Ինքս էլ կարող եմ դիմել ՍԴ. Վարդան Ղուկասյանի՝ Կառավարությանը դատի տալու նախագիծը հանվել է նիստի օրակարգից

Օրակարգային նախավերջին 19-րդ հարցը՝ սկզբում: Այս դասավորությամբ է այսօր մեկնարկել Գյումրու ավագանու նիստը: Վարդան Ղուկասյանի հեղինակած նախագիծը, որն ըստ էության ՀՀ կառավարությանը դատի տալու մասին է, բուռն քննարկումների և փոխադարձ ակնարկների պատճառ է դարձել:

Վարդան Ղուկասյանը գտել է, որ անհրաժեշտ է Սահմանադրական դատարան դիմում ներկայացնել՝ վիճարկելու ՀՀ 2024 թվականի «Պետական բյուջեի մասին» օրենքի 7-րդ հոդվածի 5-րդ կետը Սահմանադրությանը համապատասխանության հարցը: Իրականացման համար փաստաբանական խումբ է պետք, խմբին վճարելու համար էլ՝ համայնքի բյուջեից 6 միլիոն դրամ:

Ըստ Վարդան Ղուկասյանի՝ Գյումրուց հավաքագրվում է 85 միլիարդ դրամ, սակայն շատ քիչ մասհանում արվում՝ ընդամենը 4 մլրդ դրամ։

Ղուկասյանն ասաց՝ Գյումրիում Կառավարության կողմից իրականացվող աշխատանք չկա՝ բացի ասֆալտապատումից:

Գյումրու ավագանու «Քաղաքացիական պայմանագիր» խմբակցությունն ընդգծեց՝ 2018-ից սկսած մինչ օրս ամենատարբեր ծրագրերի իրականացման համար Գյումրիում 77.1 միլիարդ դրամի ներդրում է արել ՀՀ կառավարությունը, ազդեցությունն իր վրա անձամբ գյումրեցին զգում է:

«Ես ցավում եմ, որ 70 միլիարդ դրամ է ներդրված Գյումրի քաղաքի զարգացմանը, և էդ 70 միլիարդից մեկ աշխատատեղ չի ավելացել, մի բնակարան չի կառուցվել: Կողմնակից եմ, որ գումարները բերում են, բերում են, որ երկիրը գցեն այլ երկրների ազդեցության տակ․ դա էլ հատուկ քաղաքականություն է»,- ասաց Ղուկասյանը։

Բացի ՀԿԿ-ից՝ ոչ մի խմբակցություն կողմ չէր Ղուկասյանի նախագծի քննարկմանը: Ըստ աշխատակազմի քարտուղարի՝ հավանաբար խմբակցությունները ներքին համոզմունք չունեն, դրա համար էլ ուզում են մեկ անգամ ևս վերանայել նախագիծը:

Գյումրու ավագանու «Քաղաքացիական պայմանագիր» խմբակցության քարտուղար Քնարիկ Հարությունյանն ասաց՝ ֆիքսենք, որ դատի եք տալիս Կառավարությանը:

«Դուք նման բան չէիք կարող անել նախկինում և այսչափ գումար պահանջել, որովհետև նախկինում ՀՀ բյուջեն 2 անգամ պակաս էր: Մի պահ պատկերացնենք հակառակը, որ ՀՀ կառավարությունը դատի է տալիս Գյումրու համայնքապետարանին: Պատկերացնում եմ, թե հակառակ կողմից ինչ էմոցիաներ կլինեին, ինչ ճնշումների, սահմանափակումների մասին կխոսեիք: Բայց կեցցե ազատ ու անկախ Հայաստանը, շատ լավ է, որ մենք ապրում ենք ժողովրդավարական երկրում, և դուք նման լիազորություն ունեք: Բայց այս կերպ Դուք խոչընդոտում եք Կառավարություն-համայնք աշխատանքը և խանգարում եք Գյումրու զարգացմանը»,- ասաց Հարությունյանը:

«Իմ հզոր համայնք» խմբակցության ղեկավար Ռուբեն Մխիթարյանն ասաց՝ հրավիրեք Հրանտ Բագրատյանին ու իր խմբին, որ համատեղ քննարկում կայանա: Վարդան Ղուկասյանը համաձայնեց, հարցը հանեց օրակարգից՝ ընդգծելով, թե ինքը միանձնյա էլ կարող է դիմել ՍԴ, ուղղակի ուզում է, որ ավագանու ընդդիմադիր խմբակցություններն էլ այդ հարցում մասնակցություն ունենան:

«Մեր քաղաքը» խմբակցության ղեկավար Լիզա Գասպարյանը նկատեց՝ քաղաքապետն անձամբ ասաց, որ ունի մանդատ և իրավազոր է անձամբ դիմել ՍԴ:

«Ամեն դեպքում պետք է առաջարկենք, որ օգտվեք այդ մանդատից, որովհետև իրավական առումով, անկեղծ ասած, ավագանին այնքան էլ տեղեկացված չէ, ժամանակ էլ չի եղել հետազոտելու: Դուք ասացիք, որ կուզեիք տեսնել խմբակցությունների տրամադրվածությունները, մենք, անկախ ամեն ինչից, որ հայտ էինք ներկայացրել քաղաքի կառավարման ղեկը վերցնելու, բոլորս, բնականաբար, ունեինք քաղաքի զարգացման մեր տեսլականը, և սա Ձեր քարոզարշավի թեզերից մեկն է»,- ասաց Գասպարյանը: