Բարձր աշխատավարձ կստանամ, կուտեմ, կմսխեմ, կգնամ սաունաներում ինձ համար կտժժամ

Դերասան Սերգեյ Դանիելյանը, նույն ինքը՝ Դիվադադարի Յոժը, իսկապես, կուսակցություն է ստեղծում: Անունն էլ դնելու է Քաղաքացիական ակտիվ քայլ, հապավումով՝ ՔԱՔ:

Մեզ հետ զրույցում նա հավատացնում է, որ իր մտադրությունները լուրջ են, դա իր եւ ակտիվիստ Արման Սուլեյմանյանի նախաձեռնությունն է: Իսկ վերջինս, Ս. Դանիելյանի խոսքերով՝ «ՔԱՔ-ի մոզգն է»: Հիմա երկուսով ու համախոհներով կուսակցության ծրագիրն ու կանոնադրությունն են գրում եւ անդամներ հավաքագրում՝ մի խոսքով ակտիվ կուսակցաշինությամբ են զբաղված: Մեզ հետ զրույցի ժամանակ Ս. Դանիելյանն ասաց, թե շտապում է մասնակցելու ՔԱՔ-ի նախաձեռնող խմբի հերթական նիստին: Իսկ կուսակցությունը դեռ պաշտոնապես չի գրանցվել, բայց առաջիկայում կգրանցեն, համագումար կանցկացնեն ու կպատրաստվեն մասնակցելու 2017թ. խորհրդարանական ընտրություններին: Ս. Դանիելյանը վստահեցնում է, որ ժողովուրդն իրենց կողքին է, ու իրենց այնքան ձայն կտան, որ բավարար կլինի Ազգային ժողով մտնելու համար:

Սերգեյ Դանիելյանը հայտնի է իր հումորային ներկայացումներով, իրականության կամ քաղաքական դրվագների, քաղաքական գործիչների ու նրանց զանազան դրսեւորումների վերաբերյալ հումորային պատումներ բեմականացնելով: Եվ հիմա, երբ նա կուսակցություն բացելու մասին հայտարարություն է անում, որեւէ այլ բան չես կարող մտածել, քան, որ դա նրա հերթական զվարճալի ծրագիրն է, հատկապես որ իր կուսակցության համար նման անվանում է ընտրել: Ու թեեւ նա բավականին լուրջ տոնով է պատմում իր նախաձեռնության մասին, բայց նրա ձեւակերպումների մեջ սարկազմ կա: Իսկ եթե իսկապես նա կուսակցություն գրանցի ու իր այդ ծրագրին մի փոքր պաշտոնական կամ քաղաքական տեսք տա, դա արդեն կնշանակի, որ նա պարզապես ծաղրում է գործող կուսակցություններին ու գործիչներին իրենց անլուրջ կամ ոչ սկզբունքային գործունեության համար, ինչը նրանց համար կարող է մտահոգվելու առիթ լինել:

Փորձեցինք նաեւ գոնե խորհրդարանական կուսակցություններից մեկնաբանություններ ստանալ, թե ինչպես են վերաբերվում դերասանի այս՝ եթե չասենք քաղաքական քայլին, ապա՝ ակցիային, որն, անշուշտ, ուղղված է իրենց դեմ: Կամ արդյոք քաղաքական դաշտը, քաղաքական ուժերն այնքան չե՞ն անլրջացել, որ դերասանը որոշել է ծաղրել նրանց ու նման նախաձեռնություն է անում: Մեկնաբանություններ ստանալուն ուղղված մեր բոլոր ջանքերն ԱԺ-ում իզուր անցան, որեւէ պատգամավոր՝ թե իշխանական, թե ոչիշխանական, չցանկացավ այդ թեմային թեկուզ եւ հումորով անդրադառնալ: Եվ մեզ մնում է ընդամենը ներկայացնել Ս. Դանիելյանի հետ մեր հարցուպատասխանը: Իսկ թե որքան է այն լուրջ,  դատեք ինքներդ:

- Սերգեյ, կուսակցություն ստեղծելը ձեր հերթական հումորային նախաձեռնությո՞ւնն է:

- Ոչ, ես այդ մտադրությանը միշտ էլ լուրջ եմ վերաբերվել եւ երբեք չեմ կատակել: Այն մարդիկ, ովքեր իմ կողքին են, հավատում են ինձ: Արման Սուլեյմանյանի անունը կարող եմ տալ, ուրիշ մարդիկ էլ կան, արվեստագետներ, բայց նրանց անունը դեռ չեմ ցանկանում տալ:

- Դո՞ւք եք լինելու կուսակցության նախագահը:

- ՔԱՔ-ի նախագահը միայն ես կարող եմ լինել, քանի որ ես եմ հորինել այդ կուսակցությունը, իհարկե, Արմանի հետ միասին:

- Իսկ ինչո՞ւ եք այնպիսի անվանում ընտրել, որ հապավումը ՔԱՔ է ստացվել: Դա կարող է վատ ազդեցություն ունենալ ձեր վարկանիշի վրա:

- Բացարձակ, ինչ եք ասում, իմ անունը բոլոր կուսակցությունների անուններից ամենամաքուրն է: Մեծն գրող Գյոթեն մտածո՞ւմ էր իր անունը փոխել ու այն ավելի բարեհնչուն դարձնել: Ես էլ չեմ մտածել՝ Քաղաքացիական ակտիվ քայլ է կոչվում: Դե հիմա ՔԱՔ է լինում հապավումը, ես ինչ անեմ: Ես եմ դա ընտրել, քանի որ այդպիսով այն կտարբերվի մյուս կուսակցությունների անուններից որպես ամենամաքուրը, ամենազուլալը եւ ամենագեղեցիկը: Մնացած հապավումները բացարձակ բարեհունչ չեն իմ ականջին: Կարծում եմ, ճիշտ եմ որոշել:

- Իսկ ինչո՞ւ հանկարծ որոշեցիք կուսակցություն ստեղծել:

- Ուզում եմ օգնել իշխող կուսակցություններին, որոնցից այս երկրում ինչ-որ բան է կախված: Լինեմ նրանց կողքին, աշխատեմ նրանց հետ, օգնեմ նրանց: Ես նրանց հետ դերասանական վարպետություն կանցնեմ, թե ինչպես կարելի է մի բան ասել, հետո մեկ այլ բան անել, բայց ձեզ հավատան: Հռետորական արվեստ կդասավանդեմ, թե ինչպես կարելի է 30-40 տոկոս ծայրահեղ աղքատություն ունենալ, բայց ապուշի տեղ դնել մարդուն, թե, վախ, ինչ լավ է: Դրա համար շատ մեծ դերասանական արվեստ է պետք, ինչը մեր քաղաքական գործիչները չունեն:

- Բա որ հանկարծ ձեր ՔԱՔ-ը հաղթի խորհրդարանական ընտրություններին, ի՞նչ եք անելու: Պետք է վարչապե՞տ դառնաք:

- Չէ, ինչու պետք է վարչապետ դառնամ: Մինչեւ վարչապետ դառնալը որպես ՔԱՔ-ի առաջնորդ դեռ շատ պետք է աճեմ: Դեռ ուզում եմ խորհրդարան մտնել:

- Նիստերի ժամանա՞կ եք դերասանական վարպետություն դասավանդելու:

- Ոչ, ես ուղղակի աշխատավարձ կստանամ, եւ անպայման չէ, որ գնամ նիստերին մասնակցեմ: Այ քեզ բան: Քի՞չ պատգամավորներ կան, որ այդպես են անում: Շատ վաղուց բարձր աշխատավարձ չեմ ստացել, համ էլ այսքան տարի միայն հարկեր ու տուգանքներ եմ վճարել, իսկ հիմա բարձր աշխատավարձ կստանամ, կուտեմ, կմսխեմ, կգնամ սաունաներում ինձ համար կտժժամ, լավ մեքենա կքշեմ, պետական լծակները կօգտագործեմ իմ բիզնեսի համար: Կայֆ ա, էլի: Ես հո չեմ ասում, թե պիտի աշխատեմ:

- Այսինքն, դուք իշխանության հետ կոալիցիա կկազմեք:

- Եթե դա այդպես է կոչվում՝ այո: Ժողովուրդը միշտ ինձ հետ է եղել: Ես կարող եմ կամուրջ հանդիսանալ Հանրապետականների եւ ժողովրդի միջեւ կամ «Բարգավաճ Հայաստանի» եւ ժողովրդի միջեւ: Կարծում եմ՝ ՔԱՔ-ը շատ հուսալի կամուրջ կձգի:

- Իսկ այդ կուսակցությունների հետ քաղաքական կոնսուլտացիաներ ունեցե՞լ եք, նրանք համաձա՞յն են ՔԱՔ-ի հետ համագործակցել:

- Ինձ թվում է, կհամաձայնեն, ո՞վ կհրաժարվի օգնությունից:

- Կարծում եք՝ նրանք դերասանական վարպետության կամ հռետորության պակա՞ս ունեն:

- Այո, իհարկե, ժողովուրդը նրանց երբեմն չի հավատում, բայց եթե ես նրանց վարպետության դասեր տամ, այդ խնդիրը չեն ունենա: Ես ներողություն եմ խնդրում, հիմա նիստի եմ, ՔԱՔ-երով հավաքվել ենք:

Տպել
102591 դիտում

Ծրագրային 46 հայտ, շուրջ 1.9 մլրդ. դրամ. կառավարությունում քննարկել են սուբվենցիայի հայտերը

Անցումային արդարադատությունը քրեական եւ քաղաքացիական գործերի վերաբացում անելու մասով էքստրա գործիքներ չունի․ Վարդապետյան

45 մլն 26 հազար դրամ, 55 հազար դոլար. դատավոր Արման Թովմասյանի ունեցվածքը

Չեմ կարծում, որ վեթինգի իրականացումը նվաստացուցիչ է․ իրավաբան Կարեն Զադոյան

ԱԱԾ տնօրենի տեղակալ Արզուման Հարությունյանն ազատվել է աշխատանքից. պաշտոնական

Անցումային արդարադատությունը ապօրինի կուտակված ունեցվածքին վերաբերելու է առավել մե՞ղմ, թե՞ գործելու են կոշտ մեխանիզմներ

Բաքվում մեկնարկել են պետական սահմանի հստակեցմանը նվիրված վրաց-ադրբեջանական բանակցությունները

Զելենսկիի վարչակազմը Ռուսաստանի հետ բանակցություններ է ցանկանում

ՀՀ Թաեքվոնդոյի ֆեդերացիայի նախագահի ընտրություններից հետո սուր վիճաբանություն սկսվեց (տեսանյութ)

Թաքցնելու բան չունենք Հայաստանից՝ անգամ ԼՂ հարցում. Ղազախստանի դեսպան

Թերեզա Մեյը հայտարարեց Մեծ Բրիտանիայի վարչապետի պաշտոնից հրաժարականի մասին

Լուսաբացի ողբերգությունից Բասենն ուշքի չի գալիս (լուսանկարներ)

Անցումային արդարադատությունը «տռոյկա» դատարանների ձեւավորումը չէ․ Արարատ Միրզոյան

Խորհուրդ կտամ պարոն Իոաննիսյանին հանգիստ նստի տեղը. Արթուր Վանեցյան

ԱՄՆ-ը քննարկում է Մերձավոր Արեւելքում հավելյալ ուժեր տեղակայելու հարցը

Դպրոցականը տաբատի հետևի գրպանից հանել է ծալովի դանակը և հարվածել համադասարանցու. միջադեպ Երեւանում

Անհրաժեշտություն եմ տեսնում, որ ողջ պետական համակարգի նկատմամբ հասարակության շրջանում չմնան կասկածներ. Վանեցյան

Պատերազմն Արցախում չի ավարտվել, հակամարտությունը շարունակվում է. Աննա Հակոբյանի խոսքը՝ Ալմաթիի մեդիա ֆորումում

Կոնստանտին Օրբելյանը դատի է տվել Նիկոլ Փաշինյանին եւ Նազենի Ղարիբյանին

Անցումային արդարադատությունը միջազգային բոլոր փաստաթղթերում նշվում է որպես հաշտեցման գործիք․ արդարադատության փոխնախարար