Կոչ կանեմ, որ չնստեն տներում և սպասեն, որ ուրիշն իրենց փոխարեն որոշի. Հրազդանում ԼՀԿ համայնքապետի թեկնածու

Սույն թվականի դեկտեմբերի 5-ին Կոտայքի մարզի Հրազդան խոշորացված համայնքում նույնպես սպասվում են ՏԻՄ ընտրություններ: «Լուսավոր Հայաստան» կուսակցությունն այս համայնքում առաջադրել է Արշավիր Խաչատրյանի թեկնածությունը:

Խաչատրյանի հետ «Հայկական ժամանակի» զրույցը՝ ստորեւ.

- Պարոն Խաչատրյան, «Լուսավոր Հայաստան» կուսակցությունն ինչո՞ւ եւ ինչպե՞ս որոշեց առաջադրել Ձեր թեկնածությունը: Ինքներդ ինչպե՞ս եք գնահատում Ձեր շանսերը:

- Ես մարզի կուսակցության կառույցի ղեկավարն եմ եղել, երկար ժամանակ ապրում եւ աշխատում եմ այս համայնքում: Համարել են, որ ամենափորձառու եւ նպատակային թեկնածուն կարող եմ ես լինել: Իսկ ինչ վերաբերում է իմ շանսերին, ապա նշեմ, որ ցանկացած մարդ, որ մտնում է պայքարի մեջ, իհարկե, ձգտում է հաղթանակի, իսկ ինչ արդյունքներ կգրանցենք, կերեւա ընտրություններից հետո:

- Իշխանության գալու պարագայում ի՞նչ ծրագրեր եք նախատեսել՝ արդեն խոշորացված համայնքում իրագործելու համար:

- Ասեմ, որ երկար ժամանակ ես աշխատել եմ պետական համակարգում: Աշխատելով Կոտայքի մարզպետարանում՝ անմիջական շփումներ եմ ունեցել բոլոր համայնքների ներկայացուցիչների հետ, շատ լավ գիտեմ խնդիրներն ու ի տարբերություն շատերի, որոնք միայն խնդիրները մատնանշելով են սահմանափակվում, ես գիտեմ նաեւ դրանց լուծման մեթոդները: Իմ ընտրվելու դեպքում շատ հարցեր կլուծվեն:

- Իսկ ո՞ր ոլորտների վրա եք առաջնային շեշտը դնելու:

- Որպեսզի ես դրանք առանձին-առանձին չթվարկեմ ու ծրագիրը երկար-բարակ չներկայացնեմ, կարճ կասեմ՝ ամեն ինչ անելու եմ, որ Հրազդանում ապրող բնակիչներն աշխատանքով ապահովված լինեն եւ Հրազդանից դուրս աշխատանք չփնտրեն: Շեշտադրումը դրվելու է մարդկանց աշխատանքով ապահովելու վրա: Ներդրումներ պիտի բերվեն համայնք: Երբեմնի հզոր արդյունաբերական Հրազդանը պիտի նորից ոտքի հանենք, որ մեր լավագույն մասնագետները մնան ու համայնքում աշխատեն: Նաեւ մեծ ուշադրություն ենք դարձնելու մշակութային կյանքին և սպորտին:

- Ձեր պատկերացմամբ՝ Հրազդանը զարգացվածության առումով շա՞տ է հետ Երեւանից:

- Ես չէի ուզենա, որ Հրազդանն առանձնացնեինք հանրապետության մյուս համայնքներից, այնպես որ միայն մի բան կարող եմ ասել՝ ինչպես նախկինում, այնպես էլ հիմա նույն մոտեցումն է. ամեն ինչ կենտրոնացված է միայն Երեւանում: Մարզերին, մարզկենտրոններին ոչ մի ուշադրություն չի դարձվում: Բոլոր խոշոր կառույցները կենտրոնացված են միայն Երեւանում, եւ պատահական չէ, որ ներդրումները եւս միայն այնտեղ են արվում:

- Պարոն խաչատրյան, համամասնական ընտրակարգով բացարձակ մեծամասնություն չլինելու դեպքում համայնքապետն ընտրվելու է կոալիցիոն ձևաչափով: Նման արդյունքի դեպքում գնալո՞ւ եք համագործակցության Ձեզ մրցակից քաղաքական թիմերի հետ:

- Ես ոչ մեկի հետ կարմիր գծեր չունեմ: Մենք իշխանության կռիվ չենք տալիս, աշխատում ենք անել առավելագույնը: Եթե ինձ չհաջողվի ընտրվել, եւ ընտրվողը լինի մեկ այլ անձ, պատրաստ եմ նրա հետ աշխատել, եթե այդ անձն աշխատի հանուն համայնքի:

- Ավագանու համամասնական ցուցակն ի՞նչ տրամաբանությամբ է ձեւավորվել, ինչո՞վ եք առաջնորդվել ընտրություն կատարելիս:

- Առաջնային տեղ ենք տվել փորձառու մասնագետներին, պատրաստակամ անձանց, որոնք պատրաստ են իրենց փորձն ու գիտելիքը ներդնել համայնքի զարգացման գործում: Իրականում մենք ընտրել ենք մարդկանց, որոնք պատրաստ են աշխատել: Մեր թիմում կան ե՛ւ երիտասարդներ, ե՛ւ փորձառու ու տարեց անձինք:

- Ինչո՞ւ պետք է քաղաքացիներն իրենց քվեն վստահեն Ձեզ:

- Ես դիմել եմ իմ բոլոր ընտրողներին, Հրազդան համայնքի բնակիչներին՝ տալով մի խորհուրդ, որ բոլորն անպայման գնան ընտրության: Մեր երկիրն այսօր այս իրավիվիճակին է հասցրել անտարբերությունը: Կոչ կանեմ, որ չնստեն տներում եւ սպասեն, որ ինչ-որ մեկն իրենց փոխարեն ընտրություն կկատարի: Թող նախ վերցնեն, ուսումնասիրեն բոլոր թեկնածուների գործունեությունը, նրանց անցած ճանապարհը, փորձն ու գիտելիքները: Եթե այդ ամենն ուսումնասիրեն եւ համեմատեն, ապա վստահ եմ՝ ճիշտ ընտրություն կկատարեն: