Կրկին փորձիր, կամ ինչպես 3-ը դարձավ 4․ Շիրակի մարզի Անի համայնքի արտահերթ ընտրություններին այս անգամ պայքարում է 4 ուժ

^{Լուսանկարում՝ ձախից աջ՝ Արտակ Գևորգյան, Արման Սարիբեկյան, Ագուն Սաղաթելյան: Արմենակ Նաջարյանի լուսանկարը չի հաջողվել գտնել:}

Շիրակի մարզի Անի խոշորացված համայնքում գարունը, անկախ ջերմաստիճանից, թեժ է լինելու. առջևում տեղական ինքնակառավարման մարմինների արտահերթ ընտրություններն են։

Այս անգամ հաղթելու համար կազմ ու պատրաստ 4 քաղաքական ուժ է մտել պայքարի մեջ՝ «Ազգ-համայնք» կուսակցությունների դաշինքը, «Հայկական երազանք», «Քաղաքացիական պայմանագիր» և «Իմ հզոր համայնք» կուսակցությունները:

Առաջին երեքը 2022 թվականի սեպտեմբերի 25-ին տեղի ունեցած ՏԻՄ ընտրություններում չկարողացան 50 տոկոսից ավելի ձայն ստանալ, հետագա քաղաքական գործընթացներում էլ կոալիցիա չձևավորվեց։ Ստեղծված իրավիճակում, ՀՀ կառավարության որոշմամբ, դեկտեմբերի 8-ին վաղաժամկետ դադարեցվեց Անի խոշորացված համայնքի ավագանու լիազորությունները։ ՀՀ վարչապետ Նիկոլ Փաշինյանի որոշմամբ՝ «Քաղաքացիական պայմանագիր» կուսակցության ընտրացուցակը գլխավորած Արման Սարիբեկյանը նշանակվեց Շիրակի մարզի Անի համայնքի ղեկավարի պաշտոնակատար՝ մինչ նոր ընտրությունների անցկացումը: Ի դեպ, ՔՊ-ի ցուցակը գլխավորում է հենց նա:

4-րդ նոր ուժը, որն այս անգամ կմասնակցի Անի համայնքի ընտրություններին, «Իմ հզոր համայնք» կուսակցությունն է։ Այս ուժը, պարզվում է, նախորդ ընտրությանը մասնակցել է, բայց ոչ թե առանձին, այլ Անիի նախկին համայնքապետ Արտակ Գևորգյանի գլխավորած «Ազգ-համայնք» կուսակցությունների դաշինքի կազմում։

«Իմ հզոր համայնք»-ի ընտրացուցակը գլխավորող Արմենակ Նաջարյանը 2022-ի ընտրություններում «Ազգ-համայնք»-ի երկրորդ համարն է եղել։ «Հայկական ժամանակ»-ի հետ զրույցում Նաջարյանը մանրամասնել է՝ ինչո՞ւ են Գևորգյանի ընտրացուցակում եղել և ինչո՞ւ են հիմա առանձին ներկայանում։

«Այն ժամանակ կուսակցության հարց չի լուծվել, պայման ենք դրել, ընդունվել է մեր պայմանը, առաջարկները, որպեսզի դուրս չմնանք պայքարից, էդպես ենք մասնակցել։ Հիմա պայքարը տեղափոխվել է 2-րդ փուլ, ստեղծել ենք մեր կուսակցությունը, մասնակցում ենք մեր թիմով»,- պարզաբանում է նա:

Հարցին՝ եթե միանձնյա չհաղթեն, կա՞ մի ուժ, որի հետ կոալիցիա կկազմեն, վերջինս վստահ բացասական է պատասխանում։ Ըստ նրա՝ ոչ մի քաղաքական ուժի հետ իրենք գործ չունեն, ոչ մեկի հետ պայմանավորվածություն չունեն. իրենց հաղթանակի համար են պայքարում։

Այս քաղաքական ուժի ներկայությունը, սակայն, միանշանակ վերաբերմունքի չի արժանացրել «Քաղաքացիական պայմանագիր» կուսակցությունը։ Ընտրացուցակի երկրորդ համարը զբաղեցնող Էդգար Սաղաթելյանը մեր զրույցում որոշ նկատառումներ է արել հետագայի հետ կապված։

«Նախկին ուժի 2-րդ համարն առանձնացել, առանձին է գնում, դա արդեն պարզ է, հետո իրար միանալու մտավախություն կա։ Ցուցակը երկու մասի է կիսված կարծես»,- ասում է նա:

Անկախ այս ամենից՝ «Քաղաքացիական պայմանագիր»-ն իր հաղթանակում մեծ վստահություն ունի։ Սաղաթելյանի խոսքով՝ ժամանակավոր ղեկավարման այս երեք ամսվա ընթացքում քաղաքացիներն իրենց աշխատանքն էլ են տեսել, վերաբերմունքն էլ, փոփոխություններն էլ։

«Նախկին աշխատակազմի 20 տոկոսն է փոխված, մյուսները նույն աշխատակիցներն են։ Հիմա արդեն տեսնում են մեր աշխատանքային ճիշտ գործելաոճը, կոմունալն է շատ լավ աշխատում, գնահատելու քայլեր կան մեծաթիվ։ Այնպես որ, նախորդ ընտրության 38-39 տոկոսից ակնկալում ենք ավելի բարձր արդյունք ու հաղթանակ։ Ոչինչ չի փոխվել, կարգախոսն էլ է նույնը, նպատակն էլ»,- ընդգծում է ՔՊ ներկայացուցիչը։

Նույն թիմով և նույն կարգախոսով է ընտրությանը մասնակցում նաև Անիի նախկին համայնքապետ Արտակ Գևորգյանի գլխավորած «Ազգ-համայնք» կուսակցությունների դաշինքը։

Մեր զրույցում Գևորգյանն ասում է՝ մեկ անգամ չէ, որ ապացուցել է իր՝ ժողովրդի վստահությունն ու աջակցությունն ունենալը։ Վերջին ընտրությունները ևս, ըստ նրա, այդպիսին էին, կարծում է, որ միանշանակ իրենք հաղթելու են և իշխանություն ձևավորելու։

«Հաղթանակը լինելու է, կարողանալու ենք ձևավորել ՏԻՄ իշխանություն, որը կծառայի ժողովրդին, և թույլ չենք տա, որ նախընտրական, ընտրական և հետընտրական փուլերում հասարակությունը պառակտվի, խնդիրներ ստեղծվեն, լարվածություն լինի։ Բոլոր լուծումները տանելու ենք խաղաղ ճանապարհով։ Հիմա 3-ամսյա պաշտոնակատարի ֆորմատով ձևավորվել է ժամանակավոր իշխանություն, և համատարած թողել են վնասներ, ավերակներ, կադրային ջարդ, որը բերել է հասարակության լարվածությանը, իսկ սա ճիշտ չէ»,- նշում է Գևորգյանը։

Հաղթելու իր առանձին ճամփով է քայլում նաև «Հայկական երազանք»-ը։ Կուսակցության ընտրացուցակն առաջնորդող Ագուն Սաղաթելյանը վստահեցնում է՝ անդավաճան է իր սկզբունքներին: Այնպես, ինչպես նախորդ ընտրությանն են մասնակցել, նույնությամբ նորին են պատրաստվում։

Նկատենք, որ 2022-ին կայացած ընտրություններում Անի համայնքի 21 մանդատը բաշխվել էր հետևյալ հարաբերակցությամբ՝ «Ազգ-համայնք» դաշինք՝ 10, ՔՊ՝ 8, իսկ «Հայկական երազանքը»՝ 3 մանդատ։ Հենց այս 3 մանդատն էր, որ ուժերից մեկի հետ կոալիցիայի պարագայում հնարավորություն էր տալու ձևավորել իշխանություն։ Ագուն Սաղաթելյանը, սակայն, մնաց իր համոզմանը հավատարիմ և քաղաքական ուժերից որևէ մեկի հետ կոալիցիա չկազմեց։

Նշենք, որ երեկվանից՝ մարտի 1-ից, Սյունիքի մարզի Սիսիան և Շիրակի մարզի Անի համայնքներում մեկնարկել է ավագանու արտահերթ ընտրությունների նախընտրական քարոզարշավը։ Այն կտևի մինչև մարտի 24-ը՝ ժամը 24:00-ն։ Ընտրությունները կկայանան մարտի 26-ին։