Ասա՝ ով է ընդդիմությունդ... ինչո՞վ են հայտնի 8-րդ գումարման խորհրդարանում հայտնվելու շանս ստացած 36 պատգամավորները

Այսօր հունիսի 20-ի խորհրդարանական ընտրությունները Սահմանադրական դատարանում բողոքարկելու վերջնաժամկետն է: 

Ըստ նախապես արված հայտարարությունների՝ ընտրությունների արդյունքները բողոքարկելու վերաբերյալ ՍԴ դիմում կներկայացնեն «Հայաստան» եւ «Պատիվ ունեմ» դաշինքները: Այս գործընթացի զարգացումից է կախված նոր՝ 8-րդ գումարման խորհրդարանի ձեւավորման ժամկետը: Ամեն դեպքում, ըստ նախնական հաշվարկների, առաջին նիստը կարող է տեղի ունենալ հուլիսի 26-ին: 8-րդ գումարման խորհրդարանում, ինչպես ավելի վաղ հայտնել ենք, կլինի 107 պատգամավոր, որից 36-ը՝ ընդդիմադիր:

Ստորեւ ներկայացնում ենք «Հայաստան» եւ «Պատիվ ունեմ» դաշինքների ցուցակներով անցողիկ տեղերում գտնվող պատգամավորների թեկնածուներին եւ նրանց վերաբերյալ որոշակի տեղեկություն:

Եվ այսպես, ովքե՞ր են լինելու «Հայաստան» դաշինքի ձեւավորած խմբակցության պատգամավորները, եթե, իհարկե, մանդատը վայր չդնեն՝ հօգուտ հաջորդների:

Առաջին համարը, ինչպես հայտնի է, Ռոբերտ Քոչարյանն է: Քոչարյանն իր կենսագրության հատվածում նշել է՝ «Սիստեմա ԲՖԿ» անկախ տնօրեն:

Խորհրդարան անցնելու շանս է ստացել Իշխան Սաղաթելյանը: Գեղարքունիքի մարզի Գեղամավան գյուղում ծնված դաշնակցականը եղել է Գեղարքունիքի մարզպետ, ԱԺ նախագահի տեղակալի խորհրդական, Բնապահպանության նախարարի խորհրդական: Պատմական գիտությունների թեկնածու է: Ունի 10 անշարժ գույք, որից 9-ը համատեղ սեփականություն են: Սաղաթելյանը Երեւանում ունի 2 բնակարան, իսկ Գեղարքունիքի Գեղամավան համայնքում՝ 8 հողամաս: Նա ունի նաեւ 8 մլն դրամանոց մատանի: Ըստ մամուլի հրապարակումների՝ հանդիսանում է 10.000 քմ տարածքով, Սեւանա լճի ափին գտնվող «Ծովասար Սեւան» ընտանեկան հանգստի համալիրի ներդրման իրականացնողը։ Համալիրի տնօրենը Իշխան Սաղաթելյանի հայրն է:

Պատգամավոր դառնալու նոր հնարավորություն է ստացել նաեւ գործող խորհրդարանում «Իմ քայլի» ցուցակով հայտնված Աննա Գրիգորյանը: Կապանցի պատգամավորը խորհրդարան անցավ ընդամենը վերջերս՝ «Իմ քայլի» պատգամավոր Տիգրան Կարապետյանի կողմից մանդատը վայր դնելուց հետո: Մանդատ ստանալուց անմիջապես հետո նա տեղափոխվեց հակադիր ճամբար՝ անդամագրվելով Սյունիքի նախկին մարզպետ Վահե Հակոբյանի հիմնադրած «Վերածնվող Հայաստան» կուսակցությանը: 

Սյունիքի նախկին մարզպետն, ի դեպ, հավակնում է լինել 8-րդ գումարման ամենահարուստ պատգամավորներից մեկը: Նա հայտարարագրել է 1 բնակարան Իսպանիայի Ալիկանտե քաղաքում, 2 բնակարան եւ 3 ավտոկայանատեղի՝ Երեւանի Դեմիրճյան փողոցում, 1 բնակարան եւ 1 հողամաս էլ՝ Վահագնի թաղամասում: Սյունիքի նախկին մարզպետն ունի տասնյակ միլիոն դոլարանոց արժեքով ժամացույցներ, արժեքավոր նկարներ:

Զանգեզուրի պղնձամոլիբդենային կոմբինատի խորհրդի անդամ է, եւ 1 տարվա կտրվածքով նրա եկամուտը կազմել է 72 միլիոն դրամ։ Ի դեպ, նա նախկին ՀՀԿ-ական է, ՀՀԿ Սյունիքի տարածքային կազմակերպության նախկին նախագահ:

Հաջորդիվ Արմեն Գեւորգյանն է: «Արինս գրուպ» ՍՊԸ գլխավոր տնօրենը: Ռոբերտ Քոչարյանի եւ Սերժ Սարգսյանի պաշտոնավարման տարիներին մշտապես եղել է իշխանության մեջ՝ զբաղեցնելով փոխվարչապետի, տարածքային կառավարման նախարարի, անվտանգության խորհրդի քարտուղարի պաշտոնները:

Հերթական անգամ պատգամավոր կարող է դառնալ նաեւ ՀՅԴ անդամ, դասախոս Լիլիթ Գալստյանը:

Հաջորդը ցուցակում կրկին դաշնակցական է՝  ՀՅԴ բյուրոյի անդամ Արմեն Ռուստամյանը: Նա Աժ մի քանի գումարման պատգամավոր է: Ռուստամյանի պատգամավորական գործունեության ամենահայտնի դրվագը կապված է ՍԴ նախկին նախագահ Հրայր Թովմասյանին տված հայտնի բնորոշման հետ:

Հիշեցնենք, լրագրողների հետ զրույցում անդրադառնալով ոչ իշխանական ուժերի կողմից կառավարությանն անվստահություն հայտնելու նախաձեռնությանը, Հրայր Թովմասյանը ասել էր՝ «ղալաթ են անում»: ԱԺ նիստերից մեկի ժամանակ անդրադառնալով Թովմասյանի այդ հայտարարությանը՝ Ռուստամյանը հայտարարել է. «Հիմա եթե մենք իրեն ասենք՝ ղալաթ ես անում՝ չաթլախ, չնեղանաք»: Ավելի ուշ նա պարզաբանեց, թե «չաթլախ»՝ նշանակում է ճաք տված:

Պատգամավորական մանդատ կարող է ստանալ նաեւ Պաշտպանության նախկին նախարար Սեյրան Օհանյանը: Մինչ նախարար լինելը նա եղել է ՀՀ Զինված ուժերի 5-րդ բանակային կորպուսի հրամանատար, Արցախի պաշտպանության նախարար,  ՀՀ ԶՈՒ ԳՇ պետ- պաշտպանության նախարարի առաջին տեղակալ:

Սեյրան Օհանյանը Արցախյան պատերազմների մասնակից է, պահեստազորի գեներալ- գնդապետ:

Ընտրություններին մասնակցել է նաեւ 2017 թ.՝ «Օհանյան- Րաֆֆի-Օսկանյան» դաշինքով: Ինչպես հայտնի է՝ դաշինքը չէր հաղթահարել խորհրդարան անցնելու շեմը:

Օհանյանին հաջորդում է է նախկին փաստաբան, ԲՀԿ-ական Էլինար Վարդանյանը: Նույնիսկ ԲՀԿ-ում եղած ժամանակ Վարդանյանը հայտնի էր որպես քոչարյանական թեւի ներկայացուցիչ:

Վերջինս մեկ այլ քոչարյանական պատգամավոր Ստեփան Մարգարյանի հետ ԲՀԿ-ից հեռացվեց 2015 թ. հոկտեմբերի 8-ին՝ ԲՀԿ Կենտրոնի տարածքային կազմակերպության խորհրդի որոշմամբ: Պատճառն այն էր, որ երկու պատգամավորները, չենթարկվելով խմբակցության դիրքորոշմանը, բոյկոտեցին Սերժ Սարգսյանի նախաձեռնած սահմանադրական բարեփոխումների քվեարկությունը:

Արծվիկ Մինասյան.- ՀՅԴ կարկառուն ներկայացուցիչ է, մի քանի գումարման ԱԺ պատգամավոր: ՀՀԿ-ՀՅԴ կոալիցիաների արդյունքում մի քանի անգամ հնարավորություն է ստացել նախարարի պորտֆել ստանալ: Եղել է տնտեսական զարգացման եւ ներդրումների նախարար, էկոնոմիկայի նախարար, աշխատանքի եւ սոցիալական հարցերի նախարարի տեղակալ :

Արթուր Ղազինյան.- «Մեկ Հայաստան» կուսակցության նախագահն է: 1999-2002 թթ. պաշտոն է զբաղեցրել Սահմանադրական դատարանի աշխատակազմում, 2004-2008 թթ.՝ ՀՀ Կառավարության աշխատակազմում, եղել է ՀՀ տարածքային կառավարման նախարարի խորհրդական:

Դաշինքի անցողիկ տեղերից մեկն էլ բաժին է ընկել ՀՅԴ երիտմիության անդամ Քրիստինե Վարդանյանին: Նա հայտնի է Կրթության նախկին նախարար Արայիկ Հարությունյանի դեմ ակցիաներից:

Գեղամ Մանուկյանը «Երկիր Մեդիա» հեռուստաընկերության լրատվական քաղաքական ծրագրերի տնօրենն է, պատերազմից հետո վարում էր Վազգեն Մանուկյանի ղեկավարած «17+» շարժման հավաքները: Մասնագիտությամբ թուրքագետ է:  

2018-ին, հակառակ խմբակցության որոշման՝ վարչապետի պաշտոնում Նիկոլ Փաշինյանի թեկնածությանը դեմ քվեարկելու համար դաշնակցությունից հեռացված Աղվան Վարդանյանը ծնունդով Նախիջեւանի Գեմուր գյուղից է: Մոտոհրաձգային զորքերի պահեստազորի լեյտենանտ է։ Մի քանի անգամ պատգամավոր է եղել, Քոչարյանի իշխանության տարիներին նաեւ զբաղեցրել է Աշխատանքի եւ սոցիալական հարցերի նախարարի պաշտոնը:

Խորհրդարանում առաջին անգամ որպես պատգամավոր հայտնվելու շանս է ստացել նաեւ 5-րդ ալիքի լրագրող Ագնեսա Խամոյանը: Նա աշխատել է նաեւ «Երկիր» թերթում եւ համանուն կայքում:

Խամոյանին հաջորդում է «Պոլիտէկոնոմիա» հետազոտական ինստիտուտի տնօրեն, քաղաքագետ Անդրանիկ Թեւանյանը:

Այնուհետեւ Մեղրի համայնքի ղեկավար Մխիթար Զաքարյանն է: Վերջինս Սյունիքում վարչապետի դեմ ակցիաների ակտիվ մասնակից էր եւ անցնում էր այդ կապակցությամբ հարուցված քրգործով:

Հռիփսիմե Ստամբուլյան.- «Հայաստան» դաշինքի ցուցակով պատգամավորի այս թեկնածուն հայտնի է տուրիստական ոլորտից: Նա «Անրիվա տուր» ՍՊԸ տնօրենն է: Այս ընկերությունը զբաղվում է ինչպես զբոսաշրջային, այնպես էլ միջազգային բեռնափոխադրումների բիզնեսով:  

Մանդատը վերցնելու պարագայում պատգամավոր կարող է դառնալ նաեւ ցուցակի 19-րդ համարը՝ Արագածոտնի նախկին մարզպետ, ՀՅԴ անդամ Աշոտ Սիմոնյանը: Նա նախորդ տարեվերջին ձերբակալվել, ապա ազատ էր արձակվել պատգամավոր Սիսակ Գաբրիելյանի եւ քաղաքացիների միջեւ Ազգային ժողովի դիմաց տեղի ունեցած միջադեպի առթիվ հարուցված քրգործի շրջանակներում: Հիշեցնենք, բողոքի ակցիա իրականացնող քաղաքացիները ԱԺ դիմաց ձվեր էին նետել  պատգամավորների ուղղությամբ, սկսվել էր հրմշտոց, հնչել էին հայհոյանքներ։

Ցուցակում 20-րդ՝ անցողիկ տեղում «Իզմիրլյան» ԲԿ տնօրեն Արմեն Չարչյանն է: Վերջինս կալանավորված է՝ ընտրություններին մասնակցելուն հարկադրելու համար։

«Անկախ դիտորդ» դաշինքը հրապարակել էր մի ձայնագրությունը, որտեղ լսվում է ենթադրաբար Չարչյանի ձայնը, որը բժշկական կենտրոնի աշխատակիցներին ասում է, որ «Հայաստան» դաշինքի ընտրացուցակում է եւ խնդրում է, պարտադրում անպայման մասնակցել ընտրություններին։ Ավելին՝ լսվում է նաեւ, թե ինչպես է զգուշացնում, որ ընտրություններից հետո կկարողանա իմանալ՝ ով է մասնակցել քվեարկությանը, ով՝ ոչ։

Չարչյանին հաջորդում է Ելենա Կիրակոսյանը՝ «Ջերմիկ անկյուն» հիմնադրամի տնօրեն: Այլ տեղեկություն նրա մասին հայտնի չէ:

Փոխարենը՝  համացանցում անսպառ ինֆորմացիա կա ցուցակի հաջորդ համարի՝ ավելի շուտ նրա հոր՝ Մհեր Սեդրակյանի (Թոխմախի Մհեր) մասին: Պատգամավորի թեկնածու Դավիթ Սեդրակյանը «Դռագսման» ՍՊԸ բաժնետեր է: Նրան է պատկանում «Երեւան ցեմենտ» գործարանը: Կրտսեր Սեդրակյանը ՀՀԿ ցուցակով եղել է նաեւ Երեւանի ավագանու անդամ: Զբաղեցրել է Էրեբունի համայնքի ղեկավարի խորհրդականի պաշտոնը:

ԱԺ անցնելու հնարավորություն են ստացել նաեւ նախկին վարչապետ Կարեն Կարապետյանի շրջապատի որոշ ներկայացուցիչներ:

Մասնավորապես, խոսքը նրա նախկին խորհրդական Ալեքսանդր Խաչատուրյանի մասին է: Խաչատուրյանը «ԹիՔեյ Ընդ Փարթներս» ՓԲԸ բաժնետեր է, ֆինանսական եւ բանկային իրավունքի մագիստրոս:

Հաջորդ թեկնածուն նախկին պատգամավոր Արմենուհի Կյուրեղյանն է՝ Վանաձորի պետական համալսարանի դասախոս է, ՀՅԴ անդամ, դոցենտ:

Նրան հաջորդում է Կարեն Կարապետյանի վարչապետության ժամանակ նրա օգնական եղած Արամ Վարդեւանյանը: Այժմ նա գրեթե բոլոր գործերով Քոչարյանի եւ նրա շրջապատի փաստաբանն է, «Ջեյ-Փի» փաստաբանական գրասենյակի հիմնադիր-տնօրենը: Նախկինում աշխատել է ՀՀ մարդու իրավունքների պաշտպանի աշխատակազմում, ՍԴ-ում:

Այնուհետեւ ՀՅԴ Բյուրոյի տնտեսական հետազոտությունների գրասենյակի ծրագրերի համակարգող Թադեւոս Ավետիսյանն է, ապա ԵՊՀ դասախոս Մարիաննա Եփրեմյանը, Սիսիանի համայնքապետ Արթուր Սարգսյանը, դասախոս Արթուր Խաչատրյանը:

Վերջին անցողիկ՝ 29-րդ տեղը բաժին է ընկնում ազգությամբ ասորի թեկնածուին՝ Արարատի մարզի Վերին Դվին գյուղի բնակիչ 26-ամյա Զեմֆիրա Միրզոեւային:

Չնայած ընտրությունների արդյունքում դաշինքների համար անցողիկ՝ 7 տոկոսի շեմը չհաղթահարելուն՝ Սահմանադրության պահանջով խորհրդարանը կունենա նաեւ «Պատիվ ունեմ» դաշինքից 7 պատգամավոր:

Այս դաշինքի առաջին 7-նյակում են.

Արթուր Վանեցյան.- ԱԱԾ նախկին տնօրեն, «Հայրենիք» կուսակցության նախագահ: Վերջինս պատերազմից հետո անցնում է մի քրգործով՝ մեղադրվելով իշխանության յուրացումը եւ վարչապետի սպանությունը նախապատրաստելու համար։ Վանեցյանը իր եկամուտներից եւ ունեցվածքից գրեթե ոչինչ չի հայտարարագրել, մեծ թվով բիզնեսներ, ըստ մամուլի հրապարակումների, գրանցված են հոր՝ Գագիկ Վանեցյանի անունով:

Տարոն Մարգարյան.- նշել է, որ չի աշխատում: Երեւանի նախկին քաղաքապետն է: Նրա դղյակների ու հարստության մասին նույնիսկ ֆիլմ էր նկարահանվել, իսկ հայտարարագրում գրեթե ոչինչ նշված չէ: Որպես անշարժ գույք հայտարարագրել է 1 ամառանոց Ջերմուկում, իսկ որպես շարժական գույք՝ «Mercedes-Benz S 450» մակնիշի ավտոմեքենա: Նշենք, որ Երեւանի քաղաքապետի պաշտոնից հեռանալուց հետո Մարգարյանն ուներ 8 անշարժ գույք:

Աննա Մկրտչյան.- ՀՀԿ երիտմիության անդամ, Քասախի համայնքապետ Արա Մկրտչյանի դուստրը:

Իշխան Զաքարյան.- Վերահսկիչ պալատի նախկին նախագահ, ԲՀԿ-ական նախկին պատգամավոր, Համահայկական խաղերի համաշխարհային կոմիտեի նախագահ, Հայաստանի օլիմպիական կոմիտեի նախկին նախագահ:

Հայկ Մամիջանյան.- ՀՀԿ անդամ, «Լույս» հիմնադրամի հետազոտությունների համակարգող:

Թագուհի Թովմասյան.- ԱԺ պատգամավոր է: 7-րդ գումարման խորհրդարանում է հայտնվել «Իմ քայլը» դաշինքի ցուցակով, խմբակցությունից դուրս է եկել պատերազմից հետո: «Ժողովուրդ» օրաթերթի հիմնադիրն է:

Տիգրան Աբրահամյան.- ՀՀԿ-անդամ է: Սերժ Սարգսյանի իշխանության օրոք եղել է ՀՀ նախագահի աշխատակազմ, «Հանրային կապերի տեղեկատվության կենտրոնի» փորձագետ, տնօրենի խորհրդական, այնուհետեւ Արցախի նախագահի անվտանգության հարցերով խորհրդական: «Հենակետ» վերլուծական կենտրոնի տնօրենն է:

Տպել
5236 դիտում

ՆԱՏՕ-ն մոբիլիզացնում է ուժերը, դաշինքն օգնություն կուղարկի Թուրքիա. Ստոլտենբերգ

Կարևոր է, որ Սահմանադրական արդարադատությունը ձևավորի մտածողություն, որն իր բնույթով պետական է. վարչապետ (լուսանկարներ)

Շրջափակման ընթացքում Արցախի ծննդատներում ծնվել է 204 երեխա

Քրեական ենթամշակույթ կրող խմբավորում ղեկավարելու, դրան մասնակցելու համար մեղադրանք է ներկայացվել 4 անձի, կա կալանավորված

Հայաստանը պատրաստ է օգնել. Նիկոլ Փաշինյանը ցավակցություն է հայտնել Թուրքիային և Սիրիային

Երկրաշարժի հետևանքով Հալեպում զոհվածների թվում հայեր կան. ՀՀ ԱԳՆ մամուլի խոսնակ

Եվրամիությունը պատրաստ է օգնել Թուրքիային ու Սիրիային. Բորելը ցավակցել և օգնություն է առաջարկել

Թուրքիայում երկրաշարժից հետո բազմաթիվ շինություններ խիստ խարխլվել են. շենքերը շարունակում են փլուզվել (տեսանյութ)

Վաղարշակ Մատիկյանը նշանակվել է Կրթության տեսչական մարմնի ղեկավար

Երազում եմ, որ որևէ օտար չբացի այդ գիրքը և չհասկանա՝ այնտեղ ինչ է գրված. Աննա Հակոբյանը՝ ինքնաթիռում թողնված գրքի մասին

Թուրքիայում ավերիչ երկրաշարժի հետևանքով տագնապի ամենաբարձր մակարդակ է հայտարարվել

Աշոցքի և Ամասիայի տարածաշրջաններում ձյան շերտի հաստությունը 15-20 սմ է

Արմեն Արզումանյանն ազատվել է ՀՀ էկոնոմիկայի նախարարի տեղակալի պաշտոնից

Սիրիայում և Թուրքիայում երկրաշարժի զոհերի թիվը գերազանցել է 500-ը. վիրավոր է մի քանի հազար մարդ (տեսանյութ)

«Արաբկիր» ԲԿ-ի մուտքի մոտ պարեկին հարվածելու, նրանց աշխատանքին խոչընդոտելու վարույթով կա կալանավորված. ՔԿ

Ինչպես է երկրաշարժի հետևանքով փլուզվում Թուրքիայի բարձրահարկ շենքերից մեկը (տեսանյութ)

Սեյսմիկ ակտիվ գոտում գտնվող երկիրը հարևան երկրի երկրաշարժից ուրախանալու հիմնավորում չունի. Մովսես Հարությունյան

Զինվորական կացարանի ննջարանի դուռը փակ չի եղել, մարմինները սենյակի տարբեր մասերում էին. զինդատախազության անդրադարձը

Ստեփանծմինդա-Լարս ավտոճանապարհը փակ է բոլոր մեքենաների համար

Խոշոր հրդեհ Երևանի Սեբաստիա փողոցի տներից մեկում. տուժել է բնակիչներից մեկը (լուսանկարներ)

Ուժգին և ավերիչ երկրաշարժ Թուրքիայում. կան հարյուրավոր զոհեր ու տուժածներ երկրում ու հարևան Սիրիայում (լուսանկարներ)

Արհեստական կերակրափողի ստեղծում, շնչափողի պլաստիկա. 1 օրում 3 բացառիկ ու ծանր վիրահատություն «Սուրբ Աստվածամայր» ԲԿ-ում

ԱԳ նախարար Արարատ Միրզոյանն աշխատանքային այցով կմեկնի Բեռլին

ՀՀ տարածքում ձյուն է տեղում. դժվարանցանելի են Սպիտակի ոլորանները, Վարդենյաց լեռնանցքը

ՆԳՆ փրկարարները մեկ օրում ձյան մեջ արգելափակված 15 ավտոմեքենա են դուրս բերել

4 բալ ուժգնությամբ երկրաշարժ Բավրայի մոտակայքում. ցնցումները զգացվել են ՀՀ տարածքում

Թուրքիան ու Ադրբեջանն այս տարի 10-ից ավելի համատեղ զորավարժություն կանցկացնեն

Կոտայքում ճանապարհի մերկասառույցի պատճառով վրաերթի են ենթարկվել ծառայություն կատարող պարեկները

Դուբայում աքսորի մեջ մահացել է Պակիստանի նախկին առաջնորդ Փերվեզ Մուշարաֆը

Վարդենյաց լեռնանցքը փակ է կցորդով տրանսպորտային միջոցների համար

Թուրքիայի առևտրի նախարարը խոսել է Հայաստանի հետ սահմանները բացելու նախապայմանների մասին

Ծեծկռտուք Երևանի «Ռոյալ» ակումբի մոտ. բերման ենթարկվածներից մեկը Առաքել Մովսիսյանի որդին է

Կեղծ հրապարակում է տարածվել Արցախի ԱԱԾ-ի հետ կապ ունեցող «Տելեգրամ» ալիքի վերաբերյալ

Տաշիր քաղաքում բախվել են ավտոմեքենաներ. կա տուժած

Երևան-Մեղրի ճանապարհին մերկասառույցի պատճառով բեռնատարները թեքվել և միակողմանի փակել են ավտոճանապարհը

ՀՀ ազգային հերոս Էդուարդո Էռնեկյանին շնորհվել են Ֆլորենցիա քաղաքի բանալիները (լուսանկարներ)

Ակտիվ ցիկլոն է ներթափանցել ՀՀ տարածք. առաջիկա օրերին առատ ձյուն կտեղա, սպասվում է բուք, ցածր տեսանելիություն

Թեհրանի Սուրբ Սարգիս մայր եկեղեցում համանուն տոնին նվիրված պատարագ է մատուցվել

Ուկրաինայի գլխավոր դատախազությունը հեռակա մեղադրանք է առաջադրել Սեմյոն Պեգովին

Մաեստրոն կա թատրոնում, երգերում, մարդկանց սրտերում և հայրենիքում. մեկ տարի՝ առանց Արթուր Գրիգորյանի (տեսանյութ)