Կարծում եմ՝ ժողովուրդը ճիշտ ընտրություն կանի՝ տեսնելով ներկան և պատկերացնելով ապագան, որն առաջարկվում է. Հարությունյան

Սույն թվականի հոկտեմբերի 17-ին Գյումրիում կայանալու են ՏԻՄ ընտրություններ, որին մասնակցության հայտ են ներկայացրել 10 քաղաքական ուժ՝ 7 կուսակցություն և 3 դաշինք: Իշխող՝ «Քաղաքացիական պայմանագիր» կուսակցության ցուցակը գլխավորելու է Շիրակի մարզպետ Հովհաննես Հարությունյանը: 

«Հայկական ժամանակ»-ը սպասվող ընտրություններին ընդառաջ զրուցել է Հովհաննես Հարությունյանի հետ:

- Պարոն Հարությունյան, այս տարվա հունվարին՝ հետպատերազմյան ծանր շրջանում, Դուք նշանակվեցիք Շիրակի մարզպետ: Վերջերս էլ Գյումրի կատարած այցի ընթացքում ՀՀ փոխվարչապետ Սուրեն Պապիկյանը հայտարարեց, որ Դուք իշխող ուժի համար քաղաքապետի ամենացանկալի թեկնածուն եք: Ինչո՞ւ են Ձեզ համարում ամենացանկալին:

- Դեկտեմբեր-հունվարը ծանր ամիսներ էին Շիրակի մարզի համար՝ կապված գերեվարվածների հետ: Պետք է ընտրվեր այնպիսի մարդ, որը պատրաստ կլիներ այդ բեռն իր ուսերին վերցնել՝ Շիրակի մարզը զերծ պահելով ցնցումներից: Եվ ամենակարևոր մոտիվացիան կլիներ Շիրակի մարզի զարգացումը: Քննարկումները եղել են միայն սրանց շուրջ: Արդյունքում երկուստեք նույն պատկերացումն ենք ունեցել Շիրակի համար, և որոշում է կայացվել, որ ես պետք է զբաղեցնեմ մարզպետի պաշտոնը: Գյումրու քաղաքապետի թեկնածությունը ևս նույն հիմքերն ունի: Բոլոր քննարկումների և հանդիպումների ժամանակ որպես առաջնահերթություն ես անընդհատ առաջ էի տանում Շիրակը, Գյումրին զարգացնելու միտքը: Հատկապես պատերազմից հետո մի լուսավոր կետ էր պետք: Եվ այդ հոգատարությունն էր գուցե պատճառը, կամ իմ ասած այդ անընդհատ պարտադրանքը Գյումրու համար, և որոշումների կայացման ժամանակ քննարկվեց նաև իմ անունը:

- Իսկ Ձեզ համար բա՞րդ էին այս որոշումները կայացնելը:

- Այո, բարդ որոշում էր համաձայնելը: Ես շատ պատասխանատու եմ համարում Գյումրու քաղաքապետի պաշտոնը, որովհետև գործ ունես մի կենդանի օրգանիզմի հետ, և քո գործողություններից է կախված քաղաքի զարգացումը, մարդկանց ճակատագիրը: Եվ ընդհանրապես, եթե դու քաղաքի կառավարման մեջ անում ես սխալներ, դրանք դառնում են ճակատագրական և՛ քաղաքի, և՛ քեզ համար: Բայց պատերազմից հետո ոչինչ այլևս բարդ չի թվում ինձ այն իրավիճակի հետ համեմատ, որի միջով անցել ենք: Ես մեծ պատվով համաձայնել եմ լինել Գյումրու քաղաքապետի թեկնածու և որպես քաղաքապետ զարգացնել քաղաքը: Այն 30 տարիների կուտակված բացերը, որոնք օր օրի ավելի ահագնացել են, մաքսիմալ արագ կարգավորել:

- Գո՞հ եք այն կազմից, որով գնում եք ընտրություններին:

- Այո, ցուցակն անձամբ եմ կազմել:

- Շահարկումներ կան ցուցակում գտնվող որոշ անունների հետ կապված: Օրինակ՝ ԱԺ պատգամավոր Նազելի Բաղդասարյանի եղբոր:

- Ի պատիվ իմ քաղաքական ղեկավարության՝ չեմ ունեցել հատուկ ցուցումներ: Պատասխանատվությունը տալուն զուգահեռ՝ նաև տալիս են որոշում կայացնելու իրավունքը, որը կրկնակի ավելի պատասխանատու է դարձնում աշխատանքը: Արման Բաղդասարյանը ՔՊ անդամ է, բացի դրանից, նա իմ շատ լավ ընկեր Նազելի Բաղդասարյանի եղբայրն է: Իր՝ 2-րդ համարում լինելը պատահական չէ: Սկսած 2018 թվականից՝ համապետական ընտրություններում ներգրավվածությունը, հետագայում էլ նա այն եզակի մարդկանցից է եղել, որը համապետական ընտրություններից հետո ամենօրյա ռեժիմով կարողացել է կապող օղակ լինել բազմաթիվ քաղաքացիների ու իմ միջև: Ես նրան առաջարկել եմ լինել այդ տեղում, նա համաձայնել է:

- Խոսակցություններ են շրջանառում այն մասին, որ «Քաղաքացիական պայմանագիր» կուսակցությունը կուլիսային պայմանավորվածություն ունի «Բալասանյան դաշինք» սոցիալական կուսակցության հետ: Ի՞նչ կասեք այս մասով:

- Այդ լուրերն ու խոսակցությունները ոչ թե հերքելու են ենթակա, այլ ծիծաղելի են: ՔՊ-ն, որպես քաղաքական ուժ, շատ կարճ ժամանակամիջոցում շատ ծանր փորձությունների միջով անցավ: «Բալասանյան դաշինք» կուսակցությունը, որպես քաղաքական ուժ, դեռևս ունի շատ մեծ ճանապարհ անցնելու, ինչպես ասում են՝ շատ հաց ու պանիր ունի ուտելու, որպեսզի փորձեն մի հարթության վրա դիտարկեն մեզ ու իրենց ու խոսեն ինչ-որ պայմանավորվածություններից: ՔՊ-ն անգամ համապետական ընտրություններին մասնակցեց առանց դաշինքի, նույնն էլ հիմա Գյումրիում և մյուս համայնքներում է:

Եթե լիներ ինչ-որ մարդկանց օգնության անհրաժեշտությունը, ապա նրանք անպայման կլինեին ՔՊ ցուցակում, բայց ասել, թե մի քանի ամիս առաջ ստեղծված կուսակցության հետ երկրի կառավարող ուժը կարող է գնալ ինչ-ինչ համաձայնությունների, միամտություն է: Եվ այն մարդիկ, որոնք հավատացել են այդ բացառիկ մտքին ու շատ մարդկանց վառ երևակայության արդյունքին, որ կարող է լինել պայմանավորվածություն, կարող եմ տխրեցնել ու ասել, որ ՔՊ-ն ունի բավականաչափ անցած ճանապարհ, որ մենակ գնա ընտրության, հետագայում էլ մենակ զբաղվի կառավարումով: Միգուցե շատերի համար ցանկալի կլիներ նման արտահայտություններով ձայն փախցնել: Նման օրինակ մենք ունենք 2018-ին, երբ «Լուսավոր Հայաստանը» ամեն պատի տակ, ամեն քարի տակ կանգնում, ասում էր՝ մենք նույնն ենք, մենք Փաշինյանի հետ նույնն ենք, և այդպես կարողացան ձայներ փախցնել: Շուրջ 2 տարի տեղեր զբաղեցրին ԱԺ-ում, բայց բոլորը տեսան, նաև այս ԱԺ ընտրությունների արդյունքները փաստեցին, որ նրանք կապ չունեին ՔՊ կուսակցության հետ, և նրանց  ժողովուրդը չի տեսնում ոչ մի տեղ:

- Ե՞րբ կմեկնարկի քարոզարշավն ու ինչ ձևաչափով կընթանա:

Գյումրիում «Քաղաքացիական պայմանագիրը» ցուցապաստառներ փակցրել է, բայց, անկախ քարոզարշավի մեկնարկից, չի շտապում: Պասիվությունն աննպատակ չէ: Քանի դեռ սեպտեմբերի 27-ը չէր անցել, նման քայլի չէինք գնա: Քարոզարշավը կմեկնարկի հոկտեմբերի 1-ից: Մինչև հոկտեմբերի 15-ը նախատեսում եմ հանդիպել քաղաքացիների հետ: Չնայած այնպես չէ, որ նոր եմ ծանոթանալու խնդիրներին, բայց կուզենամ մարդկանց հետ շփվել, մարդիկ իմ հետ շփվեն: Նախ առաջինը, որ տեսնեն՝ մենք նույն միս ու արյունից ենք, և այն, ինչ իրենք իրենց համար պատկերացնում են, իմանան, որ մի քիչ ավելի շատ ես եմ ուզում իրենց համար անել: Իմ ամենակարևոր մոտիվացիան է ապրել զարգացած քաղաքում, զարգացած ու ուժեղ երկրում: Կարծում եմ, որ ժողովուրդը ճիշտ ընտրություն կանի՝ տեսնելով ներկան և պատկերացնելով այն ապագան, ինչն առաջարկվում է:

Սամսոն Մատինյան