Համերգային հրավառություն Վարդանանց հրապարակում. Գյումրու օրն ավարտվել է «Սիմֆոնիկ-Ռեինկարնացիա» մեծ համերգով

Ֆանտաստիկ տրամադրություն և լուսաձայնային հրավառություն Գյումրու Վարդանանց հրապարակում: «Գյումրու տոնին» մայրաքաղաքն սպասված նվեր էր բերել: «Երևանի օրերը Գյումրիում» միջոցառման շրջանակներում տոնի երեկոն ամփոփվեց «Սիմֆոնիկ-Ռեինկարնացիա» մեծ համերգով:

Օրվա առիթով, ի թիվս այլ հյուրերի, Գյումրիում էին ՀՀ փոխվարչապետ Համբարձում Մաթևոսյանը, էկոնոմիկայի նախարար Վահան Քերոբյանը, Կառավարության այլ անդամներ, ԱԺ պատգամավորներ:

Մինչ համերգի մեկնարկը՝ հնչեցին Գյումրու, այնուհետև՝ Երևանի օրհներգերը, ելույթներով հանդես եկան ՀՀ փոխվարչապետը, Շիրակի մարզպետը, Գյումրու և Երևանի քաղաքապետները, ՀՀ տարածքային կառավարման եւ ենթակառուցվածքների նախարարը:

«Այս տոնի իրական հերոսները դուք եք, դուք եք ապրեցնում, նոր գույն ու շունչ հաղորդում քաղաքին, ձեր յուրահատուկ հումորով լավատեսություն ու բարձր տրամադրություն փոխանցում քաղաքի հյուրերին, ովքեր Գյումրուց հեռանում են՝ մտքում անպայման ունենալով վերադառնալու ցանկություն»,- ներկաներին դիմեց փոխվարչապետ Համբարձում Մաթևոսյանը:

Ըստ նրա՝ Գյումրին հպարտություն և ուժ է։ Դրա շնորհիվ է գյումրեցին կարողանում այդքան փորձությունների միջով անցնելուց հետո կրկին գրկաբաց ու ժպիտով դիմավորել ամենքին։

«Այսօր էլ՝ մարտահրավերներով լի այս ժամանակահատվածում, մենք արարում ենք, նոր քար ավելացնում ստեղծածին, կառուցում ու շենացնում ենք Հայաստանը՝ դրանով իսկ ցույց տալով մեր սերն առ հայրենիք։

Ընդամենը երկու օր առաջ մարզային այցով կրկին Շիրակում էի։ Շրջում էինք ակտիվ շինհրապարակներում՝ բարեկարգվող «Բարեկամության» այգում, նոր կառուցվող դպրոցի, մանկապարտեզի, սպորտային համալիրի, ասֆալտապատվող ճանապարհների տարածքում։ Օրս համարեցի ստացված, հատկապես մի զրույցից հետո, երբ դպրոցի նոր մասնաշենքի կառուցման աշխատանքներում ներգրավված շինարարից իմացա, որ տարիներ շարունակ այլ երկրներում աշխատելուց հետո ընկերներով որոշել են վերադառնալ հայրենիք ու Հայաստանում շարունակել իրենց աշխատանքը։

Շատ եմ ցանկանում, որ այս օրինակը լինի վարակիչ, որ Հայաստան վերադարձողների, մայր հողում իրենց ապագան տեսնող և կերտող հայրենակիցների թիվը տարեցտարի ավելանա։ Դրան կարող ենք հասնել մենք նվիրված աշխատանքի, մեր հողն ու ջուրը սիրելու, պահպանելու ու հայրենիքը շենացնելու միջոցով»,- ասաց փոխվարչապետը։

Շիրակի մարզպետ Նազելի Բաղդասարյանն էլ ներկայացրեց ՀՀ կառավարության կողմից առաջիկայում մարզում իրականացվելիք աշխատանքները:

«Առանձնակի հպարտությամբ պետք է նշեմ, որ հետհեղափոխական Գյումրին հիմա փոխվել է, Կառավարությունն իր ձեռքը և հայացքն ուղղել է դեպի հայրաքաղաք, և հատկապես վերջին տարիներին մեծածավալ աշխատանքներ են ընթանում քաղաքում։ Ընթացիկ տարում Կառավարության և համայնքի համատեղ ջանքերով Գյումրիում իրականացվելու է 3 մլրդ 400 մլն դրամի ծրագիր, ավելին՝ կապիտալ շինարարության առումով Գյումրիում 2022 թվականին նախատեսված է 7 մլրդ դրամի ծրագիր, հանրագումարում՝ ավելի քան 10 մլրդ դրամի ծրագիր մեր սիրելի քաղաքին։

Վստահ եմ, որ 2023-ին հնարավորություն ունենք այս թվերը մեծացնելու»,- ելույթի իր խոսքում տեղեկացրեց մարզպետն ու շեշտեց. «Կրկին արձանագրում և ընդգծում եմ, որ Գյումրիում ապագա կա, և այն կերտելու ենք միասին»:

Ելույթներ ունեցան նաև քաղաքապետները, ՏԿԵ նախարարը: Այնուհետև հերթը «Սիմֆոնիկ-Ռեինկարնացիայինն» էր:

Առաջին հնչյուններից սկսած՝ տոնախմբության մասնակիցները մեծ ջերմությամբ ընդունեցին հյուրերին: Համերգի միջնամասում բոլորի համար անսպասելի, տեղերում պարողներին ի հակադրություն, Երևանի քաղաքապետ Հրաչյա Սարգսյանը սկսեց պարել և բոլորին հրավիրել պարի:

Համերգը ձգվեց գրեթե մինչ կեսգիշեր: Երաժիշտների՝ համերգն ավարտելու փորձերը մի քանի անգամ ձախողելուց հետո Գյումրին հյուրերին ճանապարհեց մեծ ցնծությամբ՝ նոր հանդիպման ակնկալիքով:

Սամսոն Մատինյան