Թևանյանն առաջարկում է նոր ընտրություններ, Մարությանը պնդում՝ կոալիցիա չի կազմի, «Դոգ»-ն էլ՝ պարտավորագիր ուզում

Երևանի նախկին քաղաքապետ, սեպտեմբերի 17-ին կայացած Երևանի ավագանու ընտրությունների ժամանակ «Ազգային առաջընթաց» կուսակցության ցուցակը գլխավորող Հայկ Մարությանը երեկ հայտարարեց, որ ընդունում է «Մայր Հայաստան» դաշինքի ցուցակը գլխավորող Անդրանիկ Թևանյանի պահանջը, այն է՝ կիսել Հայաստանում ամբողջական իշխանափոխություն անելու նրա քաղաքականությունը:

Իսկ «Հանրային ձայն» կուսակցության նախագահ Վարդան Ղուկասյանին, որը հանրության շրջանում առավել հայտնի է «Դոգ» մականվամբ, Մարությանը առաջարկեց ավագանու կազմից ստեղծել հանձնաժողով, և դրա նախագահ նշանակել «Հանրային ձայն»-ի անդամներից մեկին, որը կունենա բոլոր լծակները՝ վերահսկողություններ կատարելու:

Ինչ վերաբերում է Երևանի քաղաքապետարանի վերահսկողական վարչությունը այս կուսակցությանը տալուն, Մարությանն ասաց, որ դա քաղաքապետը չի նշանակում, իրականացվում է մրցույթի միջոցով, և չի կարող երաշխավորել, թե ով կընտրվի:

Մարությանի հայտարարությանը քիչ ուշ արձագանքեց «Մայր Հայաստան» դաշինքը՝ հայտնելով, որ պատրաստ է քվեարկել Մարությանի օգտին, և վերջինս դառնա քաղաքապետ: Իսկ «Հանրային ձայն»-ի նախագահ Վարդան Ղուկասյանը հայտնեց, որ չի պատրաստվում առանց որևէ ստորագրության, ասել է, թե, կոալիցիոն փաստաթղթի քվեարկել Մարությանի օգտին:

«Ազգային առաջընթաց» կուսակցությունը այսօր արդեն հայտարարություն է տարածել՝ պարզաբանելով, որ կուսակցությունը չի միացել որևէ ուժի և որևէ ուժ չի միացել իրենց, և որևէ կոալիցիայի մասին խոսք չի գնում։

«Մենք ասել ենք, որ դաշինքի չենք գնում, կոալիցիա չենք կազմում որևէ ուժի հետ։

Մենք ասել ենք ու ասում ենք՝ եթե ավագանու մանդատ ստացած ուժերը իրոք ցանկանում են իշխանությունից զրկել ՔՊ-ին Երևանում, ապա առաջարկում ենք քվեարկեք մեր թեկնածուի օգտին:

Մենք վերահաստատում ենք մեր խոստումը և նպատակը՝ ՔՊ պետք է հեռանա թե՛ Երևանի, թե՛ ՀՀ կառավարումից՝ ստեղծված աղետալի իրավիճակի և բոլոր ոլորտները ձախողելու համար։

«Մայր Հայաստան»-ը հայտարարել է, որ պատրաստ է ձայն տալ մեր առաջադրած թեկնածուին։ «Հանրային ձայն»-ը ևս համաձայն է, բայց պաշտոնի կամ պաշտոնների բաշխման պայման է դրել և պահանջում է կոալիցիոն պայմանագիր կնքել, ինչը հակասում է մեր սկզբնական առաջարկությանը։

Հետագա զարգացումների մասին կտրամադրվեն լրացուցիչ պարզաբանումներ։
Մենք հավատարիմ ենք մնալու մեր նախընտրական խոստումներին ու մեր սկզբունքներին»,- ասվում է պարզաբանման մեջ:

Իսկ ահա «Մայր Հայաստան» դաշինքն էլ այսօր նոր հայտարարություն է տարածել՝ նշելով, որ կոնսենսուսի բացակայության պայմաններում առաջարկում է Երևանի ավագանու նոր ընտրություններ։

««Մայր Հայաստան» դաշինքը, լիարժեքորեն հանձնառու լինելով իր հայտարարած սկզբունքներին, մասնավորապես՝ հասնելու ամբողջական իշխանափոխության և նոր ազգային իշխանությունների ձևավորման, որի համար Երևանի ավագանու ընտրությունները դիտարկվում են որպես մեկնարկային քայլ, ինչի համար ստացել է մեր համաքաղաքացիների անգնահատելի վստահությունը, գտնում է, որ ոչ իշխանական դաշտում կոնսենսուսը միակ պայմանն է, որի պարագայում հնարավոր է հասնել «Քաղաքացիական պայմանագրի» իշխանազրկմանը։

Հաշվի առնելով այս առումով մեր հանրության հետ ազնվորեն գործելու անհրաժեշտությունը՝ կոչ ենք անում ավագանու ընտրությունների արդյունքում ընդդիմադիր հռչակված կուսակցություններին հանդես գալու աներկբա հայտարարություններով և դիրքորոշումներով, որոնք տարաբնույթ մեկնաբանությունների տեղիք չեն տա և հնարավորություն կընձեռեն միասնական ջանքերով բացառելու գործող իշխանության վերարտադրումը։

Կոնսենսուսի բացակայության պարագայում՝ նիստին չներկայանալու և քվորում չապահովելու միջոցով, Երևանի ավագանու նոր ընտրությունների անցկացումը կմնա միակ լուծումը ստեղծված իրավիճակում»,- ասվում է հայտարարության մեջ: