Դատախազներն առարկեցին Գագիկ Հարությունյանին, Հովիկ Աբրահամյանին եւ մյուսներին այս փուլում դատակոչելու միջնորդությանը

Ռոբերտ Քոչարյանի եւ մյուսների գործով այսօրվա դատական նիստին մեղադրող եւ տուժող կողմերը առարկեցին պաշտպանական կողմի՝ դատակոչի ցուցակը լրացնելու վերաբերյալ միջնորդությունների դեմ։

Հիշեցնենք՝ նման միջնորդությամբ պաշտպանները հանդես են եկել նախորդ դատական նիստին՝ դատարանին խնդրելով դատարան հրավիրել եւ հարցաքննել ՍԴ նախկին նախագահ Գագիկ Հարությունյանին, դատավորներ Հրանտ Նազարյանին, Վլադիմիր Հովհաննիսյանին, Ֆելիքս Թոխյանին և Կիմ Բալայանին, ԱԺ նախկին նախագահ Հովիկ Աբրահամյանին և նախկին պատգամավորներ Դավիթ Հարությունյանին, Արմեն Ռուստամյանին, Ավետ Ադոնցին, Արծրունի Աղաջանյանին եւ եւս մի քանի հոգու։

Մեղադրող դատախազ Պետրոս Պետրոսյանը, ներկայացնելով առարկությունը, ասաց, որ միջնորդություն ներկայացնելով՝ պաշտպանները չեն պարզաբանել, թե ինչպիսի կոնկրետ հանգամանքների բացահայտման համար է այն անհրաժեշտ, ավելին, քրեական գործի այս՝ նախապատրաստական փուլում, դատարանը, դեռ որեւէ ապացույց հետազոտված չլինելով, չի կարող գործի փաստական հանգամանքների բացահայտման ուղղությամբ որեւէ կանխակալ դրսեւորում կիրառել եւ որոշել՝ կա՞ն արդյոք գործով այնպիսի տվյալներ, որոնք լրացուցիչ բացահայտման անհրաժեշտություն են պահանջում․ «Հետեւաբար միջնորդությունը, որ ներկայացվում է, այս փուլում բավարարվել չի կարող, եւ մենք գտնում ենք, որ դատարանը դրանք պետք է թողնի առանց քննության ոչ ժամանակին հարուցված լինելու հիմքով»,- ասաց նա:

Մեղադրող դատախազ Գեւորգ Բաղդասարյանը միացավ Պետրոսյանի դիրքորոշմանը՝ միաժամանակ ասելով․ «Դատավարական առումով սույն դատարանում դեռեւս պատկերացում չենք կազմել, թե հանգամանքները, որոնք հաստատելու կամ հերքելու համար պաշտպանության կողմը ցանկանում է, որ այդ անձինք հրավիրվեն դատարան, ինչ արժեք ունեն մեղադրանքի համար, ինչ ծավալով պիտի հաստատվեն կամ արդյոք գործում առկա ապացույցները բավարար չեն այդ հանգամանքների առկայությունը կամ բացակայությունը փաստելու համար»:

Բաղդասարյանը նշեց, որ Հայկ Ալումյանի միջնորդությունը ենթակա է հետաձգման, իսկ Կարեն Մեժլումյանինը՝ մերժման․ «Մեժլումյանի միջնորդությունը ենթակա է մերժման, քանի որ դրանով փորձ է արվում հարցաքննել անձանց՝ նրանցից ակնկալելով իրավամեկնաբանության հարցեր, նման ընթացակարգ չի կարող լինել»,- ասաց նա:

Նշենք, որ Մեժլումյանը միջնորդել էր դատակոչել, մասնավորապես, Հովիկ Աբրահամյանին և նախկին պատգամավորներին՝ պարզելու՝ ԱԺ-ի օրենսդրական փոփոխություններն ի վերջո կապված էին վիճարկվող 300.1-րդ հոդվածի իրավական որոշակիության հետ թե ոչ։

Տուժողների ներկայացուցիչ Սեդա Սաֆարյանը, միանալով դատախազներին, կարծիք հայտնեց, որ նախորդ նիստում պաշտպանները չեն նշել, թե ինչ առնչություն ունեն վկաները, որոնց կապակցությամբ ներկայացվեցին միջնորդություններ.  «Ընդ որում, հետաքրքիր է, թե Հայկ Ալումյանն ինչպե՞ս է նայում Միքայել Հարությունյանի՝ որպես վկայի հարցաքննվելու անհրաժեշտությանը, եթե անձը այս գործով հանդիսանում է մեղադրյալ, եւ նույն գործի շրջանակում գտնվում է հետախուզման մեջ, նույնը վերաբերում է նաեւ Գեւորգ Կոստանյանին, Վահագն Հարությունյանին եւ մյուս հետախուզվողներին, որոնք, ըստ էության, սույն գործով մեղադրական եզրակացության փաստական հանգամանքների հետ կապված հենց չորս մեղադրյալներին վերագրված արարքների վերաբերյալ ոչինչ չեն կարող ասել, որոնք էական կլինեն սույն գործի համար»:

Անդրադառնալով Կարեն մեժլումյանի միջնորդությանը՝ Սեդա Սաֆարյանն ասաց, որ շփոթել են սույն գործի մեղադրանքի շրջանակը գործի շուրջ առաջացած տեսական վեճերի հետ, որովհետեւ 300․1-րդ հոդվածի ստեղծման կամ փոփոխության ենթարկվելու հանգամանքները չեն կարող վկաների ցուցմունքներով հաստատվել կամ հերքվել, առավել եւս, որ այդ ամենը կապ չունի քրեական գործի փաստական հանգամանքների հետ, որ տեղ են գտել մեղադրական եզրակացության մեջ. «Ես կարծում եմ, որ Կարեն Մեժլումյանի միջնորդությունը անհիմն է, իսկ Հայկ Ալումյանի միջնորդությունը՝ ժամանակավրեպ»,- ասաց նա:

Այս պահին պաշտպանական կողմը ներկայացնում է իր առարկությունները: