Մարդիկ այս ընտրություններին մոտենում են քաղաքապետի ընտրության նման. Վանաձորում «Լուսավոր Հայաստանի» թեկնածու

Սույն թվականի դեկտեմբերի 5-ին Վանաձորում կայանալիք ՏԻՄ ընտրություններին «Լուսավոր Հայաստան» կուսակցության համամասնական ցուցակը գլխավորում է Վանաձոր համայնքի ավագանու նախկին անդամ, ԱԺ նախկին պատգամավոր Հրանտ Այվազյանը: «Հայկական ժամանակ»-ն Այվազյանի հետ զրուցել է ծրագրերի, քարոզարշավի ընթացքի, 5 տարի առաջ իրենց «դավաճանած» գործընկերների և հնարավոր կոալիցիոն գործարքների վերաբերյալ:

- Պարոն Այվազյան, ինչպե՞ս որոշում կայացվեց, որ Վանաձորում «Լուսավոր Հայաստան» կուսակցության ցուցակը Դուք պետք է գլխավորեք, ինչո՞ւ ընտրությունը կանգ առավ Ձեզ վրա:

- Նախ՝ մենք հանդես ենք գալիս թիմով, և տվյալ դեպքում ընտրությունը կանգ առավ ինձ վրա, քանի որ թիմը գտավ, որ այս ընտրություններին ես ավելի պատրաստ եմ, ունեմ ավելի մեծ փորձառություն: Ես հասարակական գործունեության 20 տարվա փորձ ունեմ տարբեր համայնքներում, այդ թվում՝ Վանաձորում: Եղել եմ ավագանու անդամ, քաջածանոթ եմ ՏԻՄ խնդիրներին ու դրանց լուծման ուղիներին: Լինելով պատգամավոր՝ ես եղել եմ ՏԻՄ, տարածքային կառավարման և բնապահպանական և գյուղատնտեսական հանձնաժողովում: Մեր թիմում ընդգրկված են երիտասարդ, ինքնաբավ ու կայացած մարդիկ, որոնք համայնքային շահը գերադասում են անձնական շահից և պատրաստ են իրենց փորձով ու գիտելիքներով ծառայել ի շահ համայնքի:

- Ըստ Ձեզ՝ Վանաձորում առաջնային լուծման անհրաժեշտություն պահանջող խնդիրը ո՞րն է:

- Խնդիրները բազմազան են: Ակնառու խնդիրներ են աղբահանությունը, շների խնդիրը, տանիքներն ու վերելակները, սրանք պետք է առաջնային լուծում ստանան: Սակայն թիվ մեկ խնդիրն ինձ համար ներդրողների համար բարենպաստ մթնոլորտ ստեղծելն է, բայց նախ վանաձորցին պետք է ցանկանա մնալ Վանաձորում, որ ներդրողը շահագրգռված լինի ներդրում անել այստեղ: Թիվ մեկ խնդիր է նաև համայնքի համաչափ զարգացումը:

- Ինչպե՞ս եք գնահատում քարոզարշավի ընթացքը:

- Ելնելով երկրի ներկա պայմաններերից՝ որոշեցինք փոքր-ինչ հանրային ակտիվ քարոզարշավ չծավալել, փոխարենը ավելի շատ բակային ու անհատական հանդիպումներ ենք ունենում, հանդես ենք գալիս նաև ԶԼՄ-ներով: Պետք է նկատել, որ շատերը տեղյակ են համամասնական ընտրակարգի մասին: Մարդիկ այս ընտրություններին մոտենում են քաղաքապետի ընտրության պես, մինչդեռ համամասնական ընտրակարգւը տարբեր է մեծամասնականից:

- Ինչպե՞ս եք գնահատում «Լուսավոր Հայաստան» կուսակցության ընտրվելու շանսը:

- Բավականին լավ եմ գնահատում, համոզված եմ, որ մեր համայնքում կան մարդիկ, որոնք կարող են վեր կանգնել «խնամի-ծանոթ-բարեկամ» սկզբունքից և ընտրել այնպիսի թիմ, որն ունակ է իր փորձով ու գիտելիքով ծառայել համայնքին:

- Խորհրդարանական արտահերթ ընտրություններում կրած պարտությունից հետո չկա՞ մնտավախություն, որ ՏԻՄ ընտրություններում ևս կպարտվեք:

- Տարբեր ընտրություններ են: Այսօր համայնքի ղեկավարումը ստանձնելու համար 10 ուժ է հայտ ներկայացրել, ու բնակիչները պետք է այդ 10-ի մեջ ընտրեն:

- Ուժերից որևէ մեկի հետ կոալիցիա կազմելու պայմանավորվածություն արդեն ունե՞ք:

- Պայմանավորվածություն չկա որևէ ուժի հետ, սակայն մեր թիմի հաղթանակի դեպքում մենք պատրաստ ենք համագործակցել տարբեր ուժերի հետ: Ես համոզված եմ, որ բոլոր ուժերի մեջ էլ կան պրոֆեսիոնալ, պոտենցիալ ունեցող մարդիկ:

- Իսկ եթե չընտրվեք ու Ձեզ առաջարկե՞ն:

- Այս պահին նման հարց չենք քննարկել: Ընտրություններից հետո կտեսնենք:

- Այսինքն՝ չի բացառվո՞ւմ:

- Քաղաքականության մեջ ոչինչ չես կարող բացառել:

- Ընտրություններին մասնակցելու հայտ ներկայացրած ուժերի մեջ կա՞ մի ուժ, ում հետ խմբակցությունն առհասարակ կոալիցիա չի կազմի:

- Այս պահին չեմ կարող այդ հարցին պատասխանել, քանի որ նման քննարկում թիմի ներսում չի եղել:

- Պարոն Այվազյան, ինչպես հայտնի է, նախորդ ընտրությունների ժամանակ «Լուսավոր Հայաստան»-ը հուշագիր ստորագրեց 3 ուժերի հետ, սակայն հուշագիրն ստորագրած մյուս կողմերի ավագանու 4 անդամ «դավաճանեցին» ձեզ՝ իրենց ձայնը տալով Վանաձորի նախկին համայնքապետ Մամիկոն Ասլանյանին: 5 տարի անց, ի վերջո, գտա՞ք դավաճաններին:

- Այդ պրոցեսները տեղի են ունեցել հանրության աչքի առաջ, և հասրակաությունը կարող է այդ գնահատականը տալ:

- Բայց չէ որ Ձեզ էին դավաճանել, չունե՞ք մտավախություն, որ հնարավոր է՝ կրկին դավաճանեն:

- Եթե հիշում եք, նախորդ անգամ փակ քվեարկություն էր, և դրանից ելնելով՝ 4 մարդ քվեարկեց մյուս ուժի օգտին: Այս անգամ քվեարկությունը լինելու է բաց:

- Ամեն դեպքում, դավաճանողներին գտա՞ք, թե՞ ոչ:

- Ես որևէ մեկին անձնապես չեմ կարող կասկածել կամ դավաճան համարել: Ես չեմ կարող ասել, որ այս, այս, այս մարդիկ դավաճանել են, բայց կարող եմ ասել՝ անտրամաբանական է, որ մեր թիմակիցները գնային նման քայլի: