Շատ վախենալու հայկական կինո

Երեւանյան կինոթատրոններում ցուցադրվում է հայկական առաջին սարսափ ֆիլմը` «Մեռյալ հովիտ» վերնագրով, որի պրեմիերան տեղի է ունեցել ուրբաթ օրը:

Գլխավոր հերոսի` Դավթի չորս ընկերները որոշում են նրան անմոռանալի տոն պարգեւել եւ ծննդյան տարեդարձը նշելու համար ընտրում են Մեռյալ հովիտը: Բայց առջեւում սարսափներով ու մահացու վտանգներով լի գիշեր է: Մեռյալ հովիտ կոչվող արգելոցի տարածքում դեռ ավելի վաղ անհետացել է ավելի քան տասը մարդ: Երբ գտնվել են մահացածների մարմինները, բժշկական փորձաքննությունը բռնության հետքեր չի հայտնաբերել, եւ պարզ է դարձել, որ կորածները մահացել են սրտի կանգից, որի պատճառը կարող էր լինել անսպասելի, ուժեղ վախը:

Կիրակի օրը «Մոսկվա» կինոթատրոնում ֆիլմը դիտելու եկած հանդիսատեսը չէր հավանել այն: «Մենք նախ կեսից մտանք, ուշացումով էինք եկել, ու այդ մթությունը... սպասում էինք, որ ինչ-որ բան կբացվի: Ճիշտն ասած` լրիվ միտքը չհասկացանք: Աղմուկը, մթությունը ճնշում էին ուղղակի: Այնքան վախենալու չէր, ինչքան անդուր էր: Որ սկզբից չենք նայել, միգուցե դրանից է», «Զրո: Լավ տպավորություն չստացանք, չգիտեմ», «Պիտի ֆիլմ լիներ, որ կարծիք հայտնեմ: Չկա ֆիլմ, չկա կարծիք»,- ասացին մեզ հետ զրուցած հանդիսատեսները` անունները հայտնել չցանկանով: Իսկ ներկայացած միակ կինոսիրողը` երիտասարդ մանկավարժ Լեւոն Ստեփանյանը, խոսելով իր տպավորությունների մասին, ասաց. «Ճիշտն ասած` ես սպասում էի, որ ավելի լավ կինո կլիներ, բայց այնքան էլ գոհ չեմ: Ինձ թվում է` ամերիկյան ու ճապոնական սարսափ կինոներից էր ազդված, կերպարների նմանություն կա: Նույնիսկ սպիտակ դեմքով աղջիկը ճապոնական «Զանգ» կինոյից էր, իմ կարծիքով: Գուցե սխալվում եմ, բայց նմանություն կար: Դերասանները վատ չէին խաղում, սակայն սյուժեն առանձնապես վախենալու չէր, սցենարն ինձ դուր չեկավ: Իսկ որպես ֆիլմ՝ նորմալ էր, միջին գնահատական կտայի»:

Հայկական առաջին սարսափ ֆիլմի ռեժիսոր Ռոման Մուշեղյանը չի բացառում, որ հանդիսատեսի բացասական վերաբերմունքը կարող է պայմանավորված լինել «Մեռյալ հովտի»` այդ ոլորտում նորույթ լինելով. ինչպես ամեն նորը, սա էլ դժվարությամբ է ընդունվում: Ի դեպ, սցենարի հեղինակ  Հարություն Ղուկասյանի հետ նրանք ժամանակին կյանքի են կոչել նաեւ առաջին հայկական «Վերվարածներ» հեռուստասերիալը եւ քննադատական գնահատականների, ասում են, առաջին անգամը չէ, որ բախվում են: «Երբ մենք ուզում էինք նկարել առաջին հայկական սերիալը, բոլորը միանշանակ ասում էին` ի՞նչ հայկական սերիալ, չի կարող հայկական սերիալ լինել, որովհետեւ մարդիկ միայն հիմնված էին բրազիլական, մեքսիկական սերիալների վրա: Հետո եղավ նախատիպը, արվեց երկրորդը, երրորդը եւ եղավ հայկական սերիալների դաշտ: Բոլոր տեղերում, բոլոր ոլորտներում սկզբից ամեն ինչն էլ դժվար է լինում»,- ասաց Ռոման Մուշեղյանը:  «Մեռյալ հովտի» հինգ ընկերներին մարմնավորում են ոչ պրոֆեսիոնալ դերասաններ` Աշոտ Պողոսյան, Պապ Պողոսյան, Մագդալենա Մնացականյան, Շողեր Խաչատրյան, Արմեն Սարգսյան: Նրանք թատրոնի եւ կինոյի պետական ինստիտուտի ուսանողներ են, որոնց ռեժիսորն ընտրել է 120 երիտասարդներից: Մեկ ամիս նրանք մասնակցել են փորձերի` նախապատրաստվելով նկարահանումներին: Բայց այդ սկսնակ դերասանների կողքին փոքր` էպիզոդիկ դերերով հանդես են գալիս Ելենա Բորիսենկոն, Մարջան Ավետիսյանը, Սամվել Փիլոյանը: Բուն նկարահանումները նույնպես շարունակվել են մեկ ամիս: Իսկ այն հարցի վերաբերյալ, թե որքա՞ն է ֆիլմի բյուջեն, ռեժիսոր Ռոման Մուշեղյանը նախընտրեց լռություն պահպանել` միեւնույն ժամանակ նկատելով, որ փորձել են սակավ միջոցներով մեծ արդյունք ստանալ:

Ֆիլմի հեղինակներն ասում են, թե ի սկզբանե չեն ունեցել Հայաստանում սարսափ ֆիլմերի ոլորտում առաջինը լինելու ձգում եւ ցանկություն ու միայն ընթացքում են հասկացել, որ հենց դա են անում: Ընդգծում են նաեւ, որ «Մեռյալ հովիտը» ստեղծվել է ռուսական ու եվրոպական կինոշուկայի համար, եւ այնտեղ բավական մեծ հետաքրքրություն է առաջացել: