Հասմիկին հաջողվեց հուզել, իսկ Ռոբերտ Ամիրխանյանի երաժշտության համադրությունը չտեսնված էր. Գյումրու թատրոնը Երեւանում էր

Գյումրու Վ. Աճեմյանի անվան պետական դրամատիկական թատրոնը մոնոներկայացմամբ Երեւանում էր: Երեկ՝ հունիսի 14-ին, «Արմմոնո» փառատոնի շրջանակում ներկայացվեց ռեժիսոր Ռաֆայել Ասատրյանի «Հասմիկը» ներկայացումը՝ դերասանուհի Հասմիկ Սուվարյանի մատուցմամբ:

«Հասմիկը» անանձնական պատմություն է, մոնոդրամա մեկ գործողությամբ: Այն մենախոսություն է, պայքար, հարցուպատասխան անցյալի եւ ներկայի միջեւ: Ինչ-որ տեղ այն նաեւ կռիվ ու բողոք է՝ ուղղված մեր ամենահարազատ մարդկանց՝ ծնողներին՝ իրենց չասած խոսքերի, անպատասխան թողած հարցերի համար:

Ներկայացումը Հովհաննես Թումանյանի անվան տիկնիկային թատրոնում էր: «Հասմիկը» հանդիսատեսի ջերմ ու բուռն արձագանքին արժանացավ: 50 րոպե տեւողությամբ մոնոդրաման կարծես մեկ շնչով պատմված մի աղջնակի պատմություն լիներ՝ տեղ-տեղ տխրեցնող ու հուսահատեցնող, երբեմն էլ՝ շնչահեղձ լինելու աստիճան հուզիչ եւ անկանխատեսելի: Պատմություն էր, որի առնվազն մեկ դրվագում հանդիսատեսը կգտնի ինքն իրեն՝ մտովի տեղափոխվելով մանկություն:

Ներկայացման ավարտին «Հայկական ժամանակը» զրուցեց գլխավոր հերոսուհու՝ Հասմիկ Սուվարյանի հետ: Դերասանուհին հայտնեց, որ մոնոներկայացմամբ հանդես գալու առաջարկը ստացել է ռեժիսոր Ռաֆայել Ասատրյանից, ընթերցել է գործը, անչափ հավանել եւ համաձայնել:

«Գաղափարը բավականին հետաքրքրիր էր: Սյուժեն, ինչպես տեսաք, պտտվում էր այն գաղափարի շուրջ, որ մանկության տարիների տրավմաների, ծնողների հետ ունեցած խնդիրների, չստացված փոխհարաբերությունների հետևանքով կարող են մարդկային ճակատագրեր խեղվել»,- ասաց դերասանուհին՝ հավելելով՝ կուլմինացիայում տրվեց հանդիսատեսին հուզող հարցերի պատասխանները, ու անորոշ չմնաց գրեթե ոչինչ: Հասմիկ Սուվարյանը նշեց, որ ինչպես Գյումրիում են բավականին հետաքրքիր կարծիքներ եւ վերլուծություններ լսել ներկայացումը նայողներից, այնպես էլ Երեւանում:

«Հասմիկը» ներկայացումը դեռ 1 տարի առաջ էր Գյումրու թատրոնի բեմ բարձրացել: Առաջնախաղը եղել է 2020 թվականի մարտի 5-ին: «Չնայած համավարակը խանգարեց, բայց հասցրել ենք արդեն մի քանի անգամ խաղալ Գյումրիում: Գիտեմ, որ Գյումրիում հանդիսատեսին ստիպել ենք գնալ անցյալ, մտածել, ինքնավերլուծությամբ զբաղվել: Շատերը նույնիսկ ներկայացումը դիտելուց հետո ասում էին, որ այն իրենց օգնել է հասկանալ, թե ինչն էր իրենց կյանքի խնդիրը, ինչու չստացվեցին փոխհարաբերությունները մոր հետ, կամ, օրինակ, ինչու են իրենք ինքնամփոփ դարձել և այլն»,- ասաց նա:

Դերասանուհին հույս հայտնեց, որ երեւանյան հանդիսատեսին եւս ներկայացումը կստիպի կարեւոր հարցադրումների շուրջ մտորել եւ իրերի դասավորությանը երբեմն այլ տեսանկյունից նայել:

«Հայկական ժամանակի» հետ զրույցում հանդիսատեսներից ոմանք խոստովանեցին՝ ներկայացումն իրենց մտովի կարծես մանկություն էր տարել, ստիպել վերհիշել ու վերապրել լավ եւ վատ հիշողությունները, համեմատություններ անցկացնել հերոսուհու եւ իրենց ապրած կյանքի միջեւ:

«Ներկայացումը հաջողված էր, Հասմիկին հաջողվեց հուզել, դե իսկ մաեստրո Ամիրխանյանի երաժշտության համադրությունը պարզապես չտեսնված էր»,- նկատեց մեր զրուցակիցներից մեկը:

Նշենք, որ մոնոներկայացման երաժշտական ձեւավորումը մաեստրո Ռոբերտ Ամիրխանյանինն է, նրա «Անանձնություն» երաժշտության ուղեկցությամբ էր: Ի դեպ, Ամիրխանյանը եւս ներկա էր ներկայացմանը: Ավարտին դերասանուհին նրան էլ բեմ հրավիրեց ու եւս մեկ անգամ իր երախտագիտությունը հայտնեց հիասքանչ կատարման համար:

Գյումրու Վ. Աճեմյանի անվան պետական դրամատիկական թատրոնի գեղարվեստական ղեկավար Լյուդվիգ Հարությունյանն էլ «Հայկական ժամանակի» հետ զրույցում նշեց, որ «Անցյալ տարի չեն մասնակցել փառատոնի առցանց ձեւաչափին, քանի որ բացօթյա հնարավոր չէր: Նշեց՝ անչափ ուրախ է, որ փառատոնի կազմակերպիչ Մարիաննա Մխիթարյանը փառատոնի շրջանակներում սկսել է ուշադրություն դարձնել եւ մեծ տեղ հատկացնել նաեւ մարզային թատրոններին:

«Արմմոնո» փառատոնի հեղինակ-կազմակերպիչ Մարիաննա Մխիթարյանն էլ հայտնեց, որ «Հասմիկը» փառատոնի շրջանակներում ցուցադրված նախավերջին ներկայացումն էր: Վաղը՝ հունիսի 15-ին, փառատոնը կեզրափակվի «Ագռավն ասաց» ներկայացմամբ: Տիկին Մխիթարյանը շեշտեց՝ չնայած բազմաթիվ հանգամանքների՝ փառատոնը համարում է հաջողված, 18-րդ օրը այն կեզրափակեն: