Այս ռևանշիստ ընդդիմության հանդեպ պետք չէ լինեն ներողամիտ. օրենքը պետք է զգան ծոծրակներին. քաղաքագետ

«Ըստ էության՝ սա այն հակամշակույթն է, որ մեր խորհրդարանում կա»:

Այս մասին «Հայկական ժամանակ»-ի հետ զրույցում ասում է քաղաքագետ Հայկ Սուքիասյանը՝ անդրադառնալով ԱԺ-ում տեղի ունեցած միջադեպին, որի ժամանակ Պետաիրավական հանձնաժողովում՝ փակ քննարկման ժամանակ, ընդդիմադիր «Հայաստան» խմբակցության պատգամավոր, ՀՅԴ-ական Մհեր Սահակյանը հարձակվել էր հանձնաժողովի նախագահ Վլադիմիր Վարդանյանի վրա, հարվածել, մարմնական վնասվածքներ հասցրել վերջինիս:

Ըստ քաղաքագետի՝ խորհրդարանում կան երկու անտագոնիստական ուժեր. մի հատվածը իշխանությունն է՝ օրինականորեն ընտրված, որը պետության շահն է պաշտպանում, և կա հատված, որը պետականակործան գործունեությամբ է զբաղված:

«Պարզ է, որ այս հատվածը՝ ռևանշիզմը, որին դուք ընդդիմություն եք ներկայացնում, հետաքրքրված չէ Հայաստանի կյանքով և ապագայով, հետաքրքրված է բացառապես իշխանությանը տապալելով, պետությունը կործանելու քաղաքականությամբ: Դրա համար նրանք կանեն ամեն բան. կայլասերեն Հայաստանի քաղաքական կյանքը, կեժանացնեն խորհրդարանի ինստիտուտը, կփչացնեն Հայաստանի քաղաքական իմիջը, դեմոկրատական հմայքը, որը քիչ թե շատ կա, և այսպես շարունակ: Դրա համար ի՞նչ է պետք. պետք է իրավական համակարգ, որը կիջնի ցանկացածի գանգին, որը Հայաստանում օրենք կխախտի»,- նկատում է քաղաքագետը:

Նրա խոսքով՝ մեզ մոտ, ամեն դեպքում, կա հարմարվողականություն, ըմբռնում, ռևանշիզմին շատ չգրգռելու մտայնություն, որը ճիշտ չէ, պետք է նկատի ունենանք, որ այդ հատվածը Հայաստանի հետ կապ չունեցող հատված է: Քաղաքագետը նկատում է, որ ՀՀ-ում պետք է գործեն իրավական պետության բոլոր մեխանիզմները, որպեսզի վերջիններս կարգի գան:

«Այսինքն՝ որևէ անձ՝ կլինի պատգամավոր, պատգամավորի վարորդ, նախարար, նախարարի սիրուհի, ով ուզում է լինի, եթե օրենք է խախտում, այդ օրենքը պետք է գործի յուրաքանչյուրի ծոծրակին, ոչ թե լինենք ներողամիտ ու խոհեմ: Դեմոկրատիան «բառադիությունը» չէ, դեմոկրատիան պահանջում է կարգուկանոն, այն իրավական պետության դիկտատուրա է, և այդ բոլոր մեխանիզմները պետք է աշխատեն և առաջին հերթին պետական պաշտոնյանների նկատմամբ»,- ասում է նա:

Ըստ քաղաքագետի՝ այս երևույթները շարունակվելու են, քանի որ այդ հատվածն ամեն ինչ անելու է, որպեսզի այլասերի Հայաստանի քաղաքական կյանքը. «Ռևանշիզմն իշխանությանը դիտարկում է որպես թշնամի և թշնամի է դիտարկում հասարակության բոլոր այն շերտերին, ովքեր ուզում են պետություն ունենալ: Նրանց արածը հակաիրավական է, իրավական մշակույթի այլասերում, որովհետև ի՞նչ է նշանակում խրախուսել բռնությունը, ինչ է դա: Սրանք շարունակելու են իրենց արարքները»:

Վերջինիս պնդմամբ՝ ռևանշիստները գործում են ո՛չ մեր երկրի և ո՛չ էլ մեր ժողովրդի շահերից:

«Եթե նրանց վարքաբանությունը նայենք, այնտեղ գիշեր-ցերեկ կա երգ, ձոներ՝ ուղղված դեպի հյուսիսին: ՀՀ-ն Հնդկաստանի հետ որոշակի հարաբերություններ ունի, Իրանի, ԱՄՆ-ի, Ֆրանսիայի. տեսե՞լ եք երբևէ հետաքրքրություն դրսևորեն այս ուղղությամբ: Կա միայն նրանց ավանդական երգը՝ ամեն բան հանուն Ռուսաստանի: Եվ իրենք պառկել են գետնին հարմար դիրքով ու Հայաստան են հրավիրում Ռուսաստանին: Իրենց պետական կամ ազգային շահը, ենթադրում եմ, Ռուսաստանն է, նրանք այնտեղից ունեն ներշնչանք: Ռուսաստանը երկու է տարի է՝ տարբեր ձևերով ոչ մի պարտականություն չի կատարում: Տեսե՞լ եք՝ մի անգամ Ռուսաստանին ասեն՝ պարտականությունդ կատարի: Ռուսաստանը չի կատարում, իրենք մեղադրում են հայ ժողովրդին, իշխանությանը, հետևապես սա Ռուսաստանի շահերը սպասարկող հատված է»,- ասում է նա:

Խոսելով այսօրվա միջադեպի հետևանքների մասին՝ վերջինս ընդգծում է, որ ոչ թե պետք է խիստ կամ թույլ լինել, այլ կիրառել այն պատիժը, որը օրենսդրությամբ սահմանված է. «Եվ ես պահանջում եմ իշխանություններից, որ կիրառեն օրենսդրությունը, այլապես այն ապալեգիտիմացվում է, և դա նշանակում է՝ Հայաստանում կարելի է ամեն այլանդակություն անել ու գալ համաձայնության: Եթե մենք ուզում ենք իրավական մշակույթ, բարձր քաղաքացիական գիտակցությամբ հասարակություն, ապա առաջին հերթին ՀՀ-ում օրենքը պետք է գործի պետական պաշտոնյայի նկատմամբ»:

Հերմինե Կարապետյան