Կայացել է Բերդ համայնքի նորընտիր ղեկավարի երդման արարողությունը

Այսօր՝ նոյեմբերի 13-ին, կայացել է Բերդ համայնքի նորընտիր ղեկավար Աստղիկ Հակոբյանի երդման և պաշտոնի ստանձնման հանդիսավոր արարողությունը։

Բերդի համայնքապետարանի էջում հրապարակված տեղեկատվության համաձայն՝ արարողությանը երկա են եղել Բերդ համայնքի նորընտիր ավագանու 21 անդամներից 13-ը՝ ապահովելով նիստի իրավազորությունը: Այն վարել է համայնքի ավագանու տարիքով ավագ անդամ Համայակ Ադամյանը:

Նախքան նիստի մեկնարկը՝ ներկաները մեկ րոպե լռությամբ հարգել են հանուն հայրենիքի նահատակված հերոսների հիշատակը: Հնչել է ՀՀ օրհներգը:

Երդման արարողությունից հետո ելույթ է ունեցել Բերդ համայնքի նորընտիր ղեկավար Աստղիկ Հակոբյանը. «Ուրախ եմ, որ պատիվ ունեմ շարունակելու համայնքի զարգացման՝ Հարություն Մանուչարյանի ամրագրած ռազմավարությունը: Հարություն Մանուչարյանի կառավարման տարիներին Բերդ համայնքն ունեցել է փաստված հաջողություններ, մեծ ձեռքբերումներ... «Զորավոր համայնք» դաշինքի կողմից առաջադրվելով որպես համայնքի ղեկավար՝ տեղեկացնում եմ, որ համայնքի կառավարումն իրականացվելու է թիմային աշխատանքով: Մեր թիմում ներգրավված են փորձառու, բանիմաց, ճանաչված անհատներ, և միասին իրականացնելու ենք «Զորավոր համայնք» դաշինքի նախընտրական ծրագրերն ու խոստումները, որոնք վերջին հինգ տարիների ընթացքում Հարություն Մանուչարյանի կատարած աշխատանքի շարունակությունն են»:

Համայակ Ադամյանն ընթերցել է Հարություն Մանուչարյանի շնորհավորանքի խոսքը՝ ուղղված Աստղիկ Հակոբյանին՝ համայնքի ղեկավարի պաշտոնը ստանձնելու առթիվ և ուղերձը՝ պաշտոնավարման ժամկետը լրանալու կապակցությամբ:

Ուղերձում մասնավորապես նշված է. «Այս տողերը գրում եմ անազատության մեջ և խոսքս ուղղում եմ ձեզ՝ հայտնելու, որ այսօր լրանում է Բերդ խոշորացված համայնքի ղեկավարի պաշտոնում իմ պաշտոնավարման հինգ տարին: Շնորհավորանքի ջերմ խոսքերս ու սրտագին մաղթանքներս եմ հղում Բերդ խոշորացված համայնքի նորընտիր ղեկավար Աստղիկ Հակոբյանին՝ պաշտոնը ստանձնելու կապակցությամբ: Իմ խորին համոզմունքն եմ հայտնում առ այն, որ նա իր եռանդն ու ջանքերը ծառայեցնելու է ի նպաստ մեր համայնքի զարգացման և հզորացման: Մաղթում եմ հաջողություն, նախանշված նպատակների իրականացում և արգասաբեր աշխատանք այդ պատասխանատու պաշտոնում»:

Համայնքի ղեկավարի երդման արարողությանը մասնակցել և իրենց շնորհավորանքի խոսքն են հղել Բերդի և տարածաշրջանի հոգևոր հովիվ Տեր Արամ քահանա Միրզոյանը, Բերդ համայնքի ավագանու անդամ Սամվել Մակարյանը, Չինարի բնակավայրի վարչական ղեկավար Սամվել Սաղոյանը, Այգեպար բնակավայրի վարչական ղեկավար Արկադի Յամուկյանը, անվանի մանկավարժ, բանաստեղծ Ալբերտ Պապյանը, «Բերդի կանանց ռեսուրս կենտրոն» հիմնադրամի հիմնադիր տնօրեն Անահիտ Բադալյանը, ՀՕՖ-ի Բերդի գրասենյակի ղեկավար, «Տավուշ» հիմնադրամի տնօրեն Լուսիկ Աղաբաբյանը:

Ներկա են եղել Բերդ համայնքի բնակավայրերի վարչական ղեկավարները, ուժային կառույցների ներկայացուցիչները, այլք:

Այս շաբաթ 11 կողմ ձայնով Բերդ համայնքի ղեկավար էր ընտրվել սեպտեմբերի 25-ին ՏԻՄ ընտրություններում հաղթած «Զորավոր համայնք» դաշինքի համայնքապետի թեկնածու Աստղիկ Հակոբյանը, որը ընտրական ցուցակի երրորդ համարն էր:

Հիշեցնենք՝ սեպտեմբերի 25-ին Բերդ համայնքում տեղական ինքնակառավարման մարմինների ընտրություններ էին: Ընտրություններին քարոզչության դրդելու առթիվ ՀՀ ԱԱԾ քննչական դեպարտամենտում հարուցված քրեական վարույթի շրջանակում կալանավորվել էին Բերդ համայնքի ղեկավարի տեղակալն ու ևս 3 անձ, քրեական գործով էր անցնում նաև հենց Հարություն Մանուչարյանը։

Հատկանշական է, որ 4-ից 3-ը մեղադրվում են պետությանը և համայնքին վնաս հասցնելու համար:

Սեպտեմբերին կայացած ընտրություններում 50 տոկոսից ավելի ձայն ստացած «Զորավոր համայնք» դաշինքի ընտրական ցուցակը գլխավորող Հարություն Մանուչարյանը չէր հավակնում համայնքապետ դառնալ, ավելի վաղ ինքնաբացարկ էր հայտնել ու հրաժարվել մանդատից: Մանդատից հրաժարվելու դիմումը գրել էր բանտում, որտեղ գտնվում էր արդեն մեկ տարի մեկ այլ քրեական գործով՝ նույնատիպ մեղադրանքով։

2 օր առաջ՝ նոյեմբերի 11-ին, հայտնի դարձավ, որ Մանուչարյանը կալանավորվել է մեկ այլ քրեական վարույթի շրջանակներում: