Մեր բոլոր 263 հիվանդները թթվածնի կարիք ունեն. «Նորք» ինֆեկցիոնի ղեկավարը՝ երրորդ ալիքի առանձնահատկությունների մասին

Նոր կորոնավիրուսային հիվանդությունը մեզ հետ է արդեն ավելի քան մեկ տարի, սակայն ինչպես այլ երկրներում, այնպես էլ Հայաստանում հիվանդությամբ պայմանավորված իրավիճակը դեռևս մնում է անփոփոխ: Շատ երկրներ հիմա փորձում են հաղթահարել վիրուսի 3-րդ ալիքը, մեր երկիրը, ինչպես օրերս  կառավարության ֆեյսբուքյան էջում հրապարակված տեսանյութում հայտնեց առողջապահության նախարարության Հիվանդությունների վերահսկման և կանխարգելման ազգային կենտրոնի տնօրենի տեղակալ Գայանե Սահակյանը, գտնվում է երրորդ ալիքի պիկին:

Առողջապահության նախարարությունը  վերապրոֆիլավորել է ավելի քան 20 քովիդ մասնագիտացված հիվանդանոցներ: Համավարակի սկզբից գործող հիվանդանոցներում էլ իրավիճակը շարունակում է մնալ լարված:

«Նորք» ինֆեկցիոն հիվանդանոցն, օրինակ, 8 բաժանմունքին պատրաստվում է ավելացնել ևս երկուսը, բացի դա հիվանդանոցը կարիք ունի բուժանձնակազմը համալրելու ՝ հաստատությանն անհրաժեշտ են բուժքույրեր և մայրապետեր: Այս պահին բուժում է ստանում 263 հիվանդ, զբաղված են նաև վերակենդանացման 14 մահճակալները:

«Առավոտվա տվյալների համաձայն հիմա այդքան հիվանդ ունենք, ծայրահեղ ծանր վիճակում գտնվում է 40 հիվանդ, ևս 40-ը կարող եմ ասել՝ ճիշտ կլինի բուժում ստանան վերակենանացման բաժանմունքում: Դրա համար անհրաժեշտություն եղավ ավելացնել ևս 34 մահճակալ, ընդհանուր մեր մահճակալների թիվը 282-ն է, այսինքն, որպես այդպիսին մենք բաժանմունք չենք ավելացնում, այլ ռեանիմացիոն սրահին ավելացնում ենք ևս մեկ սրահ՝ 20 մահճակալով, մյուս սրահը ավելացնում ենք մեր մեծահասկաների բաժանմունքի համար՝ 14 մահճակալով: Երրորդ ալիքի առնձնահատկություններից է այն, որ բոլոր հիվանդների արյան մեջ թթվածնի պակաս է լինում: 263 հիվանդներն էլ թթվածնի կարիք ունեն»,- մեզ հետ զրույցում ասաց «Նորք ինֆեկցիոն հիվանդանոց» ՓԲԸ տնօրենի պաշտոնակատար Հովհաննես Մադոյանը, հավելելով՝ չի բացառվում, որ հիվանդների թիվը ավելանա, քանի որ ընդունարանում ընդունելությունը մեր խոսակցության պահին շարունակվում էր:

Հիվանդանոցը երկու անգամ փորձ է արել վերադառնալ նախկին աշխատանքին ռեժիմին, սակայն 2020 թվականի սեպտեմբերին սկսած երկրորդ ալիքը և 2021 թվականի փետրվարին զարգացող երրորդ ալիքը ստիպել են չփակել քովիդ բաժանմունքները: Հիմա հիվանդանոց են դիմում միջին և բարձր տարիքային խմբի մարդիկ, հոսպիտալացվում են նաև 20-ից 34 տարեկան անձինք: Բազմաթիվ են հատկապես այն դեպքերը, երբ հիվանդները դիմում են տան պայմաններում ինքնաբուժության անհաջող փորձերից և հակաբիոտիկների չարաշահումից հետո:

«Մեզ մոտ ընդունված է, որ ճարպակալումը խնդիր չէ, բայց հիվանդներից շատերը նման խնդիր ևս ունեն, այսինքն ճարպակալման երրորդ աստիճանը արդեն իսկ լուրջ խնդիր է: Լինում է նույնիսկ, որ ուղեկցող հիվանդությունների մասին մարդիկ տեղեկանում են, երբ վարակվում են և ընդունվում մեզ մոտ: Օրինակ՝ հիվանդ կա 170 ճնշում ունի, դա իր համար նորմալ է, բայց դա ինսուլտի շատ բարձր ռիսկ է: Նման հիվանդություններ ունեցող մարդկանց մոտ է հիմնականում վիրուսի ընթացքը այլ ելք ունենում: Մենք մարտ ամսվա ընթացքում ունեցանք երիտասարդ տարիքի՝ 34 տարեկան հիվանդի մահվան դեպք, քանի որ ուներ ուղեկցող հիվանդություն: Մարդիկ շատ հաճախ նաև, առանց հաշվի առնելու, թե իրենց ծանոթի մոտ հիվանդությունը ինչպես է ընթացել, սկսում են նույն բուժումը ընդունել, լինում են դեպքեր,երբ տարբեր բժիշկների հսկողության տակ եղած անձինք էլ անիմաստ կերպով մեծ քանակությամբ հակաբիոտիկ են ընդունում ու ծանրացած առողջական վիճակում հայտնվում են մեզ մոտ»,- ասաց Մադոյանը:

Կորոնավիրուսով վարակված հիվանդներ դիմելության աճին զուգընթաց աճել է նաև վիրուսով վարակված այն հիվանդերի թիվը, ովքեր հոգեբանության աջակցության կարիք ունեն: Մարտ ամսվա ընթացքում այդ աջակցությունից օգտվել է 65 հիվանդ. «Եթե փետրվարին ընդամենը երեք անձ էր օգտվել այդ աջակցությունից, հիմա մարդկանց քանակը ավելի շատ է՝ նրանց մոտ վախը, դեպրեսիան հիվանդալուց հետո ավելանում է: Իրենք վախից ավելի շատ դեղորայք են պահանջում, օրինակ՝ հիվանդ կա, որ հակաբիոտիկի անհրաժեշտություն չունի, բայց ուզում է նշանակենք, ներերակային ներարկում անհրաժեշտ չէ, բայց նա դա պահանջում է, վախից իրեն թվում է՝ ուր որ է կմահանա»,- մանրամասնեց նա:

«Նորք ինֆեկցիոն հիվանդանոց» ՓԲԸ տնօրենի պաշտոնակատար Հովհաննես Մադոյանը շեշտում է՝ մարդիկ  պետք է պահպանեն հակահամաճարակային կաոնները, պետք է հասկանան՝ բժիշկները գերծանրաբեռնված վիճակում են աշխատում: «Աշխատակիցները գալիս են արձակուրդ են խնդրում, բայց ի վիճակի չենք արձակուրդ տրամադրել: Նոր սրահների ավելացման դեպքում էլ վերակենդանացման բաժանմունքին առնվազն երկու պոստ է պետք, որ բուժքույրերը, մայրապետերը հերթապահեն: Նույն էլ մեծահասակների սրահի ավելացման դեպքում է անհրաժեշտ՝ 10-ից ավելի բուժքույր ու մայրապետ է պետք: Մեկ տարուց ավելի՝ համաճարակի սկզբից, մեր բժիշկները աշխատում են գերծանրաբեռնված, օրինակ՝ բաժնի վարիչները, ավագ քույրերը, ղեկավար կազմը շաբաթ, կիրակի չունեն: Ամեն օր աշխատանքի են, խախտվել է նրանց նորմալ աշխատանքային ժամը»,- հավելեց նա:

Մադոյանը նշեց նաև՝ բուժաշխատողների շրջանում նույնպես գրանցվում են հիվանդությամբ վարակվածության դեպքեր: Կան նաև վիրուսի դեմ պատվաստված բուժաշխատողներ: Հիվանդանոցի 25 աշխատակից պատվաստվել է ռուսական «Sputnik V» պատվաստանյութով: Պատվաստվել են նաև մեկ տարի առաջ ինֆեկցիոնին միացված ՁԻԱՀ-ի կանխարգելման հանրապետական կենտրոնի 19 աշխատակից:

Մերի Խաչատրյան