Քրեաօլիգարխիայից մնացել է մեկ կտոր, որը փորձում է հիշեցնել տալ իրեն. քաղաքագետը՝ ընդդիմության և դրա պարագլուխների մասին

Քաղաքագետ Ռուբեն Մեհրաբյանի կարծիքով՝ խորհրդարանական ընդդիմությունը ինքնաոչնչացման ճանապարհին է՝ փորձելով վարկաբեկել նաև ժողովրդավարությունը Հայաստանում: 

Վերջինս «Հայկական ժամանակ»-ի հետ զրույցում նշում է, որ Նիկոլ Փաշինյանի հեռացումը ոչ ընտրական ճանապարհով ցանկացող ընդդիմությունը միանշանակ ձախողելու է իր պայքարը, քանի որ որևէ կերպ չունի հանրային աջակցություն:

«Ընդդիմությունը ոչ ընտրական ճանապարհով է ցանկանում իշխանության գալ, սակայն իրենց ցանկությունները ապահովված չեն: Նրանք պարզապես ցանկանում են կեղտոտել իշխանությանը և ժողովրդավարությունը, որը ձեռք է բերվել տասնամյակների և զրկանքների գնով»,- ասում է Մեհրաբյանը:

Ըստ քաղաքագետի՝ ընդդիմության ցանկությունների և տեղի ունեցող իրականության մեջ առկա են բազմաթիվ սկզբունքային անհամապատասխանություններ: Քաղաքագետը փաստում է՝ ժողովրդի կողմից բոլոր տեսանկյուններից մերժվածները որևէ աջակցության չեն արժանանում, դրա վառ ապացույցն այն դեպքերն են, երբ փակում են ճանապարհներ, սակայն դրանք բացում են ՀՀ քաղաքացիները:

«Որքան էլ ոստիկանությունն իր լիազորությունների շրջանակներում կատարում է համապատասխան գործողություններ, սակայն հաճախ քաղաքացիներն են բացում փողոցը, անգամ վիրավորում և վռնդում ճանապարհը փակածներին: Ընդ որում՝ դա անում է այն ժողովուրդը, որը 4 տարի առաջ ինքն էր ճանապարհ փակում»,- նշում է քաղաքագետը՝ հավելելով, որ ոստիկանությունն էլ իր հերթին է փայլուն կատարում գործառույթները:

Դիտարկմանը, որ ընդդիմությունը փորձում է ընդօրինակել Նիկոլ Փաշինյանի՝ 2018 թվականի իրականացրած հեղափոխության ոճը, Իշխան Սաղաթելյանն էլ կարծես թե փորձում է ընդօրինակել Փաշինյանի հեղափոխական կերպարը, հարցադրմանը՝ ինչո՞ւ են ընտրել պայքարի այս մարտավարությունը, Մեհրաբյանը նկատում է՝ ընդդիմության ներկայացուցիչն ու այն ժամանակվա հեղափոխական կերպարը միմյանց հետ համեմատվել չեն կարող:

«Նիկոլ Փաշինյանը իշխանությանը չէր վիրավորում: Այդ մարդն էլ չի կարող նմանվել Փաշինյանին, որովհետև քաղաքական ծագումնաբանության առումով հակոտնյա են: Հետևաբար փորձերը անիմաստ են. հնարավոր չէ այս աստիճան թերագնահատել քաղաքացիների մտավոր ունակությունները»,- ասում է զրուցակիցը:

Ընդդիմության ներկայացուցիչների մտածողությունն այլասերված է, նշում է Մեհրաբյանը: Նրա խոսքով այդ մարդիկ շարունակում են առաջնորդվել այն քաղաքականությամբ, որով տարիներով առաջնորդվում էր Հայաստանի քրեաօլիգարխիկ ռեժիմը. «Մտածում են՝ հիմա էլ իրենք հոգեխանգարում սարքեն, կարող է հաջողվի, բայց չեն գիտակցում, որ իրենց ունակությունները չեն հերիքում իշխանափոխության կամ այլ միջոցների հասնելու համար: Ինչ տեխնոլոգիա էլ կիրառեն, մեկ է, ոչ մի արդյունքի չեն հասնելու: Տեխնոլոգիան չի կարող դատարկ տեղը հեղափոխություն իրականացնել: Այն կարող է արհեստական իրավիճակներ ստեղծել, սակայն դրանք շատ արագ փլուզվում են, որին մենք ականատես եղանք անցած օրերի ընթացքում»:

Ըստ Մեհրաբյանի՝ Հայաստանում նախկին քրեաօլիգարխիկ ռեժիմից մնացել է ընդամենը մեկ սեգմենտ, որը մերթընդմերթ փորձում է հիշեցնել իր գոյի մասին: «Իրենք երբեմն այսպես կհայտնվեն, քանի նրանց գողացված նյութական բազան պահպանվում է»,- ասում է քաղաքագետը:

Անդրադառնալով Ռոբերտ Քոչարյանի և Սերժ Սարգսյանի գործողություններին ներկա գտնվելու, սակայն հրապարակային միմյանց հետ չառնչվելու փաստին՝ Մեհրաբյանն ընդգծում է. «Երկու նախկին ղեկավարներին այս ամենի մեջ միավորում է կորցրածը վերադարձնելու մոլուցքը և «ամեն ինչ թույլատրելի է» սկզբունքը»:

Քաղաքագետի կարծիքով՝ ներքաղաքական իրավիճակի հանգուցալուծումը գուցե լինի այն, որ առաջանա սաբոտաժի խնդիր, ինչի հետևանքով անհնար դառնա երեք ուժերի միասին աշխատելը:

«Ինչ երեսով են գնալու Ազգային Ժողով, գնալու են՝ ի՞նչ ասեն կամ անեն, ինչպե՞ս են բարևելու իրենց գործընկերներին, չեմ պատկերացնում: Գուցե անգամ բանը հասնի նրան, որ իշխանությունը եզրահանգի՝ մեզ անհրաժեշտ են նոր ընտրություններ, քանի որ առկա խորհրդարանում ուժերի դասավորությունը չի արդարացնում հանրության նախապատվությունները: Իրերի նման դասավորության պարագայում ես կարծում եմ, որ նրանք կանցնեն անցյալի գիրկը և խորհրդարանում այլևս տեղ չեն ունենա»,- ասում է քաղաքագետը:

Մերի Խաչատրյան