Այսինքն, մի՛ ասեք այսինքն

Կհաջողվի՞ այսօր ոչ իշխանական խորհրդարանական չորս ուժերին համաձայնության գալ վարչապետին անվստահություն հայտնելու գործընթաց սկսելու շուրջ. արդեն կեսօրին, թերեւս, հստակ կլինի:

Իհարկե, նախօրեին ԱԺ «Ժառանգություն» խմբակցության ղեկավար Ռուբեն Հակոբյանը մեզ վստահեցնում էր, որ գործընթաց անպայման կսկսվի, բայց միանշանակ պնդել, որ այդ գործընթացը ԱԺ հենց առաջիկա քառօրյայում կհարուցվի, դեռեւս մեծ հարցականի տակ է: Ու մինչ չորս ուժերը կկողմնորոշվեն, հարց է ծագում` արդյո՞ք նրանք վարչապետի թեկնածու ունեն եւ հնարավո՞ր է` նաեւ Սերժ Սարգսյանին անվստահություն հայտնելու գործընթաց սկսեն Ազգային ժողովում կամ` ինչու՞ հիմա հանդես չեն գալիս նման նախաձեռնությամբ: Սույն հարցերը երեկ տվել ենք բոլոր չորս ուժերի ներկայացուցիչներին: «Ժառանգություն» խմբակցության քարտուղար Թեւան Պողոսյանը մեր թղթակցի հետ զրույցում մի քանի անգամ կրկնել է, որ բոլոր հարցերի պատասխանը հստակ կլինի 4 ուժերի բանակցությունների ավարտից հետո:

- Պարոն Պողոսյան, ինչո՞ւ նույն ուժերը Սերժ Սարգսյանի իմպիչմենտի նախաձեռնությամբ հանդես չեն գալիս:

- Կարծես թե «Ժառանգության», ինչպես նաեւ Դաշնակցության կողմից եղել են առաջարկներ, որտեղ իրենք խոսում են, որ պետք չէ դնել միայն կառավարության հրաժարականի հարցը, այլ ավելի համակարգային փոփոխությունների հարց պետք է դնել: Այնպես որ, սպասենք, տեսնենք, թե քննարկումներն ինչպիսի ավարտ կունենան:

- Ե՞րբ է «Ժառանգությունը» Սերժ Սարգսյանի իմպիչմենտի հարցը դրել:

- Ռուբեն Հակոբյանն իր հարցազրույցներում է ասել, որ հարցը համակարգին է վերաբերում եւ ոչ թե մեկ խնդրի, եւ ի վերջո պետք է գիտակցենք, որ անձերի փոփոխության հարց չէ այն իրավիճակը, որ ունենք Հայաստանում: Դրա համար եմ ասում` քննարկումներն ավարտվեն, հետո պարզ կլինի:

- Իսկ վարչապետի թեկնածու ունե՞ք:

- Այս րոպեի դրությամբ «Ժառանգությունը» կոնկրետ անձի խնդիր չի դրել եւ անուններ տալու իմաստ չեմ տեսնում: Ես վստահ եմ, որ ընդդիմության մեջ կան կարող ուժեր եւ չեմ համարում, որ խնդիրը իրականում անձերի շրջանակի մեջ է: Այսօրվա իրավիճակը, որ ունենք` փոփոխություններն այդ գաղափարով պետք է լինեն:

- Բայց քննարկումների ժամանակ վարչապետի թեկնածուի անուն շրջանառվե՞լ է, թե` ոչ:

- Դեռ անունների մասին ոչ խոսվել է, ոչ էլ առայժմ կխոսվի, մինչեւ վերջնական դեռ որոշված չէ այն մոտեցումը, որով պետք է շարժվենք առաջ: Եւ եթե մոտեցումը գնա միայն կառավարության իմաստով, ապա դժվար է ասել, թե ինչպես կշարունակվի հետագա համագործակցությունը:   

ԲՀԿ-ական պատգամավոր, ԲՀԿ մամուլի խոսնակ Տիգրան Ուրիխանյանի հետ մեր զրույցը պակաս հետաքրքիր չէր: 

- Պարոն Ուրիխանյան, Սերժ Սարգսյանին անվստահություն հայտնելու գործընթաց ինչո՞ւ չեք սկսում չորս ուժերով:

- Ես կոմպետենտ չեմ չորս ուժերի անունից խոսելու:

- Բայց երբ որոշում է կայացվում, նաեւ ձեր անունից է չէ՞ կայացնում:

- Եթե ինչ-որ որոշում, երբեւէ, որեւէ, առհասարակ որոշում եթե ու երբեւէ կայացվի, եւ եթե իմ կուսակցությունն ինձ հանձնարարի որեւէ տեղեկատվություն լրատվամիջոցներին տրամադրել, ես ձեզ սիրով կտեղեկացնեմ: Եւ ձեր առաջին հարցի հետ ոչ մի ձեւով կապ չունի իմ պատասխանը:

- Այսինքն, Սերժ Սարգսյանին անվստահություն հայտնելու հարց (հարցը կիսատ է մնում):

- Ոչ մի այսինքնով նախադասություն տվյալ դեպքում տեղին չէ:

- Ես ուղիղ եմ հարցնում` Սերժ Սարգսյանին անվստահություն հայտնելու հարց չի քննարկվո՞ւմ:

- Ես չգիտեմ: Ես չեմ մասնակցում այդ բանակցություններին:

- Քանի որ արդեն հայտարարվել է, որ առաջիկա քառօրյայում վարչապետին անվստահություն հայտնելու գործընթացը հնարավոր է սկսվի, դուք տեղյա՞կ եք` եթե այդ գործընթացը ստացվի, վարչապետի ի՞նչ թեկնածու են առաջադրելու չորս ուժերով: Կա՞ թեկնածու:

- Խնդրում եմ, որպեսզի թույլ տաք խոսեմ փաստացի տեղի ունեցող կամ արդեն տեղի ունեցած իրադարձությունների մասին: Եթե 4 ուժերը համատեղ կայացնեն որեւէ որոշում եւ երբ այն կայացնեն եւ եթե իմ կուսակցությունն ինձ որեւէ տեղեկատվություն հայտնի, ես կփոխանցեմ:

- Այսինքն, անվստահություն հայտնելու գործընթացի շուրջ է՞լ որոշում չկա:

- Ես խնդրում եմ, որպեսզի այսինքնով սկսվող նախադասություններ չհամադրեք իմ ասածներին:

- Ես ձեր պատասխանի կապակցությամբ պարզաբանում էի ուզում:

- Ես տվեցի պատասխան իմ կոմպետենտության շրջանակներում:

ԱԺ ՀՅԴ խմբակցության ղեկավար Արմեն Ռուստամյանն ընդհանրապես չպատասխանեց մեր հարցերին` նշելով, որ նպատակահարմար չէ այսօր կայանալիք փակ հանդիպումից առաջ որեւէ հայտարարություններով կամ մեկնաբանություններով հանդես գալը:

ՀԱԿ խմբակցության պատգամավոր Լյուդմիլա Սարգսյանն էլ ասաց, որ որեւէ գործընթաց սկսելուց առաջ, նախ` պետք է հաշվարկվի, թե որքանով է դա այդ պահին ռեալ:

- Տիկին Սարգսյան, ինչո՞ւ Սերժ Սարգսյանի իմպիչմենտի նախաձեռնությամբ հանդես չեք գալիս:

- Այդ հարցը միշտ էլ եղել է մեր օրակարգում, բայց պիտի հասկանանք, թե որքանով է դա ռեալ այս պահին: Չեմ կարծում, որ սխալ կլինի, եթե փորձենք նախ ստանալ վարչապետի հրաժարականը, եթե դա մեզ հաջողվի, այդ դեպքում նաեւ կդրվի Սերժ Սարգսյանի հրաժարականի հարցը: Առայժմ բանակցություններ են գնում 4 ուժերի միջեւ: Պետք է լավ հաշվի առնել, թե որքանով է դա իրատեսական այս պահին: Եթե մենք տեսնենք, որ դրա հնարավորությունները բավականին ռեալ են, ապա միանշանակ կբարձրացվի նաեւ այդ հարցը:

- Կարծում եք` հնարավոր կլինի՞ այդ հարցի շուրջ համաձայնության գալ մյուս 4-ի հետ:

- Փորձենք վարչապետի հարցով համաձայնեցնել եւ եթե կկարողանանք արդյունք գրանցել, չեմ բացառում, որ մոտ ապագայում կբարձրացվի նաեւ այդ հարցը: Դա կնշանակի, որ իրոք արդեն քարը տեղից շարժվում է:

- Իսկ վարչապետի թեկնածու ունե՞ք:

- Դե, թեկնածուներ միշտ էլ կլինեն, ես կարծում եմ, որ ե՛ւ 4 խմբակցություններում կան բավականաչափ պրոֆեսիոնալ մարդիկ, ե՛ւ իշխանության մեջ էլ չեմ բացառում, որ կլինեն մարդիկ, որոնք կհավակնեն այդ պաշտոնին եւ կլինեն շատ ավելի լավը, քան այսօրվա գործող վարչապետն է: Համենայնդեպս, ավելի վատ չի լինում: