Կրակային պատրաստություն, մարտավարություն ռազմամարզական ճամբարում․ 11-րդ դասարանցիները 10 օր իրենց կզգան բանակում

Հանրակրթության նոր չափորոշչով նախնական զինվորական պատրաստություն առարկայից (ՆԶՊ) պարտադիր է դառնում գործնական բաղադրիչը։ Այսուհետև դպրոցներում սովորողները ուսուցանելու են ոչ միայն տվյալ առարկայի տեսական մասը, այլ նաև գործնական գիտելիքներ են ստանալու 10-օրյա ռազմամարզական ճամբարում։

Այն գործելու է միայն 11-րդ դասարաններում սովորող տղաների ու աղջիկների համար։ Նախնական ճամբարի գաղափարը փորձարկվելու է Տավուշի մարզի 11-րդ դասարանցիների համար: Մյուս ուսումնական տարվանից դառնալու է պարտադիր բոլոր 11-րդորդցիների համար։

ԿԳՄՍՆ հանրակրթության վարչության պետ Արսեն Բաղդասարյանը «Հայկական ժամանակի» հետ զրույցում մանրամասնում է՝ ճամբարի կառուցվածքը Հայաստանի Հանրապետության զինված ուժերի բանակի գնդի հաշվարկով է կազմված, ճամբարային կյանքն էլ կլինի այնպես, ինչպես բանակում է: Զորամասերի նման ճամբարում երեխաները կունենան գնդի հրամանատար, խմբերը կազմված կլինեն երեք ստորաբաժանումից՝ երկու գումարտակ, մեկ դիվիզիոն:

«11-րդ դասարանի պատանիները գործնական պարապմունքներ կանցնեն ճամբարում, օրինակ՝ կրակային պատրաստություն, տեղանքի կողմնորոշում, քարտեզագրություն, առաջին բուժօգնություն։ Կուսումնասիրեն և կծանոթանան տարբեր սարքավորումների։ Կհասկանան՝ անտառներում մոլորվելու դեպքում ինչպես կողմնորշվեն, այդ պահին իրենք որ մասում են գտնվում և այլն, և այլն: Այսինքն՝ այնպիսի բաներ են սովորելու, որոնք ոչ միայն պատերազմական իրավիճակում են անհրաժեշտ, այլ նաև կյանքի տարբեր իրավիճակներում։ Օրինակ՝ գնում են արշավի և մոլորվում, ձեռք բերված գիտելիքով կհասկանան՝ ինչպես վարվել նման դեպքում»,- ասում է Բաղդասարյանը։

Երբ ճամբարը պարտադիր լինի սովորողների համար, նախատեսվում է, որ դրա յուրաքանչյուր գումարտակում և դիվիզիոնում կլինի 100 աշակերտ: Գումարտակն էլ իր հերթին կազմված կլինի 25-ական աշակերտով չորս վաշտից և այլն: Ճամբարում գործելու են ներքին կարգապահական կանոններ, որոնք պարտադիր կլինեն բոլոր մասնակիցների համար, եւ այդ կանոնները խախտողները կենթարկվեն կարգապահական տույժերի, ընդհուպ՝ մինչեւ ճամբարից կհեռացվեն: Կարգապահական կանոնները հաստատելու է ճամբարի պետը՝ օգտվելով բանակում գործող կանոնագրքերից:

10-րդ դասարանը ավարտած և 11-րդ դասարան փոխադրվող տղաներն ու աղջիկները ճամբարին մասնակցելու են ամառային ամիսներին՝ դասերից հետո։ Մինչ այս փորձարկումը՝ ճամբարը ևս մեկ փորձարկում էլ է անցել, որին մասնակցել է 100 աշակերտ։ ԿԳՄՍՆ հանրակրթության վարչության պետ Արսեն Բաղդասարյանի խոսքով՝ ճամբարի վերաբերյալ թե՛ ծնողների, թե՛ երեխաների կարծիքները եղել են դրական։

«Այդ փորձարկումից հետո որոշ լրամշակումներ արեցինք։ Այն երեխաները, ովքեր ինչ-ինչ պատճառներով չէին հասցրել մասնակցել, ցանկություն էին հայտնել ևս մեկ լրացուցիչ փուլի, որպեսզի կարողանան մասնակցել։ Ճամբարը հետարքրքիր և հագեցած ծրագիր ունի։ Այն հմտությունները, որոնք աշակերտները ձեռք են բերում, շատ կարևոր են»,- ընդգծում է նա։

Ռազմամարզական ճամբարի ընթացքում աշակերտները կուսումնասիրեն ինչպես ռազմարվեստի պատմություն, այնպես էլ՝ մարտավարություն: Ասենք, օրինակ, «Զինվորի տեղաշարժը մարտում հարձակման ժամանակ», «Զինվորը պաշտպանությունում», «Մարտավարական հնարքներ, ռազմական խորամանկություն, գաղտնապահություն», «Քողարկում», «Գիշերային մարտ: Մարտը եղանակային վատ պայմաններում», «Հակառակորդի դիպուկահարների և դիվերսիոն-հետախուզական խմբերի դեմ պայքարը», «Պայքար հակառակորդի տանկերի և զրահամեքենաների դեմ»:

Ճամբարի ուսուցողական կազմը լինելու է առարկան դասավանդող ուսուցիչները։ Ընտրվելու են դպրոցում դասավանդող զինղեկները, ինչպես նաև մասնագիտացված ուսումնական հաստատությունների մասնագետները, որոնք այդ դասապրոցեսն իրականացնում են տվյալ հաստատություններում։

«Կան որոշ բացառություններ․ ճամբարին կարող են չմասնակցել միայն այն երեխաները, որոնք, առողջական վիճակով պայմանավորված, ազատված են դպրոցում ֆիզկուլտուրա առարկայից»,- նշում է Բաղդասարյանը։

Ռազմամարզական ճամբարի կազմակերպման նպատակներից է սովորողների ֆիզիկական և բարոյահոգեբանական հատկանիշների բարձրացումը, տոկունության, դժվարին պայմաններում առաջադրանքների կատարման վճռականության ձևավորումը, զինվորական մասնագիտության նկատմամբ հետաքրքրության ձեւավորումը, անցանկալի և արատավոր դրսևորումների նվազեցումը միջանձնային հարաբերություններում, կարգապահության և պարտականությունների կատարման պատասխանատվության գիտակցման բարձրացումը:

Երբ հանրակրթության նոր չափորոշիչները ներդրված լինեն ՀՀ բոլոր մարզերում և Երևան քաղաքում, ապա 11-րդ դասարանցիները պետք է պարտադիր մասնակից լինեն 10-օրյա ռազմամարզական ճամբարին։