ՀՀ վարչապետի հանձնարարականով Գյումրիում տնակների թվի վերջնական հստակեցում է իրականացվում. Շիրակի մարզպետ (լուսանկարներ)

34 տարի Գյումրու ավտոկայանի 104 տնակային ավանի երկաթե տնակներում ապրող, երկաթից ամուր նյարդեր ու քայքայված առողջություն ունեցող գյումրեցիների հյուրերն այսօր ԱԺ «Քաղաքացիական պայմանագիր» խմբակցության պատգամավորներն էին: Եկել էին՝ տեղում խնդիրներին ծանոթանալու, լուծման տարբերակները մշակելու:

Տնակներից ձերբազատում, վթարային և վթարավտանգ շենք-շինություններում առկա խնդիրների գույքագրում, դրանց կարգավիճակի, ինչպես նաև՝ անօթևանների թվի հստակեցում, խնդրի կարգավորման տարբերակների քննարկում:

«Քաղաքացիական պայմանագիր» խմբակցության ղեկավար Հայկ Կոնջորյանի գլխավորությամբ Գյումրի այցելած պատգամավորական խումբն այս հարցերի պատասխանների որոնման հնարավորությունները հստակեցնելու նպատակով այցելեցին նաև Տիգրան Մեծի 5, Իսահակյան 9-րդ, Անտառավան 26 վթարային շենքեր: Երեքն էլ 3-րդ աստիճանի վթարայնություն ունեն, բնակեցված են։

Ընդհանուր առմամբ, Շիրակի մարզում 91 վթարային շենք-շինություն կա, որոնցից 88-ը Գյումրիում է գտնվում: Կառավարության հնգամյա ծրագրում 3-րդ և 4-րդ աստիճանի վթարային շենքերի վերակառուցման հարցն ընդգրկված է, խնդրի լուծման ուղղությամբ քայլեր ձեռնարկվում են։

Այս պահին կիսափուլ Տիգրան Մեծի 5 շենքում 8 ընտանիք է բնակվում, փլվող ամեն բնակարանի հետ շենքի մյուս բնակիչները հեռացել են: Ապրում են կա՛մ բարեկամների տանը, կա՛մ վարձակալած բնակարաններում: Այս շենքը ենթակա է ամրացման-վերականգնման:

«Մեկ շքամուտքն ամրացված է, մյուսների մասով որևէ բան արված չէ: Այս շենքի մասով տրամադրվածությունները և մոտեցումները, նաև քաղաքաշինության կոմիտեի նախագահի, որը վերջերս էր այցելել Գյումրի, հանգում են շենքի ամրացման գործընթացին:

Կան շենքեր էլ, որոնք քանդման են ենթակա, և անօթևանության խնդրի լուծումը տվյալ շենքերի բնակիչների համար լինելու է բնակարանի գնման վկայագրի տրամադրումը: Օրինակ՝ Անտառավան 26 շենքը»,- մանրամասնեց մարզպետը:

Պատգամավորները եղան նաև Իսահակյան 9 շենքում: Այստեղ բնակիչները դեմ են շենքի քանդմանը և բազմաթիվ անգամ մերժել են ԲԳՎ-ի տրամադրման առաջարկները: Որպես տարբերակ նշում են նույն տեղում նոր շենքի կառուցման հնարավորությունը:

«Քաղշինկոմիտեի նախագահի հետ այցելել ենք այստեղ, հանդիպել բնակիչների հետ, բայց իրենց հարցը դեռ քննարկման փուլում է, վերջնական ոչինչ այս պահին ասել չեմ կարող»,-  «Հայկական ժամանակի» հետ զրույցում ասաց Շիրակի մարզպետարանի քաղաքաշինության վարչության պետ Խաչատուր Խնձրցյանը:

Իսահակյան 9-ում այս պահին 26 ընտանիք է ապրում:

Ներկա պահին, ՀՀ վարչապետի հանձնարարականով, Շիրակի մարզպետարանը Գյումրու համայնքապետարանի հետ ամբողջացնում են տնակների թիվն ու տվյալները: Մարզպետ Նազելի Բաղդասարյանը տեղեկացրեց, որ տնակների թվի նվազում են արձանագրել: Դրանց թիվը պակասել է 30-ով:

«Մոտավորապես 2769 տնակ կա Գյումրիում, հստակեցման աշխատանքները կամփոփվեն մարտի 10-ին: Ժամկետի ավարտին կունենանք հստակ թիվ: Պետությունը պարտավորվածություն չունի 88-ի երկրաշարժի հետևանքով անօթևան մնացած ընտանիքների նկատմամբ, սակայն եթե ՀՀ քաղաքացին անօթևան է, ապա փուլային լուծման պարագայում որևէ ժամանակահատվածում իր խնդիրը ևս լուծվելու է: Այո, կան ընտանիքներ, որոնք անօթևանի կարգավիճակ չունեն, կան ընտանիքներ, որոնք բնակարան ունեցել, բայց վաճառել են: Մենք այստեղ տնակների թիվն ենք ֆիքսում և խնդիր ունենք Գյումրին ազատել տնակներից, սա է մոտեցումը»,- ասաց Նազելի Բաղդասարյանը:

Գյումրին տնակներից ազատելու և անօթևանության խնդիրը հավանաբար լուծվելու է սոցիալական բնակարանների տրամադրման ճանապարհով: Նազելի Բաղդասարյանը լրագրողների հետ զրույցում փաստեց, որ նախորդ տարիներին, երբ անօթևան ընտանիքներին բնակարաններ են հատկացվել, տնակների քանդման ակտեր չեն եղել, և տնակային թաղամասերն այդ կերպ մնացել են:

Տնակների հաշվառման գործընթացի վերջնաժամկետը մարտի 10-ն է:

Այցի շրջանակներում պատգամավորներն այցելեցին նաև «Գյումրի» բժշկական կենտրոն, Շիրակի պետական համալսարան և Արտաքին տնտեսական գործունեության կենտրոն: Շիրակի մարզում աշխատանքային մեկ օրը պատգամավորներն ավարտեցին Աշոցքի «Կոճոռ» թաղամաս և Արթիկի թիվ 1 և թիվ 2 դպրոցներ այցով: