Պատրաստ եմ իմ ամեն մի տողի համար պատասխան տալ. Թաթուլ Հակոբյանն արձագանքել է իր հրապարակած տեղեկատվության քննարկումներին

Այսօր առավոտյան հայտնի դարձավ, որ Ադրբեջանի նախագահ Իլհամ Ալիևը Ստեփանակերտ քաղաքի պարետ է նշանակել Սարդար Սաֆարովին, որը ոստիկանության գեներալ-մայոր է և ծնվել է 1973 թվականին Սումգայիթում:

Վերջինս ավարտել է Ֆիզիկական կուլտուրայի պետական ինստիտուտը, Թուրքիայի ժանդարմերիայի սպաների դպրոցը և Ադրբեջանի Հանրապետության ներքին գործերի նախարարության ոստիկանության ակադեմիան:

Ալիևի այս նշանակումը քննարկումների տեղիք տվեց հայկական մեդիատիրույթում՝ առաջացնելով նաև որոշակի զարմանք: Բանն այն է, որ օրեր առաջ լրագրող, վերլուծաբան Թաթուլ Հակոբյանը «Ֆեյսբուք»-ում արված գրառումների միջոցով հայտնել էր, թե ԼՂ-ում առաջին հայը նշանակվել է Ադրբեջանի ներկայացուցիչ:

Վերջինս սկզբում չէր ցանկացել նշել նշանակված անձի անուն-ազգանունը՝ համարելով հարցը զգայուն: Հակոբյանը միայն մանրամասնել էր, որ նշանակված անձը միջին կարգի պաշտոնյա է եղել ԼՂ կրթության նախարարությունում, Շուշիի շրջանի վարչակազմում, բարեկամական սերտ կապեր ունի ԼՂ Ազգային ժողովում ընդդիմադիր խմբակցության պատգամավորներից մեկի հետ և ԼՂ նախկին նախագահներից մեկի հետ՝ քավոր-սանիկական կապեր»:

Այնուհետև, երբ լուրը կայծակնային արագությամբ տարածվել էր հայկական և ադրբեջանական մեդիատիրույթում, Հակոբյանը հրապարակել էր նշված անձի լուսանկարը և անուն ազգանունը: Նա Սարգիս Գալստյանն էր, որը ԼՂ կրթության նախարարության աշխատակազմի ղեկավարի տեղակալն էր, ավելի վաղ եղել էր Շուշիի շրջանի վարչակազմում պաշտոնյա:

Լրատվամիջոցների հետ զրույցում ԼՂ Ազգային ժողովի «Արդարություն» խմբակցության պատգամավոր Դավիթ Գալստյանը հերքել էր այս տեղեկությունը, թե իր հորեղբայրը նշանակվել է Ստեփանակերտի պարետ՝ դա համարելով անհեթեթություն:

Այսօր արդեն «Արդարություն» խմբակցության ղեկավար Դավիթ Գալստյանը հայտնել է, որ Սարգիս Գալստյանի ընտանիքի անդամները խորհրդակցություն են անցկացնում իրավաբանների հետ Թաթուլ Հակոբյանի դեմ դատական հայց ներկայացնելու վերաբերյալ՝ զրպարտության համար:

Իսկ ահա Թաթուլ Հակոբյանը, անդրադառնալով իր հասցեին հնչող քննադատություններին, «Ֆեյսբուք»-ի էջում գրել է, որ պատրաստ է իր ամեն մի տողի համար պատասխան տալ, քանի որ իր մասնագիտությանը և հանրության հետ աշխատանքին լուրջ է վերաբերվում:

«Ես հավասարապես պատրաստ եմ սխալ տեղեկատվության համար ներողամտություն հայցել Պուտինից, Ալիևից, Էրդողանից, Շահրամանյանից, Փաշինյանից»,- գրելէ նա:

Ինչ վերաբերում է իր դեմ պատրաստվող հայցին, վերջինս նկատել է. «Արցախից Հայաստան տեղափոխված իմ ընկերներից մեկը, ով ծանոթ-բարեկամ է Սարգիս Գալստյանին, Երևանից զանգահարել է նրան և հարցրել, թե ինչ է անում Ստեփանակերտում: Գալստյանը, ինչպես ինձ փոխանցել էր նրա բարեկամը, ասել է, որ ինքը նշանակվել է ժամանակավոր կամենդանտ, ասել է, որ ինքը խոսում է Խանքենդիից, իր բարեկամներին, ովքեր ստիպված արտագաղթել են Հայաստան, խորհուրդ է տվել վերադառնալ Ղարաբաղ:

Այս լուրը տալիս ես չեմ նշել անուն-ազգանուն: Այն բանից հետո, երբ ադրբեջանական «Աղդամ ԹՎ»-ին Գալստյանի նկարով տվեց նման լուր, գուցե իմ էջեց են վերցրել, ես հրապարակեցի Սարգիս Գալստյանի անունը: Նրա նկարը ես չունեի, քանի որ իր ֆեյսբուքյան էջը այլ անունով է: Հետո գտա նրա Ֆեյսբուքի էջը՝ Սարար Շուշի, բնակվում է՝ Սանկտ Պետերբուրգում:

Հնարավո՞ր է ինձ մոլորության մեջ են գցել: Գրեթե բացառում եմ:

Մի քանի օր անց մամուլում հրապարակվեց մի հրամանագիր-փաստաթուղթ, ըստ որի՝ Արցախի նախագահ Սամվել Շահրամանյանը, նախքան Արցախը գոյությունը դադարեցնելու մասին հրամանագիրը, իր աշխատակից Գալստյանին պաշտոնի է նշանակել:

Գուցե Գալստյանը, ժամանակավոր կամենդանտ ասելով, սա է՞ նկատի ունեցել: Դժվարանում եմ ասել:

Ինձ ասացին նաև, դեռ չեմ նայել, ղեկին էի, որ Գալստյանը և իր բարեկամները, որ տեղափոխվել են Հայաստան, պատրաստվում են իմ դեմ դատական հայց ներկայացնել:

Սա շատ ողջունելի և քաղաքակիրթ եղանակ է: Շատ ցանկալի կլիներ, որ Գալստյանը անձամբ ներկա լիներ դատարանում: Երկու օր առաջ նրա հետ կապ են հաստատել, և, ըստ նրա բարեկամի, Գալստյանը դեռևս Արցախում է: Դատական պրոցեսը նաև կարող է օգտակար տեղեկատվությունների պատճառ դառնալ, հատկապես այսօր, երբ Արցախում իշխանափոխություն իրականացրած անձինք որևէ ձևով չեն պատասխանում լրագրողների հարցերին:

Իմ դեմ դատական հայցը, այո, կարող է շատ օգտակար լինել»: