7 ամիս է՝ Շիրակի պետական համալսարանը հոգաբարձուների խորհուրդ չունի, որ Կառավարության որոշմանը դեմ կամ կողմ լինեին

Շիրակի պետական համալսարանը դատական կամ մեկ այլ հարթակում կվիճարկի՞ կամ կքննարկի՞ Կառավարության մայիսի 4-ի որոշումը, որով փոփոխվում է հիմնադրամի կարգավիճակ ունեցող բուհերի հոգաբարձուների խորհրդի ձեւավորման կարգը:

Հիշեցնենք, որ, այդ որոշման համաձայն, հոգաբարձուների խորհրդի կազմի անդամների նվազում է նախատեսված՝ 32-ից կամ 24-ից կդառնա 20: Նոր կարգով բուհի հոգաբարձուների խորհրդի 20 հոգանոց կազմում Կառավարության կողմից կապահովվի 11 անդամ (55%), ԿԳՄՍ նախարարության կողմից՝ 2 անդամ (10%), հաստատության պրոֆեսորադասախոսական կազմից՝ 2 անդամ (10%), ուսանողական համակազմը կներկայացնի 5 անդամ (25%)։

«Հայկական ժամանակի» հետ զրուցում Շիրակի պետական համալսարանի ռեկտորի պարտականությունները կատարող Երվանդ Սերոբյանն ասաց՝ իրենք որևէ քայլ չեն ձեռնարկի, կսպասեն ՄԻՊ-ի գործողություններին:

«Քանի որ Սահմանադրական դատարան է դիմում ՄԻՊ-ը, մենք կսպասենք ՍԴ-ի որոշմանը: Եթե մենք գործում ենք օրենքի դաշտում և ուզում ենք լինել օրինապահ քաղաքացիներ, ուրեմն պետք է անենք այնպես, ինչպես օրենքն է պահանջում: Եթե ՍԴ-ն որոշում կայացնի (մեր ամենաբարձր դատարանն է, որի նկատմամբ բոլորս պարտավոր ենք հարգանք դրսևորել), կենթարկվենք էդ օրենքին: Իսկ ես Կառավարության որոշումը մեկնաբանել չեմ կարող, քանի որ ես չեմ ընդունել դա»,- ասաց Սերոբյանը:

Թեկուզ նեղ շրջանակում քննարկման համար համալսարանը քայլեր չի ձեռնարկել: Սերոբյանն ասաց՝ իրենք անգամ հոգաբարձուների խորհուրդ չունեն: 2020 թվականի նոյեմբերին է լուծարվել խորհուրդը: Պատճառը գիտի, պատճառի հիմքը՝ ոչ: Ասաց՝ անդամների թիվը նվազել էր, Հիմնադրամների մասին օրենքով ՇՊՀ-ի հոգաբարձուների խորհուրդը լուծարվել է:

Լևոն Բարսեղյանը հանդիսացել է լուծարված խորհրդի նախագահը: Մեզ հետ զրույցում ասաց՝ լուծարվել են, քանի որ ամենատարբեր պատճառներով խորհրդի անդամները հեռացել են.

«Մեկ հոգու մենք ենք կրճատել, նիստերին չէր գալիս, չէր արձագանքում: Հետո օգոստոսին Գայանե Շագոյանն էր դիմում գրել և խնդրել, որ իրեն ազատեն Շիրակի պետական համալսարանի հոգաբարձուների խորհրդի անդամ լինելու պաշտոնից, քանի որ բացարձակապես անընդունելի էր համարում Նիկոլ Փաշինյանի կառավարության մոտեցումը Ամուլսարի շահագործման խնդրին»:

Հոգաբարձուների խորհրդի վերջակետը դրել է 2020-ի նոյեմբերի 9-ի եռակողմ համաձայնագիրը: Դրան հաջորդող օրերին միանգամից 10-ից ավելի դիմում է ստացել Բարսեղյանը:

«Այդ ժամանակ 13-ից 14 մարդ դուրս եկավ ու խորհրդի կեսից պակաս մարդ մնաց: Նոյեմբերի կեսին նամակ գրեցի վարչապետին ու նախարարին, ասացի, որ 24-ից 11 մարդ է մնացել: Պատասխանեցին, որ լուծարվում է խորհուրդը»,- ասաց Բարսեղյանը:

Ըստ Լևոն Բարսեղյանի՝ լուծարումից հետո մեկ ամսում Կառավարությունը պարտավոր էր նոր խորհուրդ ձևավորել: Անցել է կես տարի, այդ ուղղությամբ որևէ քայլ չի արվել:

ՇՊՀ ռեկտորի պարտականությունները կատարող Երվանդ Սերոբյանն էլ նշում է, թե ինչքան շուտ կազմավորվի հոգաբարձուների խորհուրդն, այդքան լավ:

Չի ասում՝ կառավարման ճգնաժամ կա, բայց որ դժվարություններ կան, չի թաքցնում:

«Կառավարման ճգնաժամի գնահատման խնդիրը տեսեք՝ ինչպես է. մենք էս պահին հոգաբարձուների խորհուրդ չունենք, ես պաշտոնակատար եմ: Հիմա սա կարող է մեկնաբանվել որպես կառավարման ճգնաժամ, կարող է նաև չբնութագրվել այդպես:

Այս պահին մենք մեր գործընթացներն իրականացնում ենք, բայց, իհարկե, ունենք խնդիրներ, որոնք, հոգաբարձուների խորհուրդը եթե լիներ, ինքը պետք է կարգավորեր: Շատ ցանկալի կլինի, որ մենք էդ հոգաբարձուների խորհուրդը շուտ ունենանք, որովհետև կան հարցեր, որ միայն այդ խորհրդի ֆունկցիայի մեջ է մտնում կարգավորումը:

Հոգաբարձուների խորհուրդը մեր ֆինանսական բյուջեն է հաստատում, մեր հաշվետվությունն է հաստատում, դրանք արագ ուղղակի թվարկում եմ, բայց բազմաթիվ այլ հարցեր էլ կան: Այնպես որ լավ կլինի՝ որոշումն արագ կայացվի»,- զրույցը եզրափակեց ՇՊՀ ռեկտորի պարտականությունները կատարող Երվանդ Սերոբյանը:

Հ.Գ. Կառավարության նշված որոշումը, որ հանրային քննարկման էր դրվել մինչեւ մայիսի 14-ը, հրատապ կերպով մայիսի 4-ին ընդունվել էր միայն երեք բուհերի՝ ԵՊՀ-ի, Շիրակի պետական համալսարանի եւ Խաչատուր Աբովյանի անվան մանկավարժական համալսարանի վերաբերյալ՝ հաշվի առնելով այս բուհերում ստեղծված իրավիճակը: Բայց եթե ԵՊՀ-ն շարունակ դժգոհություն է արտահայտում, մյուս երկու բուհերի դիրքորոշումն անհայտ էր մնում: