«Ժառանգություն» խմբակցության անդամները վարչախմբի ներկայացուցիչներն են. Զարուհի Փոստանջյան

ՀՀ գլխավոր դատախազի ընտրությունը խորհրդարանում եւս մեկ անգամ ապացուցեց, որ ՀՀ-ում գործում է ավտորիտար վարչախումբ: Այս մասին ԱԺ ճեպազրույցների ժամին հայտարարեց «Ժառանգություն» խմբակցության պատգամավոր Զարուհի Փոստանջյանը:

«103 պատգամավորից 97-ը կողմ քվեարկեց տվյալ անձնավորությանը, մինչդեռ նա մեզ բոլորիս համոզեց, որ ՀՀ-ում չի գործում օրենքը, եւ ինքը պատասխանատվություն չի կրելու օրենքի ուժի կիրառման համար: Նա հայտարարեց, որ ՀՀ-ում չկան քաղբանտարկյալներ, մենք արդեն տարիներ շարունակ բազմաթիվ քաղաքացիներ ունենք, ովքեր իրենց քաղաքական հայացքների համար են գտնվում բանտախցում: Հատկապես, ամռան իրադարձություններից հետո մարդկանց քանակը, ովքեր քաղաքական հայացքների համար են հետապնդվում, բազմապատկվեց»,- ասաց Զարուհի Փոստանջյանը:

«103-ից 97-ը կողմ քվեարկեց ավտորիտարիզմին»,- ասաց նա՝ անդրադառնալով ՀՀ գլխավոր դատախազի ընտրությանը:

Մեր հիշեցմանը, որ նորանշանակ ՀՀ գլխավոր դատախազ Արթուր Դավթյանին դեմ է քվեարկել ընդամենը 3 պատգամավոր, ինչպես եւ նախկին գլխավոր դատախազ Գեւորգ Կոստանյանի ընտրության ժամանակ: Հարցին՝ ինչի՞ մասին է սա խոսում, եւ արդյո՞ք ընդդիմադիր ժառանգականները եւս կողմ են քվեարկել Դավթյանին, Զարուհի Փոստանջյանն ասաց.

«Ժառանգություն կուսակցությունն ԱԺ-ում ներկայացնում եմ միայն ես, «Ժառանգության» անդամներ չկան մեր խմբակցության մեջ, նրանք, ըստ էության, վարչախմբի ներկայացուցիչներն են, բազմիցս են իրենց քվեարկություններով ապացուցել, որ հավանություն են տալիս վարչախմբին՝ ի դեմս Սերժ Սարգսյանի եւ, իհարկե, նաեւ կրեմլյան կարգադրությունների»:

Մեր դիտարկմանը, որ «Ժառանգություն» կուսակցությունը հայտարարությամբ հանդես եկավ, ըստ որի, չեն մասնակցի առաջիկա ՏԻՄ ընտրություններին, քանի որ իրենց կուսակցական գործընկերներն անազատության մեջ են: Սակայն, ազատության մեջ հայտնվելուց հետո էլ «Ժառանգությունը»  չառաջադրվեց, ինչո՞վ է այն պայմանավորված եւ արդյոք կսատարե՞ն ընդդիմադիր որեւէ ուժի, Փոստանջյանը պատասխանեց.

«Գիտեք, որ «Ժառանգությունը» միշտ կողմնակից  է եղել, որպեսզի մասնակցություն ունենա ընտրական գործընթացներին: Տվյալ պարագայում, քրեական հետապնդումը դեռ շարունակվում է իմ գործընկերների նկատմամբ, չնայած ազատության մեջ են, սակայն սահմանափակումները պահպանվում են, նրանց տեղաշարժվելու, երկրից բացակայելու հնարավորությունները սահմանափակ են: Եթե նրանք ազատ արձակվեցին, դա դեռ չի նշանակում, որ մենք ունենք լիարժեք հնարավորություն ընտրություններին մասնակցելու: Դա է պատճառը, որ մենք չենք մասնակցում ՏԻՄ ընտրություններին: Ինչ վերաբերում է որեւէ մեկին սատարելուն, ասեմ, որ նման առաջարկներ չկան, տարբեր կուսակցություններ են մասնակցում ընտրություններին, տարբեր ձեւաչափերով: Հետեւաբար, այս խնդիրը մեր առջեւ կանգնած չէ, եւ մենք ազատ ենք այս խնդրի ընկալման ու որոշումների մեջ»:

Ինչ վերաբերում է նորանշանակ վարչապետ Կարեն Կարապետյանի նշանակմանը, ընդդիմադիր պատգամավորը համոզմունք հայտնեց, որ նշանակումը Կրեմլից է եղել.

«Այդ նշանակումը մտահոգություն է առաջացրել ոչ միայն մեր վարչախբի մոտ, այլ ՌԴ-ում, որովհետեւ ակնհայտ է, որ այս նշանակումը տեղի է ունեցել Կրեմլից, եւ ակնհայտ է, որ տվյալ անձը ներկայացվում է Մոսկվայի կողմից եւ անվերահսկելի իրադարձությունների համար է: Իհարկե, այս նշանակումից որեւէ դրական ակնկալիք չունեմ, ոչ էլ հանրությունն ունի, որովհետեւ նույն անձը տարիներ շարունակ մի ձեռնարկություն է ներկայացրել, որը ՀՀ-ում չի գործել որպես օրինական կազմակերպություն»,- ասաց նա՝ նկատի ունենալով «Գազպրոմ» ընկերությունը: