Նորածինը մահացել է

Դեպքի կապակցությամբ ոստիկանության Վայոց ձորի մարզի քննչական բաժնում նախապատրաստվում են նյութեր, եւ նորածնի մահվան ստույգ պատճառները հայտնի կդառնան դատաբժշկական փորձաքննության եզրակացությունից հետո: Առայժմ միայն, «Մուրացան» հիվանդանոցի նորածնային վերակենդանացման բաժանմունքի վարիչ Հրանտ Կալենտերյանը մեզ հետ զրույցում նշեց. «Սուր ասֆիքսիայի պատճառով է երեխան ընդունվել մեզ մոտ: Դա սուր զարգացող թթվածնային քաղցն է օրգանիզմում, որի հետեւանքով զարգացել է ուղեղի այտուց եւ նման ծանր վիճակ` օրգանիզմի ընդհանուր բազմաօրգան անբավարարություն: Երեխայի կյանքը հաջողվեց պահպանել 15 օր, սակայն, ցավոք սրտի, թթվածնային քաղցի հիմնական բարդությունները, որոնք բերում են բոլոր օրգան համակարգերի աշխատանքի խաթարման, մեզ չհաջողվեց վերացնել»: Բժշկի խոսքով, թթվածնային քաղցի պատճառ կարող էր լինել այն, որ պորտալարը երեք անգամ փաթաթված է եղել  երեխայի վզին: «Դա` ըստ բժշկական փաստաթղթերի եւ ըստ Վայքի` ծնունդն ընդունող բուժանձնակազմի հայտնած տվյալների: Ամեն դեպքում կլինիկան, իհարկե, 100 տոկոսով նման է ծանր ասֆիքսիայի կլինիկայի»,- ասաց բժիշկը:

Նշենք, որ ծննդկանի հարազատները մի շարք մեղադրանքներ էին հնչեցնում Վայքի հիվանդանոցի ծննդաբերական բաժանմունքի վարիչ Մետաքսյա Հովհաննիսյանի հասցեին, պնդում, որ ծննդաբերության ընթացքում նա սեղմել է երեխայի գլուխը, ինչի հետեւանքով նորածինը գլխուղեղի արյան զեղում է ստացել: Հարազատները փոխանցել էին նաեւ, որ Երեւանի բժիշկները երեխայի խնդրով դիմել են անգլիացի իրենց գործընկերներին: 

«Այնտեղից պատասխանը գալիս է, որ ուժեղ հարվածից ուղեղի վրա արյուն է զեղված: Հնարավոր չէ այդ երեխային ոչ առաջ բերել, ոչ հետ: Այդպես ինչքան պիտի ապրի»,- պատմել էր հարազատներից Ծովինար Խաչատրյանը: Անդրադառնալով արյան զեղմանը վերաբերող հարցին` «Մուրացանի» նորածնային վերակենդանացման բաժանմունքի վարիչը պատասխանեց. «Տեսանելի ոչ մի հարված չկար: Հիպոքսիայի հետեւանքով կամ ծննդաբերության ընթացքում արյունազեղում կարող է զարգանալ, բայց մեր կատարած հետազոտումները չեն վկայում արյունազեղման մասին, որովհետեւ սոնոգրաֆիկ հետազոտությունը սահմանափակ հնարավորություն ունի, ամբողջ ուղեղը չի կարող վերցնել իր դիտարկման տակ: Չի բացառվում արյունազեղում, բայց մենք չենք հաստատել: Դա կարելի էր հաստատել կոմպյուտերային տոմոգրաֆիայով, բայց երեխայի վիճակը այնքան ծանր էր, որ հնարավոր չէր տանել, նման հետազոտություն անցկացնել»,- նկատեց բժիշկ Կալենտերյանը: Սոնոգրաֆիկ հետազոտությունների եզրակացության մասին անգլիացի գործընկերներին դիմել է «Մարգարյան» ծննդատան բժիշկ Պավել Մազմանյանը: Երեկ մեզ հետ զրույցում նա ասաց, որ անգլիացիներից պատասխան դեռ չի ստացվել:

Իսկ ահա ՀՀ առողջապահության նախարարությունը  չի շտապում  եզրակացություններ ու գնահատականներ ներկայացնել, չնայած համապատասխան հանձնաժողով նախարարի հանձնարարությամբ ստեղծվել էր օգոստոսի 31-ին: Չի շտապում, որովհետեւ նախ դեռեւս չի հանգել վերջնական եզրակացության, հետո էլ  «ՀՀ Քրեական դատավարության օրենսգրքի պահանջներին համապատասխան` առողջապահության նախարարությունը իրավասու է նախնական քննության տվյալները հրապարակել միայն գործի վարույթն իրականացնող մարմնի թույլտվությամբ»: «Բոլոր դեպքերում նախարարությունը նույնպես զուգահեռաբար մասնագիտական վարույթ անում է, եւ այդ գործընթացի մասնակից է»,- ասաց ԱՆ մոր եւ մանկան առողջության պահպանման վարչության պետ Կարինե Սարիբեկյանը: Նա նկատեց, որ գլխուղեղի արյան զեղումը, եթե դա եղած լինի, իհարկե, կարող էր երեխայի մահվան պատճառ դառնալ, բայց նաեւ ծննդկանի հարազատների` այդ մասին հայտարարությունները  իրականությունից հեռու համարեց: «Երեխայի գլուխը դուրս է եկել, բժիշկը կամ բուժքույրը ձեռքով պահել են, որ դուրս չգա եւ գլխի մեջ արյունազեղո՞ւմ է առաջացել: Իրենց նկարագրածով դա է»,- ասաց վարչության պետը: Վերջինս անդրադարձավ ծննդկանի հարազատների մեկ այլ հայտարարությանը, թե ծննդաբերական բաժանմունքի վարիչ Մետաքսյա Հովհաննիսյանը արդեն ծննդաբերող կնոջը միայն մի քանի ժամ հետո է այցելել` պահանջելով ծննդաբերության պրոցեսը ձգձգել այնքան, քանի դեռ ինքն իր բուրդը չի չփխել: «Բայց ծննդաբերական գործընթացը դադարեցնել կամ դանդաղեցնել հնարավոր չէ: Արագացնել հնարավոր է, խթանել հնարավոր է: Ընդ որում, երբ հորը հարցրիք, որ լավ, բժշկի գալուց հետո երեխան ե՞րբ ծնվեց, նա պատասխանեց` ժամուկես հետո: Աբսուրդ է, անհնար բան է,- ընդգծեց Կարինե Սարիբեկյանը եւ հավելեց:- Ուզում եմ ասել` պատկերացումները ժողովրդական են, մեկնաբանություններն էլ ոչ պրոֆեսիոնալ»: