկված են այդ ծրագրում, որի  շրջանակում ևս ամսական կտրվածքով նրանց ընտանքիները ստանում են սննդային փաթեթ և էլեկտրաէներգիայի վարձի փոխհատուցում:

Ֆրիտյոֆ Նանսենի անվան երեխաների խնամքի և պաշտպանության թիվ 2 գիշերօթիկ հաստատությունում էին մնացել միայն հունվարին լուծարված Գյումրու «Թռչունյան տան» սաները:  Բոլորն ունեն նույն կարգավիճակը՝ առանց ծնողական խնամքի մնացած (ԱԾԽՄ): Այս մասին ՀԺ-ի հետ զրույցում տեղեկացրեց հաստատության տնօրեն Անահիտ Կարապետյանը:

Նախարարությունից, սակայն, վստահեցնում են, որևէ երեխա փողոցում չի հայտնվի, անտանիք, անընտանիք ու առանց խնամքի չի մնա:

«Ցավալի իրավիճակ է, որովհետև այնտեղ առանց ծնողական խնամքի մնացած երեխաներ են և այստեղ էին խնամք ստանում: Այդ երեխաների համար ուսումնասիրության շրջանակում խնամատարությունն ենք դիտարկում, քանի որ որևէ մեկը չկա, որ նրանց խնամքով զբաղվի:

Նախնական դիտարկում կա, որ մեկ երեխա, տղա, կգնա մանկատուն, հավանաբար Գավառի մանկատուն, բայց սա դեռ վերջնական չէ, մենք դիտարկում ենք խնամատարությունը:

1 երեխան, որ աղջիկ է, և մարզիչը Գյումրիում է, միանշանակ, նա մնալու է Գյումրիում, դա նրա լավագույն շահն է: 2-ի դեպքում բանակի խնդիր կա, գնալու են: Բոլորի խնդիրն էլ կարգավորելու ենք, մեր հիմնական ձգտումն այն է, որ երեխաներն ապրեն խնամակալ և խնամատար ընտանիքներում»,-ասաց Անահիտ Քալանթարյանը:

«Նանսենից» ընտանիք վերադարձած 52 երեխաների մասով ոչինչ չի նախատեսվում անել: Նրանք չեն դիտարկվում ճգնաժամային իրավիճակում հայտնվածներ, քանի որ ծնողները պաշտոնապես տեղեկացրել են, որ իրենց երեխաներին իրենք կպահեն: Մասնագետները զրույցների, նաև վերջին ամիսների ուսումնասիրությամբ համոզվել են, որ այդ ընտանիքների երեխաները  հաստատությունում են հայտնվել զուտ նյութական խնդիրներով պայմամնավորված: Միայն երկու դեպքում է, որ բնակարանային խնդիր է առկա:

Թե ինչ է լինելու լուծարված հաստատության աշխատակիցների հետ, հստակ չէ: Գյումրիում այլևս չկան նման հաստատություններ, որտեղ մասնագետները կկարողանային նոր աշխատանք գտնել: 

Այս պահին աշխատանքներ են տարվում աջակցության կենտրոնի հիմնման ուղղությամբ: Հավանաբար մինչև տարեվերջ այն կազմավորված կլինի: Կադրերի ընտրության հարցում նախարարությունը կառաջնորդվի լուծարված հաստատությունների մասնագետներին ուշադրության կենտրոնում պահելու քաղաքականությամբ:

Առաջնահերթությունը կտրվի նրանց, բայց ընտրությունը կլինի մրցութային կարգով: Նաև հաշվի է առնվելու մասնագիտական պահանջներին բավարարելը:

«Նանսենի» լուծարմամբ այս պահին արդեն գործազուրկ է 73 աշխատակից:

75 աշխատակից էլ  ուներ 2019 թվականի օգոստոսին լուծարված Գյումրու երեխաների խնամքի և պաշտպանության թիվ 1 գիշերօթիկ հաստատությունը:

Եվս 49-ն առանց աշխատանքի էին մնացել 2019 թվականի հունվարի 10-ից՝  Գյումրու «Թռչունյան տուն» երեխաների խնամքի գիշերօթիկ հաստատություն-կրթարանի փակվելու պատճառով: