Կանխատեսվում է, որ աշխարհազորային կդառնա 100 հազար անձ, կանայք եւս կարող են կցագրվել. որքա՞ն աշխատավարձ է նախատեսվում

Պաշտպանության նախարարությունը կանխատեսում է, որ մինչեւ 100 հազար կամավոր կհավաքագրվի աշխարհազորային ստորաբաժանման մեջ:

Լրագրողների հետ զրույցում այսօր այս մասին ասաց պաշտպանության փոխնախարար Գաբրիել Բալայանը: Մանրամասնելով աշխարհազորայինների իրավունքներից ու պարտականություններից բխող գործառույթները՝ Բալայանն ասաց, որ խաղաղ պայմաններում եւ վարժանքների ժամանակ աշխարհազորայինները չեն վարձատրվելու, իսկ այն պահից սկսած, երբ, ըստ անհրաժեշտության, կներգրավվեն որոշակի մարտական առաջադրանքի իրականացման մեջ (լինի դա մարտական հերթապահություն, մարտական գործողությունների մասնակցություն, թե տարհանման կազմակերպում), ոչ միայն կվարձատրվեն, այլեւ կստանան զինծառայողի կարկագավիճակ:

Սա ենթադրում է, որ նրանք եւ նրանց ընտանիքի անդամները կօգտվեն համապատասխան սոցիալական երաշխիքներից:

Վարձատրությունը լինելու է այնքան, որքան պայմանագրային զինծառայողների դեպքում է: «Պետական պաշտոններ զբաղեցնող անձանց մասին» օրենքով եւ Կառավարության 2014 թվականի 712-Ն որոշմամբ սահմանվում է այդ վարձատրությունը հաշվարկելու կարգը: Ներկայումս շարքային պայմանագրային զինծառայողները, որոնք մարտական հերթապահություն են իրականացնում, ըստ Բալայանի, ստանում են միջինը 155 հազար դրամ: Սպայական պաշտոնի ծառայողի աշխատավարձը համեմատաբար ավելի բարձր է:

Փոխնախարարը պարզաբանեց նաեւ տարբեր համայնքներում գործող  աշխարհազորայինների ղեկավարումը իրականացնելու կարգը:

Ըստ աշխարհազոր ստեղծելու մասին ՊՆ մշակած նախագիծի՝ գումարտակի կամ բրիգադի հրամանատարը լինելու է համայնքի ղեկավարի տեղակալը կամ մարզպետի տեղակալը:

«Մենք նախատեսում ենք, որ մեր պաշտոնաթող փորձառու սպաները կհամալրեն այդ պաշտոնները. մենք ունենք գեներալական կազմ, գնդապետներ, փոխգնդապետներ, որոնք զորամասի եւ ավելի բարձր օղակների հրամանատարներ են եղել, եւ կարծում ենք, որ օրենքի ընդունումից հետո այդ համալրումը տեղի կունենա: Նրանք նաեւ տեղացի են, ինչը կարեւոր է. հրամանատարների մեծ մասը հարգանք է վայելում այդ ազգաբնակչության շրջանակում, նրանց լիդերության հատկանիշները փորձելու ենք օգտագործել եւ պաշտոնաթող փորձառու սպաներին նշանակել այդ պաշտոններում»,- մանրամասնեց Բալայանը:

Լրագրողներից մեկը փորձեց ճշտել՝ սա նշանակո՞ւմ է, որ համայնքի ղեկավարի տեղակալի կամ մարզպետի տեղակալի նոր հաստիքներ կբացվեն նախկին զինվորականների համար: Ի պատասխան՝ փոխնախարարն ասաց, որ այն համայքներում, որտեղ թափուր հաստիքներ կան, այդ հաստիքները կհամալրվեն նման անձանցով, իսկ այնտեղ, որտեղ որ ազատ հաստիք չկա, հնարավոր է՝ նոր հաստիք ավելանա:

Խոսելով աշխարհազորայինների տարիքի մասին եւ պատասխանելով հարցին, թե 65-70 տարեկան անձինք ի՞նչ կարող են անել՝ Բալայանն ասաց. «Հավատացե՛ք՝ ե՛ւ ֆիզիկական պատրաստությամբ, ե՛ւ գաղափարական առումով որեւիցե բանով չեն զիջում մեր 18 տարեկան երիտասարդներին: Այն կոնտինգենտը, որի վրա հաշվարկը արվում է, նրանք իրենք են մեզ դիմել, որ նման խմբավորումներ կազմավորենք»:

Փոխնախարարը, սակայն, վստահեցրեց, որ նրանց որեւէ խնդիր տալուց առաջ պետք է հասկանալ՝ առողջական վիճակով պայմանավորված՝ կարողանալո՞ւ են կատարել: Դնում ենք, առողջական վիճակով պայմանավորված՝ նա կարողանալո՞ւ է կատարել, թե՞ ոչ: Դա հասկանալու համար իրականացվելու է նաեւ անձնակազմի բժշկական զննություն:

Բացի այդ, ըստ նրա՝ ոչ բոլորն են կատարելու մարտական խնդիրներ: Կան էլի լուրջ խնդիրներ, որոնք անհրաժեշտ կլինի կազմակերպել, օրինակ՝ տարհանում, քաղպաշտպանություն եւ այլն:

Հարց հնչեց նաեւ այն մասին, թե արդյոք նախագծում գենդերային տարբերակում դրվո՞ւմ է, այսինքն՝ կանայք կարո՞ղ են ներգրավվել աշխարհազորային ստորաբաժանման մեջ:

Բալայանն ասաց, որ որեւիցե խտրականություն չի դրվում, կանայք եւս կարող են ներգրավվել: Սկզբնական փուլում, իհարկե, ըստ նրա, կանայք չեն ստանա մարտական առաջադրանք:

Աշխարհազոր ստեղծելու մասին օրենքի նախագծը, ինչպես մեր հարցին ի պատասխան տեղեկացրեց փոխնախարար Բալայանը, հավանաբար ԱԺ կհասնի մինչեւ տարեվերջ: ԱԺ-ում ընդունվելուց հետո այն հրապարակման հաջորդ օրվանից ուժի մեջ կմտնի: