Մհեր Արմենիայի հայտարարությունները «լկտի սուտ են». Շուռնուխից «ոտքով» Երևան հասած եռյակը «փլուզվել» է

Այսօր «Հայկական ժամանակ»-ը երգիչ Մհեր Արմենիայից հետաքրքրվել էր, թե իր ղեկավարած «Ազգի ձայն» կուսակցությունը պատրաստվո՞ւմ է արդյոք մասնակցել Երևանի ավագանու առաջիկա ընտրություններին:

Վերջինս մեր զրույցում ասել էր, որ մասնակցելու են, բայց դեռ չեն ցանկանում հրապարակել թեկնածուի անունը:

«Մասնակցելու ենք քաղաքապետի ընտրություններին, բայց դեռ չենք հրապարակում մեր թեկնածուի անունը։ Հստակ չեմ կարող ասել՝ երբ կբացահայտենք մեր թեկնածուին, սակայն անպայման կտեղեկացնենք»,- ասել էր նա: 

Հարցին՝ հնարավո՞ր է՝ կուսակցության ցուցակը գլխավորի հենց ինքը, երգիչը կտրուկ բացառել էր. «Թող լինի անակնալ։ Ես չեմ լինի, քանի որ ես մեր կուսակցության ղեկավարն եմ։ Միանշանակ չի լինելու իմ թեկնածությունը»։

Այս նյութը լրատվամիջոցի ֆեյսբուքյան էջերում տարածելուց հետո դրա մեկնաբանությունների բաժնում արձագանքել է Ռոման Նազարյանը, որ կուսակցության փոխնախագահն է և, իր խոսքով, հիմնադիրը:

Ուշագրավ է, որ նա կոչ է արել Մհերին չզբաղվել ապատեղեկատվությամբ, իսկ լրատվամիջոցներին հորդորել՝ հարցազրույց չվերցնել նրանից, քանի որ, ըստ Ռոման Բաղդասարյանի, Մհեր Արմենիայի հայտարարությունները «լկտի ստեր են»:

«Ինքս հանդիսանում եմ այդ կուսակցության հիմնադիրը, ասեմ ավելին՝ փոխնախագահը, և երգչին խորհուրդ կտամ չզբաղվի ապատեղեկատվությամբ: Գոնե բարեհաճի ծանոթանալ այդ կուսակցության կանոնադրությանը, որպեսզի հասկանա՝ մինչև ընտրությունները ինքը պարզապես չի կարող լինել այդ կուսակցության ղեկավարը:

Ասեմ ավելին՝ ընտրությունների մասնակցելու հարցը չի էլ քննարկվել կուսակցության վարչությունում, քանի որ չի եղել վարչության նիստ, և, ըստ հաստատված կանոնադրության, կուսակցության նախագահը չի կարող ինքնագլուխ հայտարարություններ անել:

Մի խոսքով, իր յուրաքանչյուր արած հայտարարություն կուսակցությունը համարում է լկտի սուտ, և զուր տեղը իրենից կուսակցության վերաբերյալ հարցազրույցներ մի վերցրեք, հարգելի լրատվականներ»,- գրել է նա:

Հիշեցնենք, որ 2021 թվականին էլ Մհեր Արմենիան հայտարարել էր, որ պատրաստվում է կուսակցություն հիմնադրել և մասնակցել հունիսի 20-ին Հայաստանում անցկացվող արտահերթ խորհրդարանական ընտրություններին: Նա վստահորեն պնդում էր, որ հաղթելու են, սակայն հետագայում պարզվեց, որ Մհեր Արմենիան փաստաթղթերը չէր ներկայացրել ԿԸՀ, և նրա «Ազգի ձայնը» կուսակցությունը չմասնակցեց ընտրություններին:

Այնուհետև երգիչ-քաղաքական գործիչն ազդարարեց, որ սկսում է համազգային շարժում և իր երկու համախոհ ընկերների հետ Սյունիքի մարզի Շուռնուխ գյուղից ոտքով գալիս են Հանրապետության հրապարակ: Ի դեպ, Մհեր Արմենիայի ուղիղ եթերներից պարզ էր դարձել, որ նրան միացած երկու գաղափարակից ընկերների թվում էր հենց Ռոման Բաղդասարյանը, որը և նրանց մյուս ընկերը՝ Մարտին Ամիրխանյանը, ժամանակ առ ժամանակ փոխվելով, մեքենա վարելով էին այդ ընթացքում ուղեկցում Մհերին:

Պայքարի դուրս եկած երգիչ-քաղաքական գործիչը հաճախ նաև խոսում էր այն մասին, որ իրենք, իր խոսքերով, այսպես ասած՝ ինչ-որ մեկի պրոյեկտը չեն, այլ հայ ազգի «պրոյեկտն» են: Ի դեպ, սա չնայած այն հանգամանքին, որ իր գաղափարակից ընկերները՝ Ռոման Նազարյանը և Մարտին Ամիրխանյանը, Ռոբերտ Քոչարյանի ակտիվ համախոհներից են եղել, որի մասին ազդարարում են նրանց ֆեյսբուքյան էջերը: