«Թշնամուս թշնամին իմ բարեկամն է». Հայաստանը պետք է ռազմաքաղաքական հարաբերություններ ձևավորի Իրանի հետ. Երվանդ Թարվերդյան

«Միացյալ Հայաստան» կուսակցության ղեկավար Երվանդ Թարվերդյանը կարծում է, որ Հայաստանը պետք է ռազմաքաղաքական հարաբերություններ ձևավորի Իրանի Իսլամական Հանրապետության հետ։

«Հազարամյակների ընթացքում բարեկամ դարձած պետությունը՝ Իրանը, վերջին 40 տարին գտնվում է եվրոպական և ԱՄՆ ուշադրության կենտրոնում։ Նրա նկատմամբ սանկցիաներ են կիրառվում՝ կապված միջուկային զենքի ստեղծման հետ։ Ներկայումս մեր և Իրանի շահերն ամբողջությամբ համընկնում են։ Այսօրվա լարված իրավիճակում, երբ երկու պետություններն էլ ոչ այդքան լավ հարաբերություններ ունեն Ադրբեջանի և Թուրքիայի հետ, պետք է համապատասխան պայմանագրերով հստակեցնենք դաշնակցային հարաբերությունները։ Իրանն այս հարցում ևս կողմ է, քանի որ բազմիցս հայտարարել է՝ չի հանդուրժի ՀՀ սահմանների որևէ փոփոխություն»,- «Հայկական ժամանակ»-ի հետ զրույցում ասում է նա։

Նրա խոսքով՝ այդ հարաբերությունների կարգավորումը չի հակասում Ռուսաստան-Հայաստան դաշնակցային հարաբերություններին։ Իսկ դեմ կողմը միայն Ադրբեջանն ու Իսրայելն են, որոնց մոտ սա կարող է սկզբունքային հակասություններ առաջացնել:

«Տարածաշրջանում արդեն կան որոշակի փոփոխություններ․ Չինաստանն ուղղակի օգնություն է ցուցաբերում Իրանին, լավացնում հարաբերությունները ՌԴ-ի հետ։ Իրանն ու Սաուդյան Արաբիանն են ձգտում իրենց հարաբերությունների կարգավորմանը։ Եթե Հայաստան-Իրան դաշնակցային հարաբերությունների ձևավորումը որևէ կերպ լարվածություն առաջացնի տարածաշրջանում, մենք չպետք է վախենանք, քանի որ այդ կարգավորումից ստացած օգուտներն ավելին են, քան վնասները։ Երկու երկրներն էլ լարված են հարևան այլ երկրների հետ, և այդ համագործակցությունը, օրինակ, ՀՀ-ի անվտանգության մակարդակն ավելի է բարձրացնելու»,- կարծում է Թարվերդյանը։

Քաղաքական գործիչը համոզված է՝ Իրանի հետ դաշնակից դառնալով՝ չի նշանակում, թե ՀՀ-ն մոռացության է մատնելու իր գլխավոր դաշնակցին՝ ՌԴ-ին։ Իսկ արդյոք Իրանի հետ ռազմաքաղաքական համագործակցությունը կսզպի՞ Ադրբեջանին, թե՞ ոչ, «Միացյալ Հայաստան» կուսակցության առաջնորդն ընդգծում է․ «Այս հարցի շուրջ պետք է զուգահեռներ տանենք․ Հունաստանի հետ մենք շատ ջերմ բարեկամական կապ ունենք, իսկ վերջին 100 տարվա ընթացքում Թուրքիան շատ վատ հարաբերություններ ունի այդ երկրի հետ։ Միջազգային հարաբերություններում չգրված օրենք կա՝ «իմ թշնամու թշնամին իմ բարեկամն է»։ Իրանն ու մենք ունենք նույն թշնամիները։ Եթե մենք բոլոր գործողություններն իրականացնենք Արևմուտքի մասին մտածելով, ապա գուցե լուրջ խնդիրներ ունենանք։ Արևմուտքը փորձում է ցավեցնել Իրանին ու ՌԴ-ին, ինչը չի բխում ՀՀ շահերից»։

Երևանդ Թարվերդյանի կարծիքով՝ Ռուսաստանը վերջին օրերին ընդգծում է, որ լավ հարաբերություններ ունի Հայաստանի հետ և չի փորձում փչացնել այդ հարաբերությունները։

Դիտարկմանը՝ ՌԴ-ն արդյոք թերացումներ չունի՞ իր դաշնակցի՝ ՀՀ-ին, աջակցելու հարցում, եթե հաշվի առնենք վերջին օրերին ադրբեջանական կողմի սանձազերծած ագրեսիան և նրա զորքերի ներխուժումը ՀՀ ինքնիշխան տարածք, Թարվերդյանն այս կարծիքների հետ համամիտ չէ:

«ՌԴ զորախմբի ներկայությունը ապահովում է մեր անվտանգությունը հարևան երկու երկրներից։ Եթե դաշնակից ենք, չի նշանակում, թե մեր պետությունն ամբողջությամբ պետք է հանձնենք նրան, և նա հոգա մեր կարիքները։ Մենք ունենք ներուժ, օրինակ՝ մեր սահմանները կահավորելու հարցում։ Մեր բանակի թվակազմնն էլ 44-օրյա պատերազմից հետո նորից համալրվել է, որովհետև նոր ժամկետային զինծառայողներ են անցնում ծառայության։ Մենք մեր սահմանները կահավորելու և պաշտպանելու հարցում պոտենցիալ ունենք»։

Այս համատեքստում Թարվերդյանը նաև դրական է գնահատում Հնդկաստանի հետ հարաբերությունների կարգավորումը, որոնք դիվանագիտականից թևակոխում են ռազմաքաղաքական դաշտ։ Ըստ նրա՝ ՀՀ-ն պետք է փորձի նույն կերպ հարաբերություններ հաստատել Չինաստանի հետ։

«Ես դրական եմ գնահատում Կառավարության կողմից Հնդկաստանի հետ հարաբերությունների փոփոխությունները։ Մեր ազգը շատ մեծ դերակատարում է ունեցել Եվրոպայի հետ առևտուրի զարգացման հարցում Հնդկաստանի համար։ Հանդիպում էի ունեցել Հայաստանում Հնդկաստանի նախկին դեսպանի հետ, որը կարևորեց այն հարցը, որ Հնդկաստանը պատրաստ է օգնել Հայաստանին. պետք է հստակեցնել ուղղություններն օգնության համար։ Հիմա նաև ամբողջ աշխարհն է ձգտում լավացնել հարաբերությունները Չինաստանի հետ, վերջերս էլ ՌԴ-ի և Չինաստանի ղեկավարները եռօրյա հանդիպումներ ունեցան»,- ընդգծում է նա։