Հայերի երկիրը գիտելիքի երկիր է, մեղրի ու վարդերի երկիր. Ֆրանսահայ հայտնի անձանց խոսքն ու կոչն աշխարհին

#ArtsakhisArmenia, #StopAzerbaijaniaggression, #StopAliyev, #StopErdoghan, #Հաղթելուենք եւ այլն:

Սրանք սոցիալական ցանցերում տարածված հեշթեգերն են, որոնք հայ եւ արտասահմանցի հայտնի ու ոչ հայտնի մարդիկ տարածում են՝ կոչ անելով Ադրբեջանին ու Թուրքիային դադարեցնել ագրեսիան: Նրանք տարածում են Արցախում տեղի ունեցած ավերածությունների, տուժած քաղաքացիների լուսանկարները նաեւ գրում հայերի կամքի, ուժի եւ համախմբվածության մասին:

Ստորեւ ֆրանսահայ հայտնի անձանց գրառումներից ու հայտարարություններից մի քանիսը:

«Դուք հպարտ կլինեիք, որ հայ եք, ինձ պես»

Ֆրանսիան այսօր դատապարտում է Ռուսաստանին՝ ընդդիմադիր գործչին թունավորելու կամ Ուկրաինա ներխուժելու համար, բայց թույլ է տալիս Թուրքիային եւ Ադրբեջանին դա անել, որոնք սպանում են հարյուրավոր հայերի:

Այս կարծքիքին է ֆրանսահայ նշանավոր կինոռեժիսոր Անրի Վերնոյի որդին՝ Պատրիկ Մալաքյանը: Նա ֆեյսբուքյան իր էջում ծավալուն գրառում է կատարել՝ հույս հայտնելով, որ ընթերցողը ծանրաբեռնված գրաֆիկ չունի, քանի որ չի կարող կարճ գրել:

«Այսօր, իմ Ֆրանսիա, դու թքեցիր մեր դեմքին, եւ ես ամաչում եմ, որ ֆրանսիացի եմ»,- գրել է Մալաքյանն ու Ֆրանսիայի, ԱՄՆ եւ Ռուսաստանի նախագահներին մեղադրել ստեղծված իրավիճակում քայլ չձեռնարկելու համար:

Նա հայտնել է, որ մյուս նախագահական ընտրություններում Մակրոնին չի ընտրելու։ Ինչ վերաբերում է Թուրքիայի ու Ադրբեջանի նախագահներին, խորհուրդ է տվել երբեք չմոռանալ «Նեմեսիս» գործողությունը. «Երբ մարդ ոչինչ չունի կորցնելու, միշտ ավելի ուժեղ է, ավելի հնարամիտ եւ արդյունավետ»:

Վերջում Մալաքյանը խոսել է Հայաստանի մասին, որտեղ առաջին անգամ եղել է 1991 թ.-ին, հետո տասնյակ անգամներ այցելել ու տեսել երկրի զարգացումը: Մալաքյանը խոսքը հորն է ուղղել՝ Վերնոյին.

«Դուք հպարտ կլինեիք, որ հայ եք։ Ինձ պես։ Այո՛, ես ունեմ երկքաղաքացիություն, հայր: Գիտեի, որ դա քեզ երջանիկ կդարձնի: Սա մի երկիր է, որտեղ արվեստը եւ մշակույթը աջակցում, պաշտպանում, հարգում են: Սա մի երկիր է, որտեղ այսօր երեխաները զոհվում են կռվի դաշտում»,- գրել է Մալաքյանը՝ հավելելով, որ այստեղ երեխաները կռվում են՝ պաշտպանելու իրենց, ընտանիքի անդամների կյանքը եւ հայրենիքը, որը խորապես սիրում են:

Նշենք, որ հոկտեմբերի 15-ին Անրի Վերնոյի ծննդյան օրն էր:

«Հայերի երկիրը գիտելիքի երկիր է, մեղրի ու վարդերի երկիր»

«Ադրբեջանը՝ Թուրքիայի բանակի օգնությամբ, հարձակում է սկսել Արցախի եւ Հայաստանի վրա: Եվրոպան եւ այլ երկրներ զինադադարի կոչ են անում, այնինչ պարոն Էրդողանը բարձր հայտարարում է, որ իր փոքր եղբոր՝ ադրբեջանցու կողքին է: Կհասնի օգնության ցանկացած պահի եւ բոլոր միջոցներով: Ինչո՞ւ, նույն լեզվով խոսողների սիրուց դրդվա՞ծ, այո, բայց ոչ միայն, նաեւ՝ ցեղասպանողի ռեֆլեքսով: Նրա ռասիստական հռետորաբանությունը՝ «Turkye über alles» (Թուրքիան՝ ամենից առաջ), խորապես արմատացած է թուրքական քաղաքական դասի մեջ»:

Սրանք արդեն ֆրանսահայ հանրահայտ դերասան, ռեժիսոր Սիմոն Աբգարյանի խոսքերն են` հրապարակված ֆրանսիական հայտնի պարբերականներից մեկում՝ Figaro-ում:

Աբգարյանի խոսքով՝ Թուրքիայի պատմությունը լի է հանցանքներով, իսկ այժմյան նախագահ Էրդողանն անտեսում է բանականությունը, նա միայն ուժն է հասկանում:

«Մենք՝ հայերս, կռվում ենք մեր երեխաների ապագայի համար, մեր նահատակների հիշատակի համար, ովքեր հրաժարվում են մեռնել երկրորդ անգամ»,- նշել է Աբգարյանը՝ շեշտելով՝ ուր էլ լինենք՝ Հայաստանում կամ Սփյուռքում, մեր ամբողջ ուժով, ամբողջ զենքով կաջակցենք Արցախին:

Դերասանն ընգծել է՝ որքան հնագույն է Հայաստանը, իսկ Ադրբեջանի դեպքում՝ հակառակը, նույնիսկ Կոկա- Կոլան ավելի երկար պատմություն ունի, քան Ադրբեջանը:

«Վերցրե՛ք ձեր դիերը ու հեռացե՛ք: Հայերի երկիրը գիտելիքի երկիր է, մեղրի ու վարդերի երկիր: Դուք չգիտեք՝ ինչ անել դրա հետ»,- նշել է նա: