Ովքեր են Ազգային ժողովում ամենաշատ բացակայած, պասիվ, նախաձեռնող, ելույթ ունեցող, նախագծերին դեմ քվեարկած պատգամավորները

Գրեթե 8 ամիս է, ինչ 8-րդ գումարման Ազգային ժողովը սկսել է աշխատանքները: Թեև դրանց մեկ տարին էլ չի բոլորել, սակայն այն արդեն լեցուն է բավականին հիշարժան պահերով՝ վեճեր, շշերի նետում, ընդդիմադիրների բոյկոտ, փոխադարձ վիրավորանքներ և այլ իրադարձություններ:

Այս ամենին զուգահեռ, սակայն, նորընտիր խորհրդարանը քննարկումներ է ունենում, ընդունում կամ մերժում օրենքի նախագծեր և այլն:

«Հայկական ժամանակ»-ը, parlamentmonitoring.am կայքի տվյալները վերլուծելով, անդրադարձել է այս գումարման խորհրդարանի աշխատանքներին՝ ներկայացնելով, թե ովքե՞ր են ամենաակտիվ կամ պասիվ պատգամավորները, ովքե՞ր են սիրում ելույթ ունենալ, իսկ ովքե՞ր՝ ոչ, ովքե՞ր են նախագծեր մշակում և ովքե՞ր՝ ուղղակի բացակայում նիստերից:

Այսպիսով՝ խորհրդարանական նիստերից ամենից շատ բացակայողների տասնյակը գլխավորում է «Հայաստան» խմբակցության պատգամավոր Արմեն Չարչյանը (113 բացակա), որը կալանավորված էր 2021 թվականի օգոստոսից մինչ դեկտեմբերը: Չարչյանը մեղադրվում է իր ղեկավարած հիվանդանոցի աշխատակիցներին հունիսի 20-ի ընտրություններին մասնակցելուն հարկադրելու համար:

2-րդ հորիզոնականում նույն խմբակցության պատգամավոր Մխիթար Զաքարյանն է, որը նույնպես կալանավորված էր 2021-ի հուլիսից-դեկտեմբեր ամիսները: Զաքարյանը մեղադրվում է խուլիգանություն կատարելու համար։ Նա բացակայել է նիստերից 112 անգամ:

Երրորդը ԱԺ փոխխոսնակ Իշխան Սաղաթելյանն է, որը, չնայած կալանավորված չի եղել,  սակայն նիստերից բացակայել է 105 անգամ:

Չորրորդն Արթուր Սարգսյանն է, կրկին «Հայաստան» խմբակցությունից: Նա նույնպես կալանավորված էր հուլիս-դեկտեմբեր ամիսներին: Սարգսյանին մեղադրանք է առաջադրվել ՀՀ քրեական օրենսգրքի 308-րդ հոդվածի 2-րդ մասով (պաշտոնեական լիազորությունները չարաշահելը) և 314-րդ հոդվածի 1-ին մասով (պաշտոնեական կեղծիք)։ Նա բացակայել է նիստերից 95 անգամ:

5-րդը անկախ պատգամավոր Իշխան Զաքարյանն է: Նա նիստերից բացակայել է 76 անգամ: Հիշեցնենք, որ Զաքարյանը «Պատիվ ունեմ» խմբակցությունից դուրս եկավ տարեվերջին:

Իսկ ահա վեցերորդ ամենից շատ բացակայող պատգամավորը «Քաղաքացիական պայմանագիր» խմբակցությունից Դավիթ Դանիելյանն է (73 բացակա): 7-րդը նույնպես իշխող խմբակցության պատգամավոր է՝ Խաչատուր Սուքիասյանը: Նա բացակայել է 72 անգամ: Նկատենք, որ նույնքան բացակայել է նաև «Պատիվ ունեմ» խմբակցության ղեկավար Արթուր Վանեցյանը:

65-ական անգամ էլ նիստերից բացակայել են «Հայաստան» խմբակցության պատգամավորներ Արթուր Ղազինյանը և Աշոտ Սիմոնյանը:

«Հայաստան» խմբակցությունը առաջատար է նաև ելույթ ունեցողների թվով:

ԱԺ 8-րդ գումարման ամենից շատ ելույթ ունեցող պատգամավորը «Հայաստան» խմբակցությունից Արամ Վարդևանյանն է (15 ելույթ): Երկրորդը «Քաղաքացիական պայմանագիր» խմբակցության պատգամավոր Վահագն Ալեքսանյանն է (14 ելույթ):

3-րդը, 4-րդը և 5-րդը կրկին ընդդիմադիր խմբակցության պատգամավորներն են՝ Արծվիկ Մինասյանը, Թադևոս Ավետիսյանը և Արթուր Խաչատրյանը, համապատասխանաբար՝ 13 և 9-ական ելույթներ: Գեղամ Մանուկյանն էլ շարքում 7-րդն է՝ 7 ելույթ:

«Քաղաքացիական պայմանագիր» խմբակցությունից ակտիվ է նաև Արմեն Խաչատրյանը: Վերջինս ելույթ է ունեցել 8 անգամ: Գործընկերոջը չեն զիջում նաև Գևորգ Պապոյանը՝ 7 ելույթ, Սերգեյ Բագրատյանը և Վիգեն Խաչատրյանը՝ 6-ական ելույթներ:

Ամենահետաքրքրասեր ու հարցեր սիրող պատգամավորն էլ Սերգեյ Բագրատյանն է: Վերջինս իրեն հետաքրքրող 11 հարց է հնչեցրել նիստերի ընթացքում: Հետաքրքրասեր է նաև Արամ Վարդևանյանը (9 հարց): Երրորդ «հարցախեղդ» անողն էլ «Հայաստան» խմբակցության պատգամավոր Թադևոս Ավետիսյանն է (8 հարց):

Նախագծեր հեղինակել այս խորհրդարանն այդքան էլ չի սիրում: Այս ընթացքում խորհրդարան բերված նախագծերի 87,7 տոկոսը հեղինակել է ՀՀ կառավարությունը, և միայն 12,3 տոկոսն են հեղինակել ԱԺ պատգամավորները:

Նախագծերը, որոնք բերվել և ամբողջությամբ արդեն ընդունվել են Ազգային ժողովի կողմից, հիմնականում հեղինակել են «Քաղաքացիական պայմանագիր» խմբակցության պատգամավորները:

Ամենից շատ նախագիծ հեղինակած պատգամավորների առաջին հորիզոնականում է ՔՊ պատգամավոր Վահագն Հովակիմյանը (8 նախագիծ), երկրորդը՝ Վլադիմիր Վարդանյանը (5 նախագիծ): Երրորդ տեղում Արթուր Հովհաննիսյանը, Թագուհի Ղազարյանը և Սարգիս Խանդանյանն են, յուրաքանչյուրը՝ 3-ական նախագիծ:

Նախագծերին դեմ քվեարկելով հիմնականում աչքի են ընկել ընդդիմադիր խմբակցությունների պատգամավորները:

Այսպիսով՝ ամենից շատ դեմ քվեարկված պատգամավորների հնգյակը բաղկացած է միայն «Հայաստան» խմբակցության պատգամավորներից: Գեղամ Նազարյան՝ 38, Անդրանիկ Թևանյան՝ 37, Արամ Վարդևանյան՝ 34, Զեմֆիրա Միրզոևա՝ 34 և Արմենուհի Կյուրեղյան՝ 32:

Ամենից շատ կողմ քվեարկողներն էլ իշխող խմբակցության պատգամավորներ են եղել: Հնգյակն այպիսինն է՝ Հրաչյա Հակոբյան, Հովիկ Աղազարյան, Մարիա Կարապետյան, Լիլիթ Ստեփանյան և Մարինա Ղազարյան: Բոլորը՝ 123 անգամ:

Ձեռնպահները ևս միմյանց մեջ կիսել են երկու ընդդիմադիր խմբակցությունները. առաջինը՝ «Պատիվ ունեմ»-ի պատգամավոր Աննա Մկրտչյանն է (50 ձեռնպահ), հաջորդը 37-ական ձեռնպահներով «Հայաստան» խմբակցության պատգամավոր Աղվան Վարդանյանն ու «Պատիվ ունեմ»-ից  Տարոն Մարգարյանն են: Հաջորդ երկուսը «Հայաստան» խմբակցությունից են. Էլինար Վարդանյանը (36 ձեռնպահ) և Արամ Վարդևանյանը (35 ձեռնպահ):