«Դու անցար կարմիր գիծը». Մարուքյանի առաջարկը նախկիններին՝ Քոչարյանից սկսած, եւ Սուրեն Պապիկյանի «կոշտ» պատասխանը

«Լուսավոր Հայաստան» խմբակցության ղեկավար Էդմոն Մարուքյանի այսօրվա ելույթը ԱԺ ամբիոնից ստիպեց, որպեսզի տարածքային կառավարման եւ ենթակառուցվածքների նախարար, «Քաղաքացիական պայմանագիր» կուսակցության վարչության նախագահ Սուրեն Պապիկյանը ելույթով հանդես գա եւ «իրերը կոչի իրենց անուններով»:

«Վարչապետը խորհրդարանում իր ելույթով արհամարհել է պատգամավորներին»,- Կառավարության 2020 թվականի գործունեության կատարողականի քննարկմանն այս մասին հայտարարեց Մարուքյանը՝ նկատելով, որ թե՛ Կառավարության անդամների, թե՛ իշխող ուժի պատգամավորների ելույթներն այն մասին էին, որ նախկինները 30 տարի թալանել են երկիրը:

«Էդ 30 տարվա մեջ երեք տարի դուք եք իշխանություն, նշանակում է՝ 30 տարվա տասը տոկոսը դուք եք: Գայիք, ասեիք՝ 10 տոկսով մարդկանց կյանքը լավացել է էս-էս ոլորտներում, ոչ թե երկրի բնակչությունը 10%-ով կրճատել եք, տնտեսությունը, բանակը, դիվանագիտությունը կործանել եք, եկել, ասում եք՝ նրանք են մեղավոր: Նրանք, որ մեղավոր չլինեին, դուք ի՞նչ գործ ունեիք էստեղ: Նրանք մեղավոր էին, դրա համար եղել է հեղափոխություն, բա դո՞ւք, բա ձեր 10%-ը»,- նկատեց Մարուքյանը:

Խոսելով Լելե-Թեփե բարձունքի վերաբերյալ Նիկոլ Փաշինյանի հայտարարության մասին՝ ԼՀԿ ղեկավարն ասաց նաեւ, որ, իր կարծիքով, Փաշինյանը պարզապես փորձում է խուսափել պատասխանատվութունից. «Ասում ենք՝ Լելե Թեփեի օպերացիան ո՞նց է եղել, ասում է՝ ես հրաման չեմ տվել վարչապետը, ես մի քանի գեներալներ եմ կանչել, մոդերացիա եմ արել, հարցրել եմ՝ դու ի՞նչ կարծիքի ես, դու ի՞նչ կարծիքի ես, բայց հետո պարզ է, չէ՞, որ ինչ-որ մեկը, այսինքն՝ գլխավոր հրամանատարը՝ վարչապետը, ասում է՝ լավ, արեք օպերացիան: Բա կարծիքները հարցնելուց հետո ո՞վ արավ օպերացիան, ասում է՝ ես մոդերատոր եմ: Այ տենց մոդերատոր եք եղել եւ միջազգային հարաբերություններում եք մոդերատոր»,- նկատեց Մարուքյանը:

Խոսելով քաղաքական ճգնաժամից դուրս գալու մասին՝ «Լուսավոր Հայաստան» խմբակցության ղեկավարը առաջարկով դիմեց նախկին իշխանություններին. «Ես պաշտոնական առաջարկ եմ անում Ռոբերտ Քոչարյանից սկսած՝ մինչեւ մյուս բոլոր նախկին իշխանության ներկայացուցիչներին. մի կողմ քաշվեք, եւ մենք այս մարդկանց կդարձնենք մի հատ փոքր, քիփլիկ ընդդիմադիր խմբակցություն՝ իրենց ղեկավար Նիկոլ Փաշինյանով: Մի կողմ քաշվեք, մի կողմ չքաշվեցիք, ձեր դեմ քարոզարշավով գնալու են վերարտադրման ճանապարհով»,- ընդգծեց նա:

Ըստ Մարուքյանի՝ 2018-ի հեղափոխությունը նրա համար էր, որ մարդիկ լավ ապրեին, բայց լավ են ապրում միայն իշխանություն ստացածները. «Դուք դավաճանել եք հեղափոխությանը, դուք սկսել եք լավ ապրել, ու այդ օրվանից սաղ կործանվել է, այդ օրվանից ամեն ինչ վարի է գնացել: Մի հատ նայեք՝ Սուրեն Պապիկյանին ինչ մեքենա է սպասարկում»,- ասաց նա:

«Պարոն Մարուքյանն ասում է՝ նայեք, թե ինչ մեքենա է սպասարկում պարոն Պապիկյանին: Այստեղ, ի դեպ, բանալի բառը սպասարկել բառն է: Այո՛, տարածքային կառավարման նախարարին սպասարկում է ծառայողական մեքենա, Սուրեն Պապիկյանին չէ, այն ինստիտուտին, որը պետք է լինի այդ դերում: Պարոն Մարուքյան, ինձ մոտ հարց է առաջանում՝ ձեր խմբակցության ղեկավարը սամակատո՞վ է գնում Վանաձոր, գալիս: Սրա մասին կարող է խոսել մի մարդ, ով հրաժարվել է ծառայողական մեքենայից, ով հրաժարվել է իրեն օրենքով հասնող բնակարանի վարձատրությունից»,- հայտարարեց նախարարը:

Պապիկյանը պահանջեց բարեկիրթ արտահայտվել այն քաղաքական ուժի ղեկավարի հասցեին, ում «շվաքի ներքո սահուն եկել, բազմել է»:

«Ինչի, եթե չենք խոսացել, չգիտե՞նք՝ 2018-ին ոնց եք էդ քվեները հավաքել, որ՝ ժողովուրդ, դե մենք իրար հետ ենք, դե մեզ տվեք, որ շատ լինի: Չի լինելու էս անգամ, ու դու անցար էն կարմիր գիծը, որ պիտի չանցնեիր: Ի դեպ, կոչերը՝ ուղղված նախկիններին, ու փորձը՝ մաքրագործել նախկիններին... այսինքն՝ ի՞նչ եք առաջարկում, չխոսե՞նք Հոկտեմբերի 27-ի մասին, չխոսե՞նք Մարտի 1-ի մասին, չխոսե՞նք 30 տարի Հայաստանը թալանելու մասին»,- ասաց Պապիկյանը:

Նախարարի խոսքով՝ քաղաքացին կտա իր գնահատականը թե՛ Կառավարությանը, թե՛ բոլոր ուժերին, իսկ այն ուժերը, որոնք ստանձնել են նախկիններին մաքրագործելու պարտականությունը, կգտնեն իրենց տեղը պատմության համապատասխան վայրում: