Ես ևս դժգոհ եմ տրանսպորտային համակարգից, ինքս շաբաթ-կիրակի երթևեկում եմ, նկատում՝ խնդիրներ կան. Հրաչյա Սարգսյան

Երևանի քաղաքապետ Հրաչյա Սարգսյանը «Հայկական ժամանակ»-ի հետ զրուցել է hամայնքային տրանսպորտի արդիականացումից, ոլորտի խնդիրներից, այդ խնդիրների կարգավորմանն ուղղված քայլերից: Նրա հետ զրույցը՝ ստորև.

- Պարոն Սարգսյան, թեև տեսնում ենք, որ hամայնքային տրանսպորտի արդիականացման հարցը քաղաքային իշխանության ամենօրյա ուշադրության կենտրոնում է, սակայն տրանսպորտի հետ կապված դժգոհությունները շարունակվում են: Ըստ Ձեզ՝ հարցը ե՞րբ վերջնական լուծում կստանա:

- Ես էլ եմ դժգոհ տրանսպորտային համակարգից, ինքս օգտվում եմ շաբաթ-կիրակի օրերին ու հասկանում, որ այո՛, խնդիրներ ունենք: Տրանսպորտի ոլորտի խնդիրների համակարգային լուծումը պետք է իրականացվի չորս ուղղություններով միաժամանակ: Դրանք են՝

• տրանսպորտի ձեռքբերում
• երթևեկության կազմակերպում
• տրանսպորտի տեխնիկական սպասարկում
• տրանսպորտի կառավարում

Այսինքն՝ այս չորս ոլորտում զուգահեռաբար պետք է աշխատանք տարվի:

Վերջին մեկ տարվա ընթացքում չորս ուղղություններում էլ բավականին մեծ աշխատանք ենք իրականացրել, ունենք տարբեր ձեռքբերումներ: Երևանի հասարակական տրանսպորտը մինչև 2023 թվականի գարուն 90%-ով կթարմացվի։

Այս պահի դրությամբ 150 «Ժոնգ տոնգ» և 56 «ՄԱՆ» մակնիշի ավտոբուսներն արդեն գտնվում են Երևանում: Ակնկալում ենք, որ մինչև փետրվարի 20-ը 12 մետրանոց «ՄԱՆ»-երն ամբողջական քանակով (87) կլինեն Երևանում: Պետք է մաքսազերծենք, համապատասխան փաստաթղթային ձևակերպումներ անցնեն, և արդեն այդ շարժակազմը մուտք կանենք երթուղիներ: Վստահ եմ, որ քաղաքացիները էական փոփոխություն են զգալու: Բայց դրանով դեռ չենք հասնի մեր սահմանած վերջնական նպատակակետին:  

Իսկ 18 մետրանոց ավտոբուսների դեպքում ռազմավարությունը հետևյալն է՝ ցանկանում ենք, որ մասնավորը ներդրում իրականացնի, մենք համայնքի կողմից ծառայություններ ձեռք բերենք և յուրաքանչյուր կիլոմետրի համար մասնավոր կազմակերպությանը վճարեք x չափի գումար: Այս մոդելը կիրառվում է տարբեր երկրներում՝ Ռուսաստանում, ԱՄՆ-ում, Եվրոպայում: Այս պահի դրությամբ օրենսդրական նախագիծը Կառավարությունը հաստատել է, փաթեթը գտնվում է Ազգային ժողովում: Կարծում եմ՝ շուտ կընդունվի, որը մեզ հնարավորություն կտա արդեն մրցույթ հայտարարել, որպեսզի ծառայություններ ձեռք բերենք 18 մետրանոց ավտոբուսների համար:

Չորս կոմպոնենտներից երկրորդը վերաբերում է ավտոբուսների սպասարկմանը: Քաղաքին այս քանակությամբ ավտոբուսներ սպասարկելու համար չորս ավտոպարկ է հարկավոր: Ավտոպարկերից մեկը Լենինգրադյանում է, որը մասամբ է կառուցված: Մյուսը Ջրվեժում է: Ջրվեժի ավտոպարկը Կառավարության ներդրումային խորհրդում հավանության է արժանացել, հիմա շինարարական աշխատանքների ձեռք բերման մրցույթ ենք հայտարարում: Այժմ այդ փաթեթն է նախապատրաստվում: Ակնկալում եմ, որ մինչև փետրվարի վերջ փաթեթն ամբողջությամբ պատրաստ կլինի, մրցույթ կհայտարարենք և գարունը բացվելուն պես արդեն կսկսենք շինարարական աշխատանքները: Ասիական զարգացման բանկի աջակցությամբ ու վարկային միջոցներով Շիրակում մեծ դեպոյի կառուցման նախագիծ ունենք: Այս պահին Կառավարության հետ բանակցության մեջ ենք, թե ի՞նչ ֆինանսական միջոցներն ունենք դեպոյի կառուցումն իրականացնելու համար: 

Այս պահի դրությամբ մրցույթ է հայտարարված, և շուտով Ջրվեժի դեպոյում կկառուցվի գազի և դիզելային վառելիքի լիցքավորման կայան, և այնտեղ կայանած ավտոբուսներն ստիպված չեն լինի շրջագայել տարբեր գազալցակայաններ, որպեսզի լիցքավորվեն: Սեփական ավտոպարկում էլ կիրականացվի գազալիցքավորումը: Սա ինչ վերաբերում է սպասարկմանը:

Մյուսը կառավարման բլոկին է վերաբերում: Մենք ունենք նախագիծ, որի մրցույթը մի քանի անգամ հետաձգվեց, բայց այս պահի դրությամբ նախագիծը պատրաստ է, մրցույթը՝ հայտարարված: Բացումը, եթե չեմ սխալվում, հունվարի 28-ին է լինելու, որը մեզ հնարավորություն կտա վերոնշյալ մեծ շարժակազմի կառավարման համար օգտագործել ժամանակակից ծրագրային ապահովումներ և տրանսպորտային համակարգը կառավարել:

Եվ չորրորդ կոմպոնենտը՝ երթևեկության կազմակերպումը: Եթե մեր փողոցներում այսքան քանակությամբ ավտոբուսներ լինեն, և երթևեկությունը ճիշտ կազմակերպված չլինի, ապա չենք կարողանալու այդ ավտոբուսները շահագործել:

Այս պահի դրությամբ մեր միջազգային գործընկերների օգնությամբ տարբեր վերլուծություններ ունենք արված, և, կարծում եմ, առաջիկայում կքննարկենք Միասնիկյան և Գայի պողոտաններում ավտոբուսների առանձնացված գծեր ունենալու հարցը: Ինչպես նաև նոր տեխնոլոգիաներ կօգտագործենք, որպեսզի այն վարորդները, ովքեր պայմանական կանգառներում են կանգնում, պատասխանատվության ենթարկվեն, քանի որ այդ կերպ երթևեկությունն ամբողջությամբ խափանվում է:

Բոլոր չորս ուղղություններով մենք բավականին մեծ աշխատանք ենք տարել ու շարունակում ենք անել: Իսկ թե վերոնշյալ խնդիրները ե՞րբ կլուծվեն վերջնականապես, կարծում եմ՝ այս տեմպերով շարունակելու դեպքում երկու տարվա ընթացքում Երևան քաղաքում կունենանք շատ լավ տրանսպորտային համակարգ:

- Շատ հաճախ դժգոհությունները նաև տրանսպորտի ինտերվալի հետ են կապված: Քաղաքացիների պնդմամբ՝ վարորդները վարում են սեփական նախասիրությամբ: Արդյոք այդպե՞ս է, և ի՞նչ վերահսկողություն է իրականացվում այս մասով:

- Տեսեք, կոմպոնենտներից մեկը՝ տրանսպորտային միջոցների կառավարումը, հենց այսպիսի հարցեր է կարգավորելու: Ինտերվալների հետ կապված կարող եմ ասել, որ շատ հաճախ խցանումների պատճառով է խախտվում ինտերվալը, և շատ տեղերում՝ կանգառներում, քաղաքացիների կուտակումներ է տեղի ունենում, որը խնդիրներ է առաջացնում: Խնդիրը գալիս է նաև նրանից, որ չունենք նորմալ՝ կազմակերպված երթևեկություն: Իհարկե, դա էլ իր պատճառներն ունի: Ինչո՞ւ չունենք նորմալ երթևեկություն, քանի որ հանրային տրանսպորտը տարիների ընթացքում երկրորդական դերում է եղել: Քաղաքացիները տեղաշարժվելու համար նախընտրել են իրենց սեփական ավտոմեքենաները ձեռք բերել:

2019 թվականին ԵԱՏՄ արտոնությունների շրջանակներում բավականին մեծ քանակությամբ ավտոմեքենաներ ձեռք բերվեց, որը բերել է այս իրավիճակին: Խնդրի լուծման միակ տարբերակը լավ հանրային տրանսպորտ ունենալն ու հանրային տրանսպորտին առաջնահերթություն տալն է:

- Ավտոբուսների ամբողջական համալրումից հետո մարդիկ շարունակելո՞ւ են կանգնած երթևեկել, թե՞ այլևս վերջ է դրվելու այդ իրավիճակին:

- Կարծում եմ, որ 70%-ով խնդիրը լուծված կլինի, սակայն այն ցանկալի և բաղձալի պատկերը, որը ես եմ պատկերացնում, դեռ չենք ունենա: Դրա համար դեռ ճանապարհ ունենք անցնելու, հիմա պրոցեսներ կան, որ անկախ մեզանից՝ չենք կարող վերացնել:

Հերմինե Կարապետյան