Կապանի դպրոցում տնօրեն կընտրեն. «մայր ու աղջկա» մաֆիայի մասով վարչապետի խոսքն ուժի մե՞ջ է

Վաղը Կապանի թիվ 3 միջնակարգ դպրոցում տնօրենի ընտրություն է: Այս դպրոցն արդեն տեւական ժամանակ է, ինչ տնօրեն չունի: Դպրոցի նախկին տնօրեն Էդուարդ Բեգլարյանի թոշակի անցնելուց հետո օգոստոսի 23-ից Սյունիքի մարզպետ Սուրիկ Խաչատրյանի որոշմամբ տնօրենի պաշտոնակատար է նշանակվել Հանրապետական կուսակցության անդամ Արթուր Մնացականյանը:

Դպրոցի տնօրենի թափուր պաշտոնի համար հուլիսի 19-ին անցկացված մրցույթի արդյունքները չեղյալ են համարվել, քանի որ մրցույթի մասին հայտարարությունը թերթերում չի հրապարակվել:

Դպրոցի կոլեգիալ կառավարման մարմինը՝ խորհուրդը վաղը պետք է ընտրություն կատարի երեք թեկնածուների միջեւ: Նրանք են՝ տնօրենի պաշտոնակատար Արթուր Մնացականյանը, որը «Սովխոզի» դպրոցի տնօրենն է եղել եւ Սյունիքի նախկին մարզպետ Սուրիկ Խաչատրյանի հովանավորյալը, Սյունիքի մարզպետարանի կրթության վարչության նախկին պետ Նաիրա Ավանեսյանը եւ դպրոցի պատմության եւ հասարակագիտության բազմամյա ուսուցչուհի Մարինա Ղազարյանը:

Հաշվի առնելով, որ Արթուր Մնացականյանի պահվածքը, քաղաքում տարածված տեղեկությունները, որ նա գումար է տվել, որ իրեն ընտրեն տնօրենի պաշտոնում, Մարինա Ղազարյանը Կրթության նախարարության պատասխանատուներին կոչ է անում ներկա լինել այդ մրցույթին  եւ վերահսկել գործընթացը: Ներկայացնենք նրա հետ մեր զրույցը:

- Տիկին Ղազարյան, մտավախությո՞ւն կա, որ ընտրությունը կարող է արդար չլինել:

 - Եթե նախարարության ներկայացուցիչը գար, գոնե կլսեին մեր ծրագրերը ընտրությունից առաջ: Բայց մենք տեղեկացել ենք, որ ավագ դպրոցի տնօրենն է գալու: Ես չեմ կարծում, որ նա աչքերը կբացի եւ կփորձի հասկանալ, թե ինչ է կատարվում: Կստացվի նախորդ անգամվա նման, երբ մարզպետն ասաց՝ պետք է ընտրենք Մնացականյան Արթուրին եւ հանձնաժողովը ընտրեց նրան եւ ոչ թե ծրագրերը:

- Իսկ հանձնաժողովը տրամադրվա՞ծ է որեւէ մեկին սատարել:

- Այո, հիմա էլ են ասում, պետք է այնպես անել՝ Արթուրն անցնի:

- Ո՞վ է ասում:

- Դե Հանրապետականները ժողով են հրավիրել, որոշել են, որ պետք է անցի: Կապանի քաղաքապետն էլ է իր կողմից, ես համոզված եմ, որ մեր ներկայացրած ծրագրի բովանդակությունը նշանակություն չի ունենա:

- Ինչո՞ւ են նրան սատարում:

- Ինձ էլ է հուզում այդ հարցը, թե ինչու են իշխանությունները շահագրգռված, որ ինքն անցնի, չնայած ինքը մեր դպրոցի հետ կապ չունի: Նախկին մարզպետի ժամանակ վախենում էին, ասում էին կարող է աշխատանքից ազատել, մեկն ասում էր աղջիկս մարզպետարանում է աշխատում, մյուսն ասում էր ամուսնուս աշխատանքից կհեռացնեն: Հիմա էլ ուղղակի ասում են՝ խոստացել ենք, որ Արթուրին ենք ընտրելու:

- Ո՞վ է ասում:

- Դե մարզպետարանի կրթության բաժնի աշխատողներից մեկն ասաց, որ ես արդեն խոստացել եմ, իրեն պետք է ընտրեմ:

- Նա խորհրդի անդա՞մ է:

- Այո: Խորհրդի նախագահը քաղաքապետի խորհրդականն է՝ Արմեն Սարգսյանը, նրա կինը խորհրդի անդամ է: Խորհրդի անդամ է անգամ թեկնածուի եղբայրը: Մինչդեռ խորհուրդը պետք է այնպես ձեւավորվի, որ ամուսին, կին, քույր, եղբայր չլինի այնտեղ: Պետք է փոխվի այս խորհրդի կազմը: Ինձ դուր է եկել վարչապետի հայտարարությունը՝ մայր ու աղջկա ինստիտուտը վերացնելու հետ կապված: Դա իրագործելու համար սա լավ հնարավորություն է: Ամուսին ու կին չպետք է լինեն նույն խորհրդում, որպեսզի հաշվի չառնվեն բարեկամական կապերը ընտրություն կատարելիս: Ես սկսել եմ մտածել, որ ավելի լավ է նշանակեն տնօրենին, բայց չխաբեն, որ ժողովրդավարական ընտրություն է: Այդպիսի բան չկա: Ում ուզում են, նշանակում են, սա է փաստը:

- Ընտրությունը դեռ տեղի չի ունեցել, միգուցե հնարավո՞ր է ինչ-որ բան փոխվի:

- Արթուր Մնացականյանն արդեն 3 ամիս է՝ տնօրենի պաշտոնակատար է, երբեք չի օգտագործել այդ բառը: Միշտ հանդես է եկել տնօրենի անունից, մինչեւ այսօր էլ դռան մոտ փակցրած է «տնօրեն Արթուր Մնացականյան» ցուցանակը: Ես զարմանում եմ՝ ինչու են նրան սատարում:  Հիշում եմ՝ մարզպետարանի աշխատակիցներից Նելլի Կարապետյանը, որը խորհրդի անդամ էր, Մնացականյանի հետ կապված բացասական կարծիք էր հայտնել, որ 17 տարի դպրոցի տնօրեն լինելով ոչ մի ձեռագիր չի թողել «Սովխոզի» դպրոցում:

- Դուք վարկած չունե՞ք, թե ինչու են հատկապես նրան ուզում տեսնել դպրոցի տնօրենի պաշտոնում:

- Քաղաքում խոսում են, որ գումար է տվել: Բայց քանի որ նրա ձեռքից չենք բռնել, չենք կարող պնդել: Պետք է շարունակենք զարմանալ, թե ինչու են այնքան ցանկանում նրան «նշանակել»: