«Եթե ուզում եք իրար հետ տենց գոռալով, եկեք հենց հիմա դուրս գանք». ԱԺ-ում երեխաներից ներողություն խնդրեցին (տեսանյութ)

ԱԺ այսօրվա նիստը փոքր-ինչ լարված մթնոլորտում է ընթանում, ժամանակ առ ժամանակ լեզվակռիվներ են տեղի ունենում: 

Նախագծերից մեկի քննարկման ժամանակ բանը հասավ նրան, որ խորհրդարանում հյուրի կարգավիճակով ներկա դպրոցականներից պատգամավորները ներողություն խնդրեցին:

«Բարեւ ձեզ, երեխաներ, ներողություն եմ խնդրում ինչին ականատես եղաք րոպեներ առաջ»,- մոտենալով ամբիոնին՝ այս մասին ասաց «Իմ քայլը» խմբակցության պատգամավոր Սիսակ Գաբրիելյանը՝ նկատի ունենալով որեւէ խմբակցությունում չընդգրկված Գեւորգ Պետրոսյանի ելույթը:

Քրեական օրենսգրքում փոփոխությունների նախագծի քննարկմանը, որը վերաբերում է բարձրաստիճան պաշտոնյայի կողմից սուտ տեղեկություններ տարածելու դեպքում պատիժ սահմանելուն, Գեւորգ Պետրոսյանը հայտարարեց. «Այսօր բարձրաստիճան պաշտոնյաներ, ամոթը գրպանած, հելնում են, ժողովրդին սխալ տեղեկատվություն են մատուցում: Հիմա քրեական օրենսգրքում այսպիսի պատժատեսակ նախատեսելը նպատակ ունի կանխել նման ստախոսների գործունեությունը: Ես հիմա անուն պետք է տամ, բայց դա չընկալեք որպես անձի վրա կարվող նախագիծ: Խոսքը ՊՆ-ի խոսնակ, թե լիազորված անձ Արծրուն Հովհաննիսյանի մասին է, ով 43 օր խաբեց, ասաց՝ հաղթում ենք, հաղթելու ենք, հետո հանկարծ վերջին օրով պարզվեց, որ պարտվում ենք: Նման անձինք պետք է պատժվեն»,-ասաց նա:

Պետրոսյանը այնուհետեւ իր նախագիծը հիմնավորելու համար խոսեց անառակաբարո գործողությունների սահմանման, պաշտոնատար անձ սահմանման մասին.

«Կամ ասում են՝ պաշտոնատար անձը հայտնի չի, պարզ չի, թե ինչ է նշանակում իրավասու պետական պաշտոնյա: Արա, կարո՞ղ ա ճաշարանի վարիչը նման տեղեկատվություն հայտնի»,- հայտարարեց Գեւորգ Պետրոսյանը:

Տեղից «Իմ քայլը» խմբակցության պատգամավոր Բաբկեն Թունյանը նկատեց, որ դահլիճում հյուրի կարգավիճակով երեխաներ կան, որոնք լսում են ելույթը, ինչին Գեւորգ Պետրոսյանն արձագանքեց. «Թող լսեն, սա հենց երեխեքին է պետք, պարոն Թունյան»:

Ապա հետ նայելով նախագահության կողմը՝ ասաց. «Ինչ-որ ֆսսոց եկավ վերեւից: Ես գիտեմ, որ դեմ եք քվեարկելու: Այդպես էլ այս ԱԺ-ն չհաղթահարեց Կառավարության կցորդը լինելու եւ մնալու պիտակը: Իսկ դիմակի տակ քմծիծաղ տվողները մի քանի օրից էդ քմծիծաղը թող փորձեն տալ»:

Այնուհետեւ ամբիոնին մոտեցավ Սիսակ Գաբրիելյանը եւ փորձեց բացատրել, թե ինչու է այս նախագծի ընդունումը ոչ նպատակահարմար: «Այստեղ կա եւս մեկ խնդիր: Մենք բոլորս պետական գաղտնիքի կրող ենք. եթե, օրինակ, լրագրողը մոտենում եւ պետական գաղտնիքի վերաբերյալ հարց է հնչեցնում: Այլ բան պատասխանես՝ այս հոդվածով կգնաս, ճիշտը պատասխանես՝ մեկ այլ հոդվածով կգնաս»,- նկատեց նա:

Տեղից Գեւորգ Պետրոսյանը ինչ-որ բան բղավեց, ինչին Սիսակ Գաբրիելյանն արձագանքեց. «Եթե ուզում եք իրար հետ տենց գոռալով, եկեք հենց հիմա դուրս գանք, ձեզնից ավելի բարձր գոռամ: Ձեր տանը չեք, եւ սա ձեր հայաթը չի»:

ԱԺ նախագահ Արարատ Միրզոյանն էլ հավելեց. «Պարոն Պետրոսյան, ինչո՞ւ եք խանգարում: Մի երկխոսեք, դուք հնարավորություն ունեիք 3 րոպե խոսելու: Տեղից խանգարելու, միջամտելու հնարավորություն չկա, էթիկապես էլ ճիշտ չի: Դուք խոսում էիք, բոլորին գուցե հաճելի չէր, անգամ տհաճ էր, բայց լսում էին»:

Սիսակ Գաբրիելյանը շարունակեց, որ քրեական օրենսգրքի 178-րդ հոդվածով պատիժ է նախատեսված տեղեկություն թաքցնելու կամ աղավաղելու համար: Երբ Գեւորգ Պետրոսյանը տեղից էլի ինչ-որ բան ասաց, «Իմ քայլի» պատգամավորը նշեց. «Պարոն Պետրոսյան, կարո՞ղ է մի 5 վայրկյան ուշ է տեղ հասնում: Ես ասում եմ՝ աղավաղել կամ թաքցնել: Այնպես որ առաջարկում եմ դեմ քվեարկել, որովհետեւ քրեական օրենսգիրքն այդ մասով փակված է, իմ կարծիքով»: