Երբ պատրաստ կլինի Երեւանի նոր բնակելի թաղամասը, ինչ առավելություններ կունենա այն. մանրամասներ (լուսանկարներ)

Վաղը՝ հոկտեմբերի 18-ին, Երեւանի ավագանու հաստատմանը կներկայացվի մայրաքաղաքում նոր բնակելի թաղամասի անվանակոչման վերաբերյալ նախագիծ: Ըստ նախագծի՝ Երեւանի Մալաթիա-Սեբաստիա վարչական շրջանի Տիչինայի փողոցի հ.320 հասցեի նոր կառուցվող թաղամասը կոչվելու է «Դեֆանս Հաուզինգ»:

«Դեֆանս Հաուզինգ»-ի կառուցապատման աշխատանքներն իրականացնող կազմակերպության մարքեթնիգի ղեկավար Մարինա Բաբախանյանը «Հայկական ժամանակ»-ի հետ զրույցում հայտնեց, որ նոր թաղամասի աշխատանքներն ամբողջությամբ ավարտին կհասցվեն մոտավորապես 8 տարի հետո: Թաղամասը նախատեսված կլինի շուրջ 45 հազար բնակչի համար:

Շինարարությունն իրականացվելու է փուլերով: Մարինա Բաբախանյանի խոսքով՝ առաջին փուլն արդեն մեկնարկել է: «Այս փուլով նախատեսվում է կառուցել 63 բազմահարկ բնակելի շենք՝ ընդարձակ կանաչապատ բակերով: Այդ շենքերի փոսորակներն արդեն փորված են, իրականացվում են բետոնացման աշխատանքները: 63 շենքը նախատեսվում է շահագործման հանձնել 2025 թվականին»,- մանրամասնեց նա:

Երկրորդ փուլով կառուցվելու է երկրորդ բնակելի թաղամասը, լինելու է մոտ 54 շենք, բացի այդ՝ բիզնես կենտրոն, առեւտրի կենտրոն, սպորտային համալիր (բաց եւ փակ կորտեր, վազքուղիներ, լողավազաններ, հեծանվուղիներ) եւ ժամանակակից չափանիշներին համապատասխանող, նորագույն սարքավորումներով հագեցած երկու մեծ հիվանդանոց, մեկը՝ ուռուցքաբանության ուղղվածության, մյուսը՝ դիագնոստիկ կենտրոն:

«Փարիզի համալսարանական լավագույն հիվանդանոցներից մեկի հետ կա նախնական պայմանավորվածություն՝ հիվանդանոցը ֆրանսիական բժշկության չափանիշներով կառուցելու, կահավորելու, սարքավորումներով հագեցնելու, ինչպես նաեւ բուժանձնակազմի վերապատրաստման եւ մշտական համագործակցության վերաբերյալ»,- հայտնեց մարքեթինգի ղեկավարը:

Վերջինս նաեւ նշեց՝ բազմաֆունկցիոնալ թաղամասը լինելու է Փարիզի «Դեֆանս» թաղամասի նմանությամբ, այն կրում է նոր տիպի ժամանակակից քաղաքի գաղափարը. «Ոգեշնչված լինելով Փարիզի թաղամասով՝ փորձել ենք հին պատմական քաղաքում ստեղծել նոր բան՝ չվնասելով հինը»:

Թաղամասում կկառուցվեն Ժամանակակից կրթահամալիրներ՝ 3 դպրոց, որոնցից մեկը կլինի եվրոպական դպրոցի մասնաճյուղը, եւ կգործի մի քանի մանկապարտեզ: Երրորդ փուլով կկառուցվի բիզնես կենտրոն՝ 15 բազմահարկ շենքով:

«Անցյալ տարի ստացել ենք շինթույլտվությունը, իսկ այս տարի հստակ սկսել ենք աշխատանքներ իրականացնել: Կանաչապատ տարածքում մշտապես լինելու է մեղմ կլիմա, մաքուր օդ: Իտալիայից բերված «Չինար» եւ արծաթափայլ տեսակի 6-10 մետր բարձրություն ունեցող ծառատեսակները զարդարելու են հեծանվաուղիներն ու վազքուղիները: Շատրվաններ, ջրվեժներ եւ հեքիաթային բնություն ունեցող զբոսայգին նախատեսվում է հանձնել փուլային շահագործման 2022-2023 թվականներին»,- մանրամասնեց նա:

Ըստ նրա՝ շատ մեծ բակեր են նախատեսվում, միջբակային տարածքները լինելու են մոտ 100 մետր, այսինքն՝ մեկ շենքից մյուսը գտնվելու է այդ հեռավորության վրա, լինելու է կանաչ տարածություն առանց մեքենաների երթեւեկության, ստորգետնյա եւ վերգետնյա անցումներ. «Առեւտրի կենտրոնը, հիվանդանոցը կամ այլ վայրերը ունենալու են իրենց առանձին ավտոկայանատեղին, որպեսզի չխանգարեն բնակիչներին»:

Զրուցակցի նկատառմամբ՝ հիմնական շեշտը դրել են, որ տարածքը լինի կանաչապատ, լինեն ջրային ավազաններ, որը եւս կապահովի միկրոկլիմա: Մեծ ասֆալտապատ ճանապարհներ են լինելու, որպեսզի հնարավորինս ապահովագրված լինեն խցանումներից, կլինեն նաեւ էլեկտրական մեքենաների լիցքավորման կայաններ:

«Թաղամասը գտնվում է Հյուսիս-հարավ մայրուղու անմիջական հարեւանությամբ, այժմ պետական մարմինների հետ բանակցություններ են ընթանում, որ մյուս մայրուղին էլ լինի օդանավակայան տանող արագընթաց ճանապարհ: Հարավային սահմանագծով արագընթաց ճանապարհ կլինի դեպի Էջմիածին (Արմավիր), որը պետական քաղաքաշինական ծրագրերին ընդառաջ կարող է դառնալ արագընթաց ճանապարհ դեպի օդանավակայան»,- նշեց նա՝ հավելելով՝ արվում է ամեն ինչ, որ բնակչի համար ստեղծվեն հարմարավետ պայմաններ, իսկ որ ամենակարեւորն է՝ առօրյա կարիքներից ելնելով՝ բնակիչը ստիպված չհասնի մեկ այլ թաղամաս, այսինքն՝ ամեն ինչ կենտրոնացված լինի այնտեղ, որտեղ ապրում է:

Նկատենք՝ վերջին շրջանում բազմաթիվ միգրանտների Հայաստան գալուց հետո անշարժ գույքի շուկայում ակնհայտ գների բարձրացում է նկատվում: Բաբախանյանից հետաքրքրվեցինք՝ իրենց մոտ ի՞նչ փոփոխություններ են գրանցվել:

«Մեր գնային քաղաքականությունը փոխվում է՝ շինարարական տեմպերից ելնելով: Այս պահին ամեն ինչ անում ենք, որ ավտոկայանատեղիներն ու մնացած աշխատանքներն ավարտին հասցվեն, որպեսզի եկող տարի զրոյական մակարդակից սկսենք շենքերի կառուցապատումը: Այսինքն՝ գնային փոփոխություն գուցե եւ լինի, բայց դա արդեն հաջորդ տարի: Այս պահին մեկ քառակուսի մետրի արժեքը սկսվում է 430 հազար դրամից, ըստ հարկի՝ գինը բարձրանում է. 15, 16, 25 հարկանի շենքեր են լինելու: Թաղամասում լինելու է կենտրոնացված ջեռուցում: Ընդհանուր ամեն մի բնակչին տալու ենք օդորակիչների համար տեղ, որտեղ կարող են տեղադրել, որպեսզի շենքի ընդհանուր տեսքը չփչացնեն»,- հայտնեց նա: