Վանաձորում վերջապես հաջողվել է ավագանու նիստ գումարել, քվորում ապահովվել է, հաստատվել է քաղաքի՝ 2023-ի բյուջեն

Դեկտեմբերի 14-ին տեղի ունեցավ Վանաձոր համայնքի ավագանու արտահերթ նիստ։ Նիստի օրակարգում արդեն խոշորացված Վանաձոր համայնքի 2023 թ․ բյուջեի նախագիծն էր։

Նիստին ներկա էին ավագանու 18 անդամ։ Նախ քվեարկությամբ հաստատվեց օրակարգը, այնուհետև կետ առ կետ քննարկվեցին ու քվեարկվեցին ընդգրկված բոլոր նախագծերը։

Այս մասին հայտնում են Վանաձորի քաղաքապետարանից՝ նշելով, որ ավագանին ընդունեց 2023թ․ բյուջեի նախագիծը, հաստատեց մի շարք սուբվենցիոն ծրագրեր․

1. «Վանաձոր համայնքի Գարեգին Նժդեհի փողոցի հիմնանորոգում»,
2. «Վանաձոր համայնքի Հրաչյա Ներսիսյան փողոցի հիմնանորոգում»,
3. «Վանաձոր համայնքի Ավետիք Իսահակյան փողոցի հիմնանորոգում»,
4. «Վանաձոր համայնքի Հենրիկ Զաքարյան փողոցի հիմնանորոգում»,
5. «Վանաձոր համայնքի Շահումյան բնակավայրի 1, 2, 4, 5, 6, 9 փողոցների հիմնանորոգում»,
6. «Վանաձոր համայնքի Դարպաս բնակավայրի 3-րդ և 4-րդ փողոցների հիմնանորոգում»,
7. «Վանաձոր համայնքի Գուգարք բնակավայրի Էներգետիկների 5-րդ փողոցի և Կոտեջային 1, 2, 3, 4, 9-րդ փողոցների հիմնանորոգում, 14-րդ փողոցում սելավատարի կառուցում»,
8. «Վանաձոր համայնքի կարիքների համար աղբատար մեքենաների ձեռքբերում»,
9. «Վանաձոր համայնքի Վ.Համբարձումյանի անվան հրապարակի հիմնանորոգում»,
10. «Վանաձոր համայնքի տիկնիկային թատրոնի հիմնանորոգում»,
11. «Վանաձոր համայնքի «աթլետիկայի օլիմպիական մասնագիտացված մանկապատանեկան մարզադպրոց» ՀՈԱԿ-ի հիմնական մասնաշենքի հիմնանորոգում և մարզասրահի ռետինապատ հատակի փոխարինում»,
12. «Վանաձոր համայնքի թիվ 8 տնակային մանկապարտեզի շենքի կառուցում /2-րդ փուլ/»,
13. «Վանաձոր համայնքի Գուգարք բնակավայրում մանկապարտեզի կառուցում /2 փուլով/ /1-ին փուլ 2023թ․ կատարվող աշխատանքների/»,
14. «Վանաձոր համայնքի թիվ 4 տնակային մանկապարտեզի շենքի կառուցում»,
15. «Վանաձոր համայնքի Կ․ Դեմիրճյան փողոց թիվ 6, թիվ 8, թիվ 11, թիվ 19, Մոսկովյան փողոց թիվ 14, Գ․ Նժդեհի փողոց թիվ 7, Տիգրան Մեծի պողոտա թիվ 77, Թումանյան փողոց թիվ 6, Վարդանանց փողոց թիվ 23, թիվ 49 շենքերի տանիքների ջերմամեկուսացման և հիմնանորոգման աշխատանքներ»,
16. «Վանաձոր համայնքի գլխավոր փողոցների լուսավորության համակարգի արդիականացում»։

2023-ին Վանաձորում կսկսվեն ակտիվ շինարարական աշխատանքները։

Հիշեցնենք՝ Վանաձորում չէր հաջողվում ավագանու նիստ գումարել արդեն մի քանի ամիս շարունակ, գումարված նիստերին էլ քվորում ապահովել հնարավոր չէր լինում, ինչի հետևանքով չէր հաստատվում համայնքի բյուջեն, արդեն տևական ժամանակ է՝ արգելափակված էին քաղաքի համար կարևոր նշանակության բազմաթիվ աշխատանքներ:

Նշենք, որ ավագանու այս անգամվա նիստում քվորում ապահովել հաջողվել է, քանի որ «Մամիկոն Ասլանյան դաշինք» խմբակցության ներկայացուցիչներ Սեյրան Ղամբարյանը և Գայանե Քալանթարյանը մասնակցել են նիստին:  Նույն խմբակցության ներկայացուցիչներ հայտարարել են, որ Մամիկոն Ասլանյանը տեղյակ է իրենց այդ որոշման մասին:

Անցած տարվա դեկտեմբերի 5-ին Վանաձոր խոշորացված համայնքում տեղի ունեցան ավագանու ընտրություններ: Մասնակցում էր 10 քաղաքական ուժ: Սահմանված նվազագույն շեմը հաղթահարել էր 5-ը: Ամենից շատ ձայն հավաքել էր «Մամիկոն Ասլանյան» կուսակցությունների դաշինքը՝ ստանալով 15 մանդատ: Ընտրություններից որոշ ժամանակ անց դաշինքի ղեկավար Մամիկոն Ասլանյանը կալանավորվեց: Եվ մոտ կես տարի է՝ Վանաձոր համայնքը չուներ համայնքի ղեկավար ու ղեկավարի պաշտոնակատար:

2022 թվականի մայիսին, վարչապետ Նիկոլ Փաշինյանի որոշմամբ, «Հայաստանի աշխատավորական սոցիալիստական» կուսակցության ցուցակը գլխավորող Արկադի Փելեշյանը նշանակվեց Լոռու մարզի Վանաձոր համայնքի ղեկավարի պաշտոնակատար:

Երեկվա ավագանու նիստին արձագանքել է անազատության մեջ գտնվող Մամիկոն Ասլանյանը: Նրա էջում տեղադրված հայտարարության մեջ ասվում է.

«Դեկտեմբերի 14֊ին տեղի է ունեցել Վանաձոր համայնքի ավագանու նիստ, որի ընթացքում հնչել են հայտարարություններ, որոնք չունեն որևէ հիմք և իրականության հետ որևէ աղերս։ Մամիկոն Ասլանյանը ավագանու նիստերի վերաբերյալ իր դիրքորոշումը չի փոխել և որևէ ավագանու անդամի համաձայնություն կամ լիազորություն չի տվել նիստերին մասնակցելու կամ դաշինքի ու ղեկավարի անունից` իրականությանը չհամապատասխանող հայտարարություններ, հորդորներ տարածելու։

Ավագանու առանձին անդամների գործողությունները կրում են զուտ անհատական բնույթ, և յուրաքանչյուրն առաջնորդվում է իր խղճով ու բարոյականությամբ, գուցե նաև այլ շահագրգռությամբ։

Նիստեր գումարելու և դրանց մասնակցության միակ նախապայմանը եղել է օրինականության վերականգնումը, որը խաթարվել է շուրջ մեկ տարի առաջ և ինչի մասին բազմիցս հայտարարվել է։ Մենք հավատարիմ ենք վանաձորցու տված քվեին և երբեք ժողովրդի թիկունքում անտրամաբանական որոշումներ չենք կայացնում։ Ի դեպ, դեկտեմբերի 15֊ին լրանում է Մամիկոն Ասլանյանի ապօրինի կալանավորման մեկ տարին»։