Սիրահարեցրած, տարօրինակ, բարի. Հայաստան կժամանեն համաշխարհային աստղեր

Օռնելլա Մուտի եւ Նաստասյա Կինսկի. ահա համաշխարհային կինոյի այն աստղերի անունները, որոնք հատուկ հյուրի կարգավիճակով մասնակցելու են հուլիսի 12-19-ը կայանալիք «Ոսկե ծիրան» Երեւանի 12-րդ միջազգային կինոփառատոնին:

Անակնկալը երեկ բացահայտեց կինոփառատոնի տնօրեն Հարություն Խաչատրյանը՝ հրավիրված ասուլիսում: «Երեւան կժամանի իտալացի մի դերասանուհի, որին, կարծում եմ, հատկապես 70-ական թվականներին բոլոր տղամարդիկ իսկապես սիրահարված էին եւ նրա հետ կապված էրոտիկ երազներ էին տեսնում: Դա Օռնելլա Մուտին է»,- ասաց փառատոնի տնօրենը: «Օօօօ՜» եղավ լրագրողների ակամա արձագանքը: Իտալացի այս դերասանուհին, ի դեպ, հայ հանդիսատեսին առավելապես հայտնի է «Կամակոր տղամարդու սանձահարումը» կատակերգական ֆիլմից, որտեղ նրա խաղընկերն է Ադրիանո Չելենտանոն:

Իսկ ահա կինոփառատոնի մյուս պատվավոր հյուրը Հարություն Խաչատրյանի սիրելին է: Նա կատակով ասաց, որ հոբելյանի առիթով իրեն այդպիսի նվեր է արել: «Ասում են՝ շիլան յուղով չես փչացնի: Մենք հրավիրեցինք նաեւ շատ ավելի կարեւոր եւ հանճարեղ մի դերասանուհու, որին ես եմ շատ սիրահարված եւ սիրում (ասացի՝ ինձ նվեր անեմ 60-ամյակիս): Մեզ հյուր է գալիս Նաստասյա Կինսկին: Այսինքն՝ դերասանուհի, ով համաշխարհային Օլիմպիայի գագաթնակետին է գտնվել եւ գտնվում՝ արդեն որպես հետաքրքրիր անձնավորություն, մեծ դերասանուհի եւ մեծ մտածող՝ իր տարօրինակություններով, իր խելագարությամբ, իր բարությամբ...»,- շարունակեց «Ոսկե ծիրանի» տնօրենը: Գերմանա-ամերիկյան դերասանուհի Նաստասյա Կինսկիին համաշխարհային ճանաչում բերեցին Ալբերտո Լատուադայի «Եղիր, ինչպես կաս» կինոնկարը, ապա Ռոման Պոլանսկու «Թես» ֆիլմը, որը, ի դեպ, արժանացել է «Ոսկե գլոբուս» մրցանակի: Եւ ահա՝ «Ոսկե ծիրանի» այս տարվա հետահայաց ցուցադրությունների ծրագիրը նվիրված է լինելու Նաստասյա Կինսկիի մասնակցությամբ կինոնկարներին: Կներկայացվեն նույն «Թես»-ը, «Փարիզ Թեքսաս»-ը եւ «Մարիայի սիրեցյալները»:

Այսքանով, սակայն, «Ոսկե ծիրանի» անակնկալները չեն սահմանափակվում: Կինոփառատոնի շրջանակներում Երեւան է այցելելու ֆրանսիացի դերասան եւ ռեժիսոր Պատրիկ Շենեն, ում մասնակցությամբ փառատոնի ընթացքում տեղի կունենա «Ես սիրահարվելու համար չեմ այստեղ» ֆիլմի պրեմիերան:

Հայտնի է, որ Երեւանի միջազգային կինոփառատոնը տարեցտարի ընդլայնում է իր աշխարհագրությունը եւ առավել լայն ճանաչում ձեռք բերում: Այս տարի փառատոնը ստացել է շուրջ 1600 հայտ՝ 105 երկրից՝ նախորդ տարվա 95 երկրից ստացված 1500 հայտի փոխարեն: «Ոսկե ծիրանի» տնօրեն, ռեժիսոր Հարություն Խաչատրյանից հետաքրքրվեցինք, թե շարունակաբար աճող հետաքրքրություն վայելելով հանդերձ՝ ի սկզբանե ինչի՞ է ձգտել հասնել փառատոնը, որը դեռեւս չի հաջողվել: «Տարբեր երազանքներ կան փառատոնի կազմակերպիչների մոտ: Քանի որ հայկական կինո համարյա գոյություն չուներ՝ չէր նկարվում կինո, չկար լավ դպրոց, չկային կինոնկարահանողներ, չկար ծրագիր, մենք երազում էինք ստեղծել մի մթնոլորտ, որտեղ ի հայտ կգան մարդիկ, որոնք կսիրեն կինոն, կսովորեն կինո նկարել, կտեսնեն՝ աշխարհում ինչ է կատարվում, եւ կմտնեն հայկական կինո ու կստեղծեն հայկական նոր կինեմատոգրաֆ: Եղավ դա: Ստեղծվեց մեծ հետաքրքրություն փառատոնի առաջին 7-8 տարում, բազմաթիվ երիտասարդներ դարձան ռեժիսորներ, օպերատորներ, նկարում են ֆիլմեր: Բայց մենք այսօր չունենք իր դեմքն ունեցող հայկական կինո: Մեր երազանքն է գոնե 15-րդ կամ, ամենաուշը, 20-րդ կինոփառատոնում ունենալ աշխարհում շատ արտահայտված, շատ ընդգծված հայկական կինոարվեստ, որը տեսնեն եւ հասկական, որ հայերը ոչ միայն հետաքրքիր են իրենց մտածողությամբ, իրենց փիլիսոփայությամբ, իրենց անցյալով, այլ նաեւ այն մեծ զենքով, որ կոչվում է կինո: Զենք, որը պատմում է ե՛ւ մշակույթի, ե՛ւ պրոբլեմների, ե՛ւ փիլիսոփայության մասին, եւ կարող է անցնել աշխարհով շատ հեշտությամբ: Ու կարծում եմ՝ կհասնենք դրան, այդ ճանապարհին ենք, որովհետեւ կան քայլեր, կան տեխնոլոգիաներ, որ պետք է դրանով զբաղվել»,- ասաց Հարություն Խաչատրյանը՝ կարեւորելով նաեւ Հայաստանում կինոթատրոնների ցանցի ընդլայնումը:

Հ.Գ. Կինոռեժիսոր Հարություն Խաչատրյանն օրեր առաջ Մոսկվայից վերադարձել է երկու մրցանակով: Մոսկվայի 37-րդ միջազգային կինոփառատոնի շրջանակներում ռեժիսորի 60-ամյակի կապակցությամբ կազմակերպվել է ստեղծագործական երեկո, որտեղ ցուցադրվել է նրա լիամետրաժ դեբյուտային ֆիլմը՝ «Քամին ունայնության» (1989): Փառատոնը նաեւ Խաչատրյանին մրցանակ է հանձնել կինոարվեստում ունեցած մեծ ավանդի համար: Համաշխարհային կինոյում իր ավանդի համար «Ոսկե ծիրան» կինոփառատոնի հիմնադրին «Փիղ» մրցանակ է շնորհել նաեւ ռուս կինոգետների եւ կինոքննադատների գիլդիան: «Եթե որեւէ ռեժիսոր ասի, որ մրցանակներն իրեն չեն ուրախացնում, չհավատաք»,- երեկ լրագրողների հետ հանդիպման ժամանակ անկեղծորեն ասաց Հարություն Խաչատրյանը: