Չկա որեւէ ՀԿ, որի գերին է «Իմ քայլը» դաշինքը. գործընկերության ոգին դուք ինքներդ խախտեցիք. Դանիելյանը՝ Գորգիսյանին

Ազգային ժողովում այս պահին քննարկվում է «Ընտրական օրենսգրքի փոփոխությունների» փաթեթը, որն իրենից ենթադրում է կուսակցությունների համար ընտրական շեմի իջեցում, դաշինքների համար ընտրական շեմի բարձրացում, բոնուսային համակարգից հրաժարում, հետընտրական կոալիցիաների կազմում եւ այլ կարեւոր փոփոխություններ:

Նիստի սկզբում նախագիծը համակարգած իմքայալական պատգամավոր Համազասպ Դանիելյանը պարզաբանեց, թե ինչու է որոշվել հարցը քննարկել հենց այսօր եւ 24-ժամյա ռեժիմով: Հիշեցրեց, որ երկուշաբթի նախատեսված է ԱԺ հատուկ նիստ՝ վարչապետի ընտրության հարցով: Սա նշանակում է, որ եթե ԱԺ-ն վաղն էլ վարչապետ չընտրի, խորհրդարանը արձակվելու է՝ չհասցնելով ընդունել քննարկվող փոփոխությունները:

Իսկ «Իմ քայլը» խմբակցությունը հանձնառություն է վերցրել բարեփոխել «Ընտրական օրենսգիրքը»: Խմբակցության անունից ելույթում այս մասին հայտարարեց «Իմ քայլը» խմբակցության ղեկավար Լիլիթ Մակունցը:

««Ընտրական օրենսգրքի» փոփոխությունների վերջին փուլն ենք քննարկում, ուզում եմ հիշեցնել, որ «Ընտրական օրենսգրքի փոփոխությունները» մենք բաժանել էինք երեք մասի, եւ այսօր վերջին փաթեթն ենք քննարկում:

Վենետիկի հանձնաժողովը տվել է դրական եզրակացություն, եւ հաշվի առնելով, որ ԸՕ փոփոխությունը եղել է մեր քաղաքական թիմի հանձնառությունը, մենք անպայման նպատակ ունեինք ընդունելու՝ մինչեւ ԱԺ արձակումը»,- ասաց նա:

«Լուսավոր Հայաստան» խմբակցության անդամ Գեւորգ Գորգիսյանը, որը սկզբնական փուլում ներգրավված էր փոփոխությունների մշակման աշխատանքներին, սակայն հետո հրաժարվեց դրանից, հետաքրքրվեց, թե նախագծի վերջնական տարբերակը ո՞ւմ հետ են քննարկել, արդյոք այն քննարկվել է փակ դռների ետեւո՞ւմ:

«Փակ դռների հետեւում, այն է՝ աշխատանքային կարգով քննարկել ենք անեւ ձեզ հետ, դա աշխատանքային կարգ է, որեւէ վատ բան չկա: Ասում եք փետրվարին եղած նախագիծը փոփոխվել է. փոփոխվել է եւ դուք որեւէ առաջարկ չեք արել: Գործընկերության ոգին դուք ինքներդ խախտեցիք այն պահից, երբ հրապարակային հայտարարեցիք, թե իբրեւ ԸՕ փոփփոխությունենրը իշխանությունը իրականացնում են, որովհետեւ գրանտներ է կերել եւ գրանտներ պետք է արդարացնի: Դրա համար, երբ որ խոսում եք գործընկերությունից, ես կարծում եմ արժե հավատարիմ մնալ որոշակի նվազագույն խաղի կանոնների»,- արձագանքեց Համազասպ Դանիելյանը:

Գորգիսյանը նշեց, որ չգիտի, թե ինչու է «Իմ քայլն» իր այդ խոսքերը վերագրել իրեն, որովհետեւ իր խոսքն ուղղված է եղել մի ՀԿ-ի, որի ամեն գրառումից հետո իշխող խմբակցությունը նախաձեռնություն է բերում: «Ցավում եմ, որ մի ամբողջ խմբակցություն գերի է դարձել սույն ՀԿ-ին կամ անձին»,- հավելեց ԼՀԿ-ական պատգամավորը:

Նա նաեւ կարծիք հայտնեց, որ քանի որ օրենքի տեսանկյունից կանխատեսելիություն է պետք, ուստի շտապ այս փոփոխությունները ընդունելով ստեղծվելու է խառնաշփոթ:

Համազասպ Դանիելյանն ասաց, որ գրանտների մասին Գորգիսյանի հայտարարությունը վերաբերել է օրենսգրքի փոփոխություն նախաձեռնող մարմնին՝ խորհրդարանին եւ պատգամավորներին:

«Ինձ ծանոթ չէ որեւէ ՀԿ, որը կարողանա օրենսդրություն ընդունել, էնպես որ եկեք հիմա մի փորձեք նահանջել ձեր խոսքից, հրապարակավ արտահայտված: Երկրորդ, չկա որեւէ ՀԿ կամ այլ կառույց, որն ունի ազդեցություն, եւ «Իմ քայլը» դաշինքը դրա գերին է: Խնդրում եմ այդտեղ էլ քիչ պատասխանատու հայտարարություն անել կամ գոնե փորձել դա հիմնավորել»,- ասաց նա:

Անդրադառնալով նախագծի կանխատեսելիությանը՝ Դանիելյանը նշեց, որ սա այն նախագիծն է, որը վաղուց ընդունված կլիներ, եթե գնային նորմալ ընթացակարգերով: Բայց քանի որ անցյալ ժամանակահատվածում, ըստ պատգամավորի՝ դիմադրություն է եղել քաղաքական կամ գոնե դե յուրե ոչ քաղաքական ակտորների կողմից, ստեղծվել է իրավիճակ, որ «Իմ քայլը» ստիպված է այս նախագիծը ընդունել՝ հավատարիմ մնալով իր հանձնառություններին, որովհետեւ հանձնառությունները կարեւոր են»: