Ուսումնական տարին սկսվեց, երթուղայինների թիվը չավելացավ. Երեւանի քաղաքապետարանը նախապատրաստական աշխատանքներ է անում

Երկարատեւ դադարից հետո՝ սեպտեմբերի 14-ին, հայաստանյան դպրոցներում դասերը վերսկսվեցին, իսկ մայրաքաղաքում տարիներ շարունակ բարձրաձայնված ու մինչեւ օրս լուծում չգտած հանրային տրանսպորտի խնդիրը էլ ավելի սրվեց: Լեփ-լեցուն տրանսպորտային միջոցից օգտվելը չթույլատրվող ու վտանգավոր է առողջության համար, իսկ տաքսի գտնելը առավոտյան ժամերին դարձել է խիստ դժվար, գներն էլ աճել են թռիչքաձեւ:

Արտակարգ դրության ընթացքում հասարակական տրանսպորտի գործունեությունը կասեցնելուց եւ մայիսի 18-ին վերագործարկելուց հետո մինչեւ օրս ուղեւորափոխադրումը թույլատրվում է իրականացնել սահմանափակ քանակով: Ու թեեւ չկա բավարար տրանսպորտային միջոց, բայց կա պարետատան հստակ պահանջ՝ նստատեղերի քանակից ավելի ուղեւոր չտեղափոխել: Չենթարկվելը ենթադրում է տուգանք:

Քանի դեռ չէր սկսվել ուսումնական պրոցեսը, եւ արտակարգ դրության պայմաններում որոշ աշխատանքներ հեռավար էին կազմակերպվում, թվում էր, թե ուղեւորափոխադրման հարցը փոքր-ինչ հաղթահարելի է: Իսկ այսօր ուղեւորների թիվը նորից կտրուկ աճել է, ու նրանց առջեւ ծառացել է երկարամյա խնդիրն է՛լ ավելի բարդացած: 

Տարիներ շարունակ չարչրկված այս թեմայի մասին խոսելուց հոգնել են բոլորը: Մինչեւ համավարակն էլ մարդիկ երթեւեկում էին գերծանրաբեռնված տրանսպորտով, խցկվում այնքան՝ մինչեւ ավտոբուս բարձրացող վերջին ուղեւորի ոտքը դռան տակ մնա: Իսկ այսօր մարդիկ դժգոհում են անհայտ ժամանակացույցով աշխատող տրանսպորտից: Երեւանաբնակ մի կին նշեց, որ, օրինակ, 3 եւ 35 համարի ավտոբուսներն առնվազն 20 րոպե պարբերականությամբ են աշխատում, կանգառ են հասնում արդեն գերբեռնված. հնարավոր չի լինում առավոտյան հասնել աշխատանքի: Նույնատիպ պատկեր է նաեւ բազմաթիվ այլ երթուղիներում: Տաքսի ծառայություններից օգտվելը եւս բարդ խնդիր է դարձել, որովհետեւ նախ՝ մինիմալ արժեքն է բարձրացել, հետո՝ առավոտյան ժամերին համարյա անհնար է ազատ տաքսի գտնելը: «Առավոտյան GG-ին մինիմալը 1200 դրամ էր, իսկ «Յանդեքս»-ը՝ 900, ու առաջիկա տասը րոպեների համար տարածքում մեքենա ցույց չէր տալիս»,- բողոքեց մեկ այլ քաղաքացի: Նշենք, որ այս ծառայությունների նվազագույն ուղեվարձը համապատասխանաբար լինում է 600 եւ 300 դրամ: Մեկ ուրիշն էլ նշեց՝ «Յանդեքս»-ով երկու կմ է գնացել, 1100 դրամ գումար է կազմել:

Երեւանի քաղաքապետարանի լրատվության եւ հասարակայնության հետ կապերի բաժնից «Հայկական ժամանակ»-ին հայտնեցին, որ նոր ուսումնական տարվա սկսվելու հետ կապված մայրաքաղաքի հանրային տրանսպորտի աշխատանքը բարելավելու նպատակով տարվել են նախապատրաստական աշխատանքներ: Մասնավորապես աշխատանքներ են տարվում քաղաքապետարանի տրանսպորտային ընկերությունների պահուստային շարժակազմերով երթուղիները համալրելու եւ դրանց շահագործումը կազմակերպելու ուղղությամբ: 

Միեւնույն ժամանակ վստահեցնում են՝ աշխատանքներ են տարվում Երեւանի ներհամայնքային ավտոբուսային եւ միկրոավտոբուսային երթուղիները սպասարկող մասնավոր կազմակերպությունների հետ՝ երթուղիներում շարժակազմերի թվաքանակները հնարավորինս ավելացվելու եւ ուղեւորների սպասարկման վիճակը բարելավելու համար։

Երեւանի քաղաքապետարանից նաեւ խնդրեցինք նշել, թե մայրաքաղաքն այս պահին ավտոբուսային եւ միկրոավտոբուսային ընդհանուր քանի երթուղի ունի: Դրանցից քանիսն են պատկանում Երեւանի քաղաքապետարանին եւ որ համարներն են: «Ներկայումս մայրաքաղաքում փաստացի սպասարկվում են 39 ավտոբուսային, 59 միկրոավտոբուսային եւ 5 տրոլեյբուսային երթուղիներ»,- ընդհանրացված պատասխանել են քաղաքապետարանից։

Նաեւ հայտնում են, որ ավտոբուսային 19 երթուղի սպասարկում է «Երեւանի ավտոբուս» ՓԲԸ-ն, իսկ տրոլեբուսային երթուղիները՝ «Երեւանի էլեկտրատրանսպորտ» ՓԲԸ-ն: Մնացած ավտոբուսային երթուղիները եւ բոլոր միկրոավտոբուսային երթուղիները սպասարկում են մասնավոր կազմակերպությունները:

Հետաքրքրվել էինք նաեւ, թե քաղաքապետարանն առաջիկայում քանի ավտոբուսով եւ կամ միկրոավտոբուսով է տրանսպորտային ցանցը համալրելու: Խնդրել էինք հստակ ժամկետներ նշել: «Մրցույթ է հայտարարվելու 100 մեծ դասի (12 մետր երկարությամբ) ավտոբուսների ձեռքբերման համար։ Դրա արդյունքներից հետո միայն հնարավոր կլինի նշել երթուղային ցանցի համալրման վերջնական ժամանակացույցը»,- նշել են պատասխանում:

Նաեւ հավելել են, որ օրեր առաջ կայացած մրցույթի արդյունքներով հաղթող ճանաչված կազմակերպությունը մայրաքաղաք կներկրի 100 փոքր դասի ավտոբուս, որոնցով կհամալրվի երթուղային ցանցը։ Թե երբ, ժամկետներ չեն հայտնել:

Ի դեպ, սրանք այն 100 փոքր ավտոբուսներն են, որոնք օրեր առաջ տարատեսակ խոսակցությունների առիթ էին դարձել: Այս թեմային ասուլիսով անդրադարձել էր Երեւանի ավագանու «Լույս խմբակցության» ղեկավար Դավիթ Խաժակյանը՝ հայտարարելով. «Մեզ երկու տարի խոստացան ավտոբուսներ, բայց բերում են գազելներ»:

Նա նաեւ նշել էր, որ Երեւանի տրանսպորտային նոր ցանցի նախագծով գազելներ նախատեսված չէին: «Նոր ցանցում այդ մեքենաները տեղ չունեն, եթե, իհարկե, ցանցը չվերաձեւվի, չվերահաշվարկվի, ինչը ենթադրում է լրացուցիչ եւ նոր ծախս, իսկ ակնհայտ է, որ դրանք մեր շրջանում ավելի հայտնի միկրոավտոբուսներն են եւ բնականաբար, այն չեն, ինչ խոստացել էր քաղաքային իշխանությունը»,- ասել էր Խաժակյանը:

Ավելի ուշ Երեւանի քաղաքապետի խոսնակ Հակոբ Կարապետյանն անդրադարձել էր թեմային, տեղադրել լուսանկարն ու կից գրել. «Լուսանկարում՝ պայմանական մինի ավտոբուս: Մոտավորապես սրա նման 100 ավտոբուս է պատվիրվել»:

Հիշեցնենք՝ 100 նոր «Գազելների» ձեռքբերման համար Երեւանի քաղաքապետարանի մրցույթին մասնակցել էին երկու կազմակերպություն՝ «Ռեգնում» եւ «Մուլտի Մոթորս» ՍՊԸ-ները։ Հաղթել է «Մուլտի Մոթորս» ՍՊԸ-ն: