100 երաժիշտ մեկ բեմում. Գյումրիում մեկ լեզվով են խոսել տեղի պետական և Բրյուսելի եվրոպական դպրոցի սիմֆոնիկ նվագախմբերը

Նախագիծը ծնունդ է առել իմ ու Արմանի հեռախոսային զրույցից: Արմանը ոնց որ մի փոքր հուշեր, որ իր նվագախումբն այս տարի հյուրախաղերի է պատրաստվում, ես էլ պահը որսացի, ասացի՝ գուցե Հայաստա՞ն գաք:

Հեռախոսային այս զրույցը 2024-ի տարեսկզբին ունեցել են Գյումրու պետական սիմֆոնիկ և Բրյուսելի եվրոպական դպրոցի սիմֆոնիկ նվագախմբերի դիրիժորներ Երվանդ Վարոսյանն ու Արման Սիմոնյանը: Դրական պատասխանի համար Արմանը երկար սպասեցնել չի տվել: Հայաստան այցելելու միտքը ոգևորել է նաև նվագախմբի բելգիացի երաժիշտ-կատարողներին:

Համաձայնությունը գործի վերածած Գյումրու Սև բերդ ամրոցի բեմ բարձրացավ «100 երաժիշտ մեկ բեմում» համատեղ նախագիծը: Ծրագրում՝ Ֆրանց Շուբերտ, Ժորժ Բիզե, Անտոնին Դվորժակ, Կլաուս Բադելտ, Հովարդ Շոր, Խաչատուր Ավետիսյան:

Գյումրիում ծնված, այնուհետև ընտանիքով ՌԴ, հետո էլ Բելգիայում հաստատված Արմանը հայրենիք հյուր է եկել 2018 թվականին: «Հայկական ժամանակ»-ի հետ զրույցում նա հուզմունքը չի կարողանում թաքցնել: Ասում է՝ 30 տարի անց վերադարձը անբացատրելի զգացողություններ է արթնացրել, որն անուն ու նկարագրություն չունի: Հայրենիքի ուժն ու էներգիան ուրիշ են:

«10 տարեկանից գնացել եմ: 30 տարի չէի եղել Հայաստանում ու երբ եկա, չգիտեմ՝ ինչ կատարվեց, անբացատրելի է զգացածս: Դրանից հետո պարբերաբար սկսեցի գալ ու տարբեր նախագծեր բերել: Ես սիրում եմ Հայաստանն ու վստահ եմ, որ իմ հայրենիքում ամեն ինչ լավ է լինելու»,- ասում է Արմանը:

Համատեղ համերգ, համատեղ դիրիժորություն: Գյումրու պետական սիմֆոնիկ նվագախմբի դիրիժոր Երվանդ Վարոսյանը փորձերի ժամանակ հեշտությամբ է հաղթահարել լեզվական բարիերը. խոսել են միջազգային՝ երաժշտության լեզվով:

«Բոլոր երկրներում համաշխարհային դասականները հնչում են նույն կերպ: Եվ այս պարագայում մեզ համար հեշտ էր, իրենք էլ էին պատրաստված, մենք էլ, և մեկ-երկու փորձով հնարավոր եղավ այս ծրագիրը կյանքի կոչել: Մեր լեզուն երաժշտությունն է, թե չէ հայերեն, անգլերեն, կամ այլ լեզվով խոսելը էական չէ»,- ասում է նա:

Գյումրու պետական սիմֆոնիկ նվագախումբն այս համերգի ժամանակ իր կազմում ընդգրկել է նաև Գյումրու Մանսուրյան պատանեկան կամերային նվագախմբի երաժիշտներին, Կոմիտասի անվան կոնսերվատորիայի մասնաճյուղի, երաժշտական քոլեջից և Գյումրու արվեստի ու երաժշտական դպրոցների կատարողներին:

Երվանդ Վարոսյանն ասում է՝ նպատակը մեկն էր՝ համագործակցություն, փոխշփում երեխաների, օտարազգի իրենց հասակակիցների հետ:

Գյումրու պետական սիմֆոնիկ նվագախմբի տնօրեն Սոնա Հովհաննիսյանը կարևորում է նման ծրագրերը թե՛ Գյումրու, թե՛ արտերկրի համար:

«Բեմում մեծերի կողին 9-18 տարեկան երեխաներ են: Ծրագրի նպատակն է դասական երաժշտության ասպարեզ բերել երեխային, ցույց տալ, թե այդ ուղին ընտրելով՝ ուր կարող է հասնել, ցույց տալ, թե ուր է տանում իրեն այդ ուղին: Պրոֆեսիոնալի կողքին երբ մանկահասակ երեխան սկսում է նվագել մեծ բեմում, ինքն իր առջևում երևի տեսնում է այդ տեսլականը, թե ինչպիսի բեմեր է նվաճելու»,- ասում է Հովհաննիսյանը:

Իրենց այցով նաև հյուրերն են ոգևորված: Երեխաները զարմացած են, որ կարողացել են հասկանալ ու ընկալել հայերենով իրենց հետ հաղորդակցվող երաժիշտ-ընկերներին, նույնը նաև հայ երեխաներն են բարձրաձայնում:

Բրյուսելից 47 երաժիշտ է եկել Գյումրի: Նրանց հետ նաև ծնողներն ու հարազատներն են, որոնք ոգևորված են և՛ Հայաստան այցելելուց, և՛ նոր ծանոթություններից: Ասում են՝ երբեք չէին մտածել, որ իրենց երեխաները կրող էին նվագել իրական, պատմական բերդում, իրենք էլ նստեին ու վայելելին որպես ունկնդիր:

Արման Սիմոնյանն էլ ավելացնում է՝ թեև գլխավորը միասին նվագելն էր, սակայն իր առաջին ցանկությունը Բրյուսելի իր նվագախմբի երեխաներին Հայաստանը ներկայացնելն էր: