Նիստ չենք գումարել. Խաժակյանը՝ վարչապետից պաշտոնների՝ գայթակղիչ առաջարկներ ստանալու խոսակցությունների մասին

Այսօրվա ընդդիմադիրները, բացի խաբեբայությունից, այլ զբաղմունք չունեն, որը տեսանելի է «Հայրենիք» կուսակցության անդամ Արսեն Բաբայանի վարքագծով:

Անդրադառնալով Արսեն Բաբայանի գրառմանը, ըստ որի՝ «Լուսավոր Հայաստան» կուսակցության ղեկավար, ՀՀ հատուկ հանձնարարություններով դեսպան Էդմոն Մարուքյանը երեկ կուսակցության կառավարման խորհրդի նիստ է անցկացրել և հայտարարել, թե Նիկոլ Փաշինյանից ստացել է պաշտոնների շատ գայթակղիչ առաջարկություն, որից օգտվելու են կուսակցության կառավարման խորհրդի բոլոր անդամները և բազմաթիվ լուսավորականներ՝ «Հայկական ժամանակի» հետ զրույցում ասում է ԼՀԿ անդամ Դավիթ Խաժակյանը:

Վերջինիս խոսքով՝ Էդմոն Մարուքյանը մի քանի օր է՝ ՀՀ-ում չէ և չէր կարող երեկ կառավարման խորհրդի նիստ հրավիրել և նման հայտարարություններ անել. «Երկու շաբաթ է՝ մենք կառավարման խորհրդի նիստ չենք գումարել և նման հարց չենք քննարկել»:

Հարցադրմանը, իսկ եթե նման առաջարկ ստանան, ի՞նչ դիրքորոշում ունեն, ԼՀԿ անդամը նկատում է՝ առաջարկ չեն ստացել, որպեսզի քննարկեն: «Մենք մեր տեսակետները բաց ասում ենք, ասում ենք՝ որ հարցում ինչ քաղաքականության կողմնակից ենք: Էդմոն Մարուքյանն այսօր զբաղեցնում է ՀՀ հատուկ հանձնարարություններով դեսպանի պաշտոնը, նշանակում է՝ մենք համարում ենք, որ արտաքին քաղաքականության մեջ ունենք անելիք և հակասություն չենք տեսնում իշխանության գործողությունների հետ»,- ընդգծում է զրուցակիցը:

Խաժակյանի խոսքով՝ ընդդիմադիրները, այսպես ասած, սրերով ընդունեցին Մարուքյանի նշանակումը, քանի որ նրանք ունեն մեկ քաղաքականություն՝ ապացուցել, որ երկրի վիճակը շատ վատ է և որքան վատանա, իրենց համար ավելի լավ:

«Հասկանում են՝ որևէ փորձառու պաշտոնյա, որը կներգրավվի այս Կառավարության մեջ, կլուծի ինչ-որ խնդիր, որոնք առաջացել են, ինչն էլ իրենց ձեռնտու չէ, քանի որ այդ պարագայում ընդդիմությունը չի կարողանա հիմնավորել, որ իրենք ամենավատ իշխանությունը չէին: 4 տարի շարունակ զբաղված են նրանով, որ ապացուցեն, թե այս իշխանություններն իրենցից վատն են, ինչն էլ, բնականաբար, չի հաջողվում»,- նշում է նա:

Երևանի ավագանու անդամի պնդմամբ՝ ժողովուրդն ունի հիշողություն և լավ է հիշում բոլոր այն պատճառները, որի արդյունքում 2018-ին տեղի ունեցավ հեղափոխությունը. «Իհարկե, 44-օրյա պատերազմից հետո իշխանության վարկանիշն անկում է ապրել, բայց միանշանակ նախկինները ներկաներին չեն կարող փոխարինել. ներկա իշխանությունը որքան վատը պետք է լինի, որ ներկաները գան իրենց փոխարեն»:

Անդրադառնալով մեկ ամսից ավելի ընդդիմության՝ Ֆրանսիայի հրապարակում նստացույց իրականացնելուն՝ Խաժակյանն ասում է՝ ընդդիմադիրները ցանկանում են, որ իշխանությունը ուժի գործադրմամբ իրենց հանի հրապարակից, սակայն իշխանությունը որդեգրել է այնպիսի քաղաքականություն, որը ընդդիմությանը մինչև վերջ խայտառակելու է:

«Այո, շատ քաղաքացիներ ցանկանում են, որ ընդդիմությունը վերջապես ավարտի իր ակցիաները, քանի որ դրանք խաթարում են մարդկանց բնականոն կյանքը: Սակայն իշխանությունը չպետք է օգնի նրանց փրկվելու և խորհրդարան վերադառնալու հարցում: Եթե իրենք որոշել են խայտառակվել մինչև վերջ, ապա պետք է թողնել, որ հանգիստ անեն դա: Մարդիկ, որոնք իրենց ընտրել են, հենց իրենք էլ որոշել են, որ տևական ժամանակով քաղաքի բանուկ փողոցները պետք է փակ լինեն: Համարենք՝ սա այն գինն է, որ 300 հազար հոգի գնաց և ընտրություններին ընտրեց այս ընդդիմությանը: Չնայած նրանք էլ չեն գնում այս ընդդիմության հետևից, քանի որ ամեն օր մի բան հայտարարում են, ու դա չի կատարվում: Որքան կարելի է ստով մարդկանց հրապարակ բերել»,- ասում է նա:

Խաժակյանի կարծիքով՝ այն, ինչ հիմա անում է ընդդիմությունը, ժամավաճառություն է:

«Իրենց ամենամեծ հանրահավաքը եղել է մայիսի 2-ին, երբ հավաքվել է 10 հազար մարդ: Ստացվում է, որ ընդդիմության ընտրողների 10 տոկոսն էլ հիմա չի գալիս կողքներին կանգնի: Սա է նրանց գնահատականը: Հիմա էլ տեսնում են՝ փողոցում ոչինչ չի հաջողվում, փորձում են խորհրդարան վերադառնալ, ինչի առաջին քայլն էլ վաղվա արտահերթ նիստն է: Դա ընդամենը պատրվակ է, որպեսզի կարողանան իրենց գործողություններին իմաստ հաղորդել: Դա էլ չի հաջողվելու»,- համոզված է ԼՀԿ անդամը:

Անյուտա Աթանեսյան