Նոր նախագիծ՝ կրթության ոլորտում. սփյուռքահայ մասնագետն իր ծրագիրն է բերել

«իԳործ» ծրագրով Լիբանանից Հայաստան ժամանած Օնիկ Բայրամյանը կրթական համակարգը բարեփոխելու իր նախագիծն է իրականացնելու շուրջ 250 դպրոցներում: «Դպրոցի կառավարում» թեմայով նախագիծը նախատեսված է իրականացնել 2020 թվականի դեկտեմբերի 14-ից մինչև 2021 թ. սեպտեմբերի 2-ը:

Oնիկ Բայրամյանը սփուռքահայ հարյուր բարձրակարգ այն մասնագետներից է, որ «իԳործ» ծրագրով աշխատելու են ՀՀ ԿԳՄՍ նախարարությունում: Նա Լիբանանում, ԱՄՆ-ում եւ Արաբական Միացյալ Էմիրություններում միջազգային մանկավարժի 32 տարվա  փորձ ունի, աշխատանքային գործունեության ընթացքում հիմնել եւ ղեկավարել է մի քանի  դպրոց: Անցկացրել է 700-ից ավելի կրթական սեմինար, վերապատրաստել է ավելի քան 1000 ուսուցիչների, մի շարք երկրներում (Ֆինլանդիա, Չինաստան, ԱՄՆ, Արաբական Միացյալ Էմիրություններ, Ֆրանսիա, Անգլիա, Իտալիա, Նիդեռլանդներ, Գերմանիա, Եգիպտոս, Լիբանան, Թունիս և Իսպանիա) կազմակերպված գիտաժողովներում հանդես է եկել կրթական զեկուցումներով: Օնիկ Բայրամյանը հեղինակ է ավելի քան 12 ուսումնական գրքերի, 3 տասնյակ կրթական հրատարակությունների, նախագծել է միջազգային ուսումնական պլաններ:

Օնիկ Բայրամյանը մեծ պատիվ է համարում հայրենիքում կրթական ոլորտի բարեփոխումների՝ իրեն վստահված հնարավորությունը եւ համոզված է, որ կրթությունն է մեր ազգի ապագայի կարեւոր երաշխիքը. «Իմ առաջարկած կրթական ծրագիրն ու մոտեցումը հիմնված են միջազգային կրթության ոլորտում իմ  փորձի վրա: Անձամբ ես եմ մշակել ծրագիրը, եւ այն արդեն իրականացվում է աշխարհի շատ դպրոցներում: Հենց այս փորձի հիման վրա ես կազմեցի ծրագրի հստակ ճանապարհային քարտեզը, ներկայացրի ՀՀ ԿԳՄՍ նախարարությանը, որը հավանության արժանացավ: Նախագծի աշխատանքերում ընդգրկված են ոչ միայն դպրոցի տնօրեններ, այլեւ փոխտնօրեններ եւ ուսուցիչներ: Մասնակցային դպրոցների թիվն ավելին է, քան մենք ակնկալում էինք, ինչը շատ դրական նշան է, որը կրկին ապացուցում է, որ մեր դպրոցների ուսուցիչներն ու ղեկավարությունը միշտ ցանկանում են ձեռք բերել կրթական և մանկավարժական նորագույն ռազմավարություններ՝ հանուն որակյալ կրթության: Այս ծրագրի կարեւոր խնդիրն է նոր փոփոխություններով կատարելագործել դպրոցի կառավարման բոլոր օղակների աշխատանքները, ցուցաբերել մեթոդական եւ մասնագիտական օգնություն Հայաստանի և Արցախի  մեր գործընկերներին»,- նշում է Օնիկ Բայրամյանը:

Նրա խոսքով՝ ծրագիրը նպաստելու  է դպրոցի ղեկավար եւ ուսուցչական կազմի հմտությունների զարգացմանը: Առաջարկվում են կրթական նոր մոդելներ՝ վերափոխված ուսումնական պլաններ եւ ծրագրեր, որոնք չեն լինի իրականությունից կտրված եւ կնպաստեն 21-րդ դարի աշակերտին որպես առաջնորդ պատրաստելուն:

«21-րդ դարի աշակերտը պետք է ունենանա քննադատական, ազատ մտածողություն, կարողանա խնդիրների լուծման նորարարական մոտեցումներ գտնել, լինի ինքնավստահ ու մրցունակ բոլոր մարտահրավերներում: Նախագծի նորամուծություններից է նաեւ ուսուցման ընթացքում մշակութային արժեքների ինտեգրումը առարկայական բոլոր  դասերի ընթացքում: Յուրաքանչյուր դաս պետք է ներառի հետեւյալ 6 թեմաները՝  հայոց լեզու եւ գրականություն, հայ մշակույթ, հայ եկեղեցի և քրիստոնեություն, հայոց պատմություն, քաղաքացիություն և համայնք»:

Այն հարցին, թե մեր կրթական ոլորտը զարգանալու ինչ հնարավորություններ ունի, Օնիկ Բայրամյանն արձանագրեց. «Մեր կրթական համակարգը մեծ առավելություններ ունի. հայ ուսուցչի նվիրվածությունը եզակի է, նա միշտ պատրաստ է անընդհատ սովորելու, պարզապես պետք է նրան տրվի անընդհատ կատարելագործվելու հնարավորություն, որպեսզի նա հաջողությամբ կարողանա իրագործել կրթության իր առաքելությունը: Եվ ես համոզված եմ, որ այդ բոլոր փոփոխություններով մեր կրթական համակարգը հնարավոր կլինի զարգացնել այնքան, որ մեր երկիրը դառնա աշխարհի լավագույն կրթական երկրներից մեկը»:

Օնիկ Բայրամյանի դիտարկմամբ՝ որակյալ կրթական համակարգ ունենալու համար պետք են մի շարք պայմաններ, որոնցից են  դպրոցների մարդկային եւ նյութական ռեսուրսներով ապահովվածությունը, ուսուցչի  բարձր աշխատավարձը, ճկուն և բազմաշերտ ուսումնական ծրագիրը, որը յուրաքանչյուր երկու տարին մեկ պետք է վերանայվի: Դպրոցի կառավարումն ու ուսուցման որակը ստուգելու համար պետք է գործի ստուգման համակարգ, որը պետք է իրականացվի կրթության նախարարության կողմից վստահելի մասնագետների կողմից:

«Այսօր խիստ անհրաժեշտություն կա հասկանալու, թե ինչպես պետք է կառավարել եւ գնահատել մեր ուսուցիչներին`հիմնվելով մասնագիտական չափանիշների վրա, ինչպես հեշտացնել ուսուցումը դասարաններում՝ համոզվելու համար, որ բոլոր աշակերտներին բավարարում են կրթական պայմանները: Կրթությունը պետք է լինի այն ռազմավարական հենասյունը, որն առաջնորդում է բոլոր մյուս ոլորտները: Ես համոզված եմ, որ այս նախագիծը հնարավորություն կտա բարեփոխելու կրթական ենթակառուցվածքները, նպաստելու Հայաստանում եւ Արցախում կրթության մակարդակի բարձրացմանը, որն այսօր շատ որոշիչ է մեր մեծ հայ ազգի համար»,- եզրափակեց պարոն Բայրամյանը:

Մարիամ Գեւորգյան