Նախնական արդյունքներով՝ որ ուժերն են հաղթանակ տարել երեկվա ՏԻՄ ընտրություններում, և ովքեր կլինեն նոր համայնքապետները

Երեկ՝ սեպտեմբերի 25-ին, տեղական ինքնակառավարման մարմինների համամասնական ընտրակարգով հերթական ընտրություններ էին անցկացվում Արագածոտնի, Գեղարքունիքի, Լոռու, Կոտայքի, Շիրակի, Սյունիքի, Վայոց ձորի և Տավուշի մարզերի 17 համայնքում, իսկ Արագածոտնի մարզի Ալագյազ համայնքում՝ մեծամասնական ընտրակարգով հերթական ընտրությունները: Նշված համայնքում ընթանում էին համայնքի ղեկավարի և ավագանու անդամների ընտրություններ:

Ըստ Կենտրոնական ընտրական հանձնաժողովի՝ 18 համայնքում ընդհանուր մասնակցության թիվը կազմել է 50,47 տոկոս: Համայնքներից ամենաակտիվը եղել է Սյունիքի մարզի Քաջարան համայնքը՝ 77,77 տոկոս մասնակցություն, ամենապասիվը՝ Կոտայքի մարզի Ջրվեժ համայնքը՝ 27,20 տոկոս:

Այսպիսով՝ ըստ ԿԸՀ տվյալների՝ Արագածոտնի մարզի Ալագյազ խոշորացված համայնքում անցկացված համայնքի ղեկավարի մեծամասնական ընտրակարգով ընտրություններում հաղթել է անկուսակցական Ջասմ Մախմուդովը: Նրա օգտին քվեարկել է 773 ընտրող: Մախմուդովի միակ մրցակիցը Անզոր Ուռուսյանն էր:

Ծաղկահովիտ համայնքում ՏԻՄ համամասնական ընտրակարգով անցկացված ընտրությունների նախնական արդյունքներով հաղթանակ է տարել «Քաղաքացիական պայմանագիր» կուսակցությունը՝ Նորայր Հակոբյանի գլխավորությամբ՝ հավաքելով 2299 ձայն, երկրորդ տեղում «Հզոր համայնք» դաշինքն է՝ 1327 ձայնով:

Արագածոտնի Թալին համայնքում հաղթանակը նույնպես ՔՊ-ինն է: Կուսակցությունն այստեղ հավաքել է 7990 ձայն, համայնքապետի թեկնածուն Տավրոս Սափեյանն է: Երկրորդ տեղում «Արդար Հայաստան» կուսակցություն է, որը ստացել է 2323 ձայն:

Գեղարքունիքի մարզի Ճամբարակ համայնքում էլ քվեարկության մասնակիցների ընդհանուր թիվը 5374 է: Այստեղ ընտրապայքարի միակ մասնակից ուժը «Դեմոկրատական այլընտրանք» կուսակցությունն էր, որը ստացել է 5257 քվե: Համայնքապետի թեկնածուն Վազգեն Ադամյանն է:

Լոռու մարզում 4 համայնքում էին անցկացվում ՏԻՄ ընտրություններ: Գյուլագարակում քվեարկության մասնակիցների ընդհանուր թիվը 3513 է եղել: «Քաղաքացիական պայմանագիր» կուսակցությունը այստեղ ևս հաղթանակ է գրանցել՝ հավաքելով 1779 ձայն՝ գլխավորությամբ Խաչիկ Վարդանյանի, երկրորդ տեղում «Ապրելու երկիր» կուսակցությունն է, որը ստացել է 1731 ձայն:

Ալավերդիում հաղթանակ է տարել «Ապրելու երկիր» կուսակցությունը, որի համայնքապետի թեկնածուն Արկադի Թամազյանն է, այս ուժի օգտին քվեարկել է 6791 մարդ, երկրորդը ՔՊ-ն է՝ 6557 ձայնով:

Լոռի Բերդում քվեարկության մասնակիցների ընդհանուր թիվը 2217 է եղել, որից 1254-ը ձայն է տվել «Քաղաքացիական պայմանագիր» կուսակցությանը: ՔՊ համայնքապետի թեկնածուն Արայիկ Ներսիսյանն է: Երկրորդ տեղում «Ապրելու երկիր» կուսակցությունն է՝ 619 ձայնով:

Տաշիր համայնքում հաղթանակ է գրանցել «Միասնական համայնք» դաշինքը՝ Էդգար Արշակյանի գլխավորությամբ՝ ստանալով 5904 ձայն: «Քաղաքացիական պայմանագիր» կուսակցությունն այստեղ երկրորդն է՝ 2376 ձայնով:

Վայոց ձորի Արենի համայնքում քվեարկության մասնակիցների ընդհանուր թիվը 3688 է եղել: Ընտրությունների նախնական արդյունքները, ըստ ԿԸՀ-ի, այսպիսին են.

Արենի համայնքում «Քաղաքացիական պայմանագիր» կուսակցությունը ստացել է 3281 ձայն, «Հանրապետություն» կուսակցության օգտին քվեարկել է 388 ընտրող։ ՔՊ համայնքապետի թեկնածուն Հուսիկ Սահակյանն է:

Եղեգիս համայնքում նույնպես հաղթանակ է գրանցել իշխանական կուսակցությունը՝ ստանալով 1593 ձայն։ «Ազատական» կուսակցությունն ունի 1162 քվե՝ այսպիսով զբաղեցնելով երկրորդը տեղը: Այստեղ ՔՊ թեկնածուն Արթուր Ստեփանյանն է:

Կոտայքի մարզում ընտրություններ էին 4 համայնքում:

Չարենցավան համայնքում քվեարկության մասնակիցների ընդհանուր թիվը 13.330 է եղել, հաղթել է «Միասնական համայնք» դաշինքը՝ ստանալով 6812 ձայն՝ Հակոբ Շահգալդյանի գլխավորությամբ, երկրորդը ՔՊ-ն է՝ 5571 ձայնով:

Ակունք համայնքում հաղթանակ է գրանցել «Քաղաքացիական պայմանագիր» կուսակցությունը՝ 2708 ձայնով, երկրորդ տեղում «Համախմբում» դաշինքն է՝ 2098 ձայնով: ՔՊ համայնքապետի թեկնածուն Հունան Ռուբենյանն է:

Բյուրեղավան համայնքում էլ ձայների մեծամասնությունը ստացել է «Միասնություն» դաշինքը՝ 2079, դաշինքի համայնքապետի թեկնածուն Հակոբ Բալասյանն է, երկրորդը ՔՊ-ն է՝ 1247 ձայնով:

Ջրվեժ համայնքում մասնակցում էր միայն «Քաղաքացիական պայմանագիրը», որն էլ ստացել է 2084 ձայն: Այստեղ համայնքապետ կդառնա Ռոբերտ Պետրոսյանը:

Տավուշի մարզում էլ ՏԻՄ ընտրություն էր ընդամենը մեկ համայնքում՝ Բերդում: Քվեարկության մասնակիցների ընդհանուր թիվն այստեղ եղել է 11.095, որից 5685-ը ձայն է տվել «Զորավոր համայնք» դաշինքին, ՔՊ-ն այստեղ ստացել է 4298 ձայն: Նշենք, որ «Զորավոր համայնք» դաշինքի ընտրված թեկնածու Հարություն Մանուչարյանը կալանավորված է:

Սյունիքի մարզում ընտրություններ էին 2 համայնքում: Կենտրոնական ընտրական հանձնաժողովն ամփոփել է քվեարկության արդյունքները, որի համաձայն՝ ՔՊ-ն Սիսիանում հավաքել է 4093 ձայն՝ Արմեն Հակոբջանյանի գլխավորությամբ: «Աշխատանք և արդարություն» դաշինքը ստացել է 2693 ձայն:

Իսկ Քաջարան համայնքում հաղթել է «Դեպի միասնություն» դաշինքը, որը հավաքել է 2233 ձայն։ ՔՊ-ն Քաջարանում ստացել է 817 ձայն: Նշենք, որ «Դեպի միասնություն» դաշինքի համայնքապետի թեկնածուն գործող համայնքապետ Մանվել Փարամազյանն է:

Շիրակի մարզի Անի համայնքում էլ, նախնական տվյալներով, ամենից շատ ձայնը հավաքել է «Ազգ-համայնք» դաշինքը, որի թեկնածուն գործող համայնքապետ Արտակ Գևորգյանն է՝ 3763 ձայնով։ ՔՊ-ն Անիում ստացել է 3032 քվե:

Նշենք, որ որոշ համայնքներում 50+ ձայն որևէ քաղաքական ուժ չի հավաքել, և այս դեպքում սպասվում են կոալիցիոն համագործակցություններ, կամ դրանց բացակայության դեպքում՝ նոր ընտրությունների անցկացում: