Համաշխարհային ֆուտբոլում անհատական մրցանակների թիվը ավելացավ եւս մեկով

Ֆրանսիական հեղինակավոր «France Football» ամսագիրը հրապարակել է տարվա լավագույն ֆուտբոլիստի համար նախատեսված «Ոսկե գնդակ» մրցանակաբաշխության նոր կանոնները. լավագույնին ընտրելու են միայն եվրոպացի լրագրողները: Հիշեցնենք, որ օրեր առաջ ֆուտբոլի միջազգային ֆեդերացիան՝ ՖԻՖԱ-ն, եւ «France Football»-ը հայտարարեցին «Տարվա լավագույն ֆուտբոլիստ» մրցանակաբաշխության շուրջ համագործակցության դադարեցման մասին: 2010 թվականից սկսած այդ համագործակցության շնորհիվ ֆուտբոլային հանրությունը լավագույն ֆուտբոլիստին շնորհում էր 1 մրցանակ՝ «ՖԻՖԱ-ի Ոսկե գնդակ» անվամբ:

Իսկ մինչ այդ՝ սկսած 1956 թ., «Ոսկե գնդակ» մրցանակը շնորհում էր «France Football»-ը՝ Եվրոպական երկրների լրագրողների քվեարկության միջոցով, ընդ որում, մինչեւ 1995 թ. այն շնորհվում էր բացառապես եվրոպացի ֆուտբոլիստներին, հետո՝ մինչեւ 2007 թ.՝ միայն Եվրոպայում հանդես եկող ֆուտբոլիստներին, որից հետո այն այլեւս սահմանափակումներ չուներ: Իր հերթին ՖԻՖԱ-ն, սկսած 1991 թ., իր կազմի մեջ մտնող երկրների ազգային հավաքականների գլխավոր մարզիչների եւ ավագների քվեարկության միջոցով շնորհում էր «ՖԻՖԱ-ի տարվա լավագույն ֆուտբոլիստ» մրցանակը, որը ստացավ «Ադամանդե գնդակ» անվանումը:

5 տարի անընդմեջ՝ 2005-2009 թվականներին, «France Football» -ի «Ոսկե գնդակը» եւ ՖԻՖԱ-ի «Ադամանդե գնդակը» ստանում էին նույն ֆուտբոլիստները՝ ըստ տարիների Ռոնալդինյոն (Բրազիլիա), Ֆաբիո Կանավարոն (Իտալիա), Կական (Բրազիլիա), Կրիշտիանու Ռոնալդուն (Պորտուգալիա) եւ Լիոնել Մեսին (Արգենտինա), եւ այս պատճառով էլ ՖԻՖԱ - «France Football» համագործակցությունը կարծես թե ստացվեց կանխատեսելի եւ տրամաբանական: 2010 թվականին կայացած Աշխարհի առաջնության ժամանակ կողմերի մեջ կնքվեց համաձայնագիր միասնական մրցանակ սահմանելու մասին՝ «ՖԻՖԱ-ի Ոսկե գնդակ» անվանումով, որի քվեարկությանը մասնակցելու իրավունք ստացան ՖԻՖԱ-ի կազմի մեջ մտնող բոլոր երկրների ազգային հավաքականների գլխավոր մարզիչները, հավաքականների ավագները եւ այդ երկրները ներկայացնող 1-ական լրագրողներ:

«ՖԻՖԱ-ի Ոսկե գնդակի» գոյության 6 տարիների ընթացում այն նվաճեցին ընդամենը 2 ֆուտբոլիստներ՝ Լիոնել Մեսին (4 անգամ) եւ Կրիշտիանու Ռոնալդուն (2 անգամ): Ընդ որում, 2 անգամ քվեարկության արդյունքները բուռն բանավեճերի առիթ հանդիսացան: 2010 թվականին լավագույնը ճանաչվեց Աշխարհի առաջնությունում ձախողված Մեսին, թեեւ «Բարսելոնայում» նրա ակումբակից Անդրես Ինյեստան փայլում մրցաշրջան անցկացրեց եւ շատ ավելի մեծ լումա ունեցավ Իսպանիայի հավաքականի եւ «Բարսելոնայի» հաղթանակներում:

Մեսին Աշխարհի լավագույն ֆուտբոլիստի կոչմանը արժանացավ հիմնականում փոքր երկրների մարզիչների եւ ավագների ձայների շնորհիվ, իսկ ահա լրագրողների նախապատվությունը տվել էին Ինյեստային: Վերլուծաբանները դեռ այն ժամանակ պնդում էին, որ մեծ ֆուտբոլի հետ շատ քիչ առնչություն ունեցող բազմաթիվ երկրների հավաքականների ներկայացուցիչներ իրենց ընտրության մեջ առաջնորդվում են անուններով եւ ոչ թե տվյալ ժամանակահատվածում լավագույն խաղը ցույց տվող ֆուտբոլիստի ընտրությամբ:

2013 թվականին էլ ՖԻՖԱ-ն երկարաձգեց քվեարկության ժամկետները, եւ այդ օրերին Ռոնալդուն գերազանց խաղի շնորհիվ ոչ միայն Պորտուգալիայի համար ապահովեց տեղ Աշխարհի 2014 թվականի առաջնությունում  (Պորտուգալիան 2 խաղերում հաղթեց Շվեդիային,  եւ բոլոր 4 գոլերը խփեց Կրիշտիանուն), այլ նաեւ իր կողմը թեքեց քվերակողներից շատ շատերին: «France Football»-ը այդ ժամանակ արձանագրեց, որ գերազանց մրցաշրջան անցկացրած, 5 մրցանակ նվաճած ֆրանսիացի Ֆրանկ Ռիբերին (Գերմանիայի չեմպիոն, գավաթակիր, Չեմպիոնների լիգայի, Եվրոպայի սուպերգավաթի հաղթող, աշխարհի ակումբային առաջնության չեմպիոն) զիջեց միայն Իսպանիայի առաջնության  ռմբարկու դարձած Ռոնալդուին:

Իհարկե, ՖԻՖԱ - «France Football» «ամուսնալուծությունը» ամենեւին չի նշանակում որ նույն Մեսին կամ Կրիշտիանու Ռոնալդուն այլեւս չեն ստանալու տարվա լավագույն ֆուտբոլիստի մրցանակները: Անկասկած, այս մարզիկները լավագույններն են վերջին տարիներին եւ պորտուգալացին կարծես թե այլընտրանք չունի նաեւ այս տարի: Ամեն դեպքում հիշենք, որ «France Football»-ը ֆրանսիական ամսագիր է, իր մրցանակը ֆրանսիացի ֆուտբոլիստներին է հանձնել 4 անգամ (ավելի շատ՝ 5-ական անգամ այն նվաճել են միայն գերմանացի եւ իտալացի ֆուտբոլիստները), իսկ վերջին անգամ ֆրանսիացի ֆուտբոլիստը այն ստացել է 18 տարի առաջ՝ 1998 թվականին (Զինեդին Զիդան): Միգուցե «France Football»-ի «հին - նոր» «Ոսկե Գնդակը» Ֆրանսիայի հավաքականի եւ Մադրիդի «Ատլետիկոյի» հարձակվող Անտուան Գրիզմանի՞ շանսն է: