ՀՀ-ում գրիպով և այլ վիրուսներով հոսպիտալացվածների մեծ մասը երեխաներ են. առաջիկայում սպասվում է վարակվածության աճ

Վերջին 38 շաբաթվա ընթացքում առողջապահության առաջնային պահպանման օղակներ է (պոլիկլինիկա) դիմել սուր շնչառական վիրուսներով վարակված 3 հազար 15 պացիենտ։ Նախորդ շաբաթվա համեմատ վիրուսային հիվանդություններով վարակվածությունն աճել է 1,1 անգամ։

Վիճակագրությունը «Հայկական ժամանակ»-ի հետ զրույցում ներկայացնում է Առողջապահության նախարարության Հիվանդությունների վերահսկման և կանխարգելման ազգային կենտրոնի համաճարակաբանության վարակիչ և ոչ վարակիչ հիվանդությունների վարչության բժիշկ, համաճարակաբան Աիդա Հովհաննիսյանը։

Ըստ մասնագետի՝ ցուցանիշները դեռևս անհանգստացնող չեն, սակայն հոկտեմբերի առաջին շաբաթից Հայաստանում սպասվում է ՍՇՎ հիվանդությունով պայմանավորված վարակվածության դեպքերի ակտիվություն։

«Սեզոնային է, այսինքն՝ հոկտեմբերի մեկից մինչև մայիս ամիսը մենք ունենում ենք այդ վիրուսներով վարակվածության բարձր ցուցանիշ։ Առհասարակ կարող ենք ասել, որ հիմա էլ ունենք աճ, բայց դա բնորոշ է սեզոնի այս ժամանակահատվածին։ Այժմ գրանցված դեպքերի 76 տոկոսը արձանագրվել է 0-18 տարեկան երեխաների շրջանում։ Վիրուսներով պայմանավորված հոսպիտալացումները նախորդ շաբաթվա համեմատ կազմել են 94,1 տոկոս, հոսպիտալացվածների 94,1 տոկոսը կրկին 0-18 տարեկան երեխաներն են»,- ասում է նա։

Ծանր շնչառական վարակներով, թոքաբորբով պայմանավորված հոսպիտալացումները նախորդ շաբաթվա համեմատ աճել են 1,3 անգամ, այդ դեպքերի 91 տոկոսը ևս 0-18 տարեկան երեխաներն են։ Այս պահին հիվանդությամբ պայմանավորված միջին ակտիվություն զգացվում է միայն Արարատի մարզում, նկատում է Հովհաննիսյանը։

«2023 թվականից մեզ մոտ շրջանառվում են գրիպ Ա տեսակի H3N2 և H1N1 ենթատեսակները, այլ շնչառական վարակներից՝ պարագրիպի, ռեսպիրատոր սինցիտիալ վիրուսի, ռինովիրուսի, մետապնևմովիրուսի, բոկավիրուսի և կորոնավիրուսային հիվանդության SARS-COV-2-ի հարուցիչներ, ինչպես նաև գրանցվում են համակցված վարակներ, ինչպիսիք են՝ ռինովիրուսի և ռեսպիրատոր սինցիտիալ վիրուսի, ռինովիրուսի և ադենովիրուսի, ռինովիրուսի և բոկավիրուսի հարուցիչներ։ Կորոնավիրուսային հիվանդության ցուցանիշները թեև կան, բայց վերջին 7 օրվա ընթացքում դեպքերը նվազել են»,- ասում է նա։

Մասնագետը նշում է, որ ՍՇՎ վիրուսների ախտանշաններից են ջերմության բարձրացումը, թուլությունը, հոդացավը, մկանացավը։ Ընդ որում՝ այս ախտանշանները չեն տարբերվում մեծերի և երեխաների դեպքում։ Վիրուսներից առաջացող բարդությունները ևս հիմնականում նույն են լինում։

Վերջինս պարզաբանում է, թե ինչի հետևանքով են առաջանում բարդությունները, եթե մարդը վարակվել է ՍՇՎ-ով․ «Հիմնական բարդությունը, որ կարող է առաջանալ, թոքաբորբն է։ Մեր հասարակության մեջ ընդունված է, որ ՍՇՎ-ները (սուր շնչառական վիրուսային ինֆեկցիա) վտանգավոր չեն, լուրջ հիվանդություններ չեն, դրա համար նախընտրում են տանը բուժվել, չդիմել բժշկական կենտրոններ։ Վերակենդանացման բաժանմունքներում հայտնվելու պատճառներից մեկն էլ է դա, որ ուշ են դիմում բժշկի։ Քանի որ երեխաները շնչառական առանձնահատկություններ ունեն, և ծնողն էլ ուշ է դիմում, նրանց մոտ ևս բարդություններ են առաջանում»։

ՀՎԿԱԿ-ի մասնագետը զգուշացնում է, որ ՍՇ վիրուսները տարածվում են միայն օդակաթիլային ճանապարհով։ Ախտանշանների դեպքում անհրաժեշտ է դիմել բժշկի, չզբաղվել ինքնաբուժությամբ, չընդունել հակաբիոտիկներ, որոնք ավելի շատ ոչ թե դրական, այլ անտեղի օգտագործման դեպքում բացասական ազդեցություն կունենան առողջության վրա։

Վիրուսներից խուսափելու արդյունավետ միջոցը, ըստ Հովհաննիսյանի, պատվաստվելն է սեզոնային գրիպի դեմ՝ դիմելով առողջության առաջնային պահպանման օղակ. ներկայում հանրապետությունում առկա գրիպի պատվաստանյութը պաշտպանում է գրիպի երկու Ա և երկու Բ ենթատեսակներից։

Բացի դրանից անհրաժեշտ է՝

հագնվե՛լ եղանակին համահունչ

օգտագործե՛լ հնարավորինս շատ հեղուկներ

հաճախակի օդափոխե՛լ փակ տարածքները

հաճախակի լվանա՛լ ձեռքերը

խուսափե՛լ սուր շնչառական վարակներին բնորոշ երևույթներով հիվանդների հետ շփումից

եթե հիվանդ եք, մնա՛լ տանը, հատկապես՝ սուր շնչառական վարակներին բնորոշ ախտանշաններով երեխաներին մի՛ թույլատրեք հաճախել դպրոց և մանկապարտեզ՝ ապահովելով բժշկի կողմից խորհրդատվությունը և բուժումը

չօգտագործել հակաբիոտիկներ, քանի որ դրանք ցուցված չեն գրիպի և սուր շնչառական վարակների բուժման համար

պահպանե՛լ հազի և փռշտալու վարվելակարգը

Գրիպի դեմ ռիսկային խմբում են քրոնիկ հիվանդություններ ունեցող անձինք, 6 ամսականից 5 տարեկան երեխաները, 65 և բարձր տարիքի անձինք: Այս խմբում ներառված են նաև փակ հաստատություններում (երեխաների խնամքի և պաշտպանության հաստատություն, խնամքի տուն և այլն) գտնվող անձինք, բուժաշխատողներն ու հղիները:

Մերի Խաչատրյան