ՀԱԿ-ի հետ դաշինքի հարց չի քննարկվել, Ժառանգության համար ցավում ենք. Նիկոլ Փաշինյան

Ազգային ժողովի պատգամավոր Նիկոլ Փաշինյանը կարծում է, որ ե՛ւ «Ծառուկյան դաշինք»-ը, ե՛ւ «Օհանյան-Րաֆֆի-Օսկանյան» դաշինքները խնդիր ունեն ապացուցելու, թե իրենք ովքեր են, քաղաքական դաշտում ինչ կոորդինատներ ունեն, եւ ընդհանրապես՝ ինչ է իրենց ուզածը: Այս մասին Նիկոլ Փաշինյանն ասաց «Էլիտ պլազայում» լրագրողների հետ ճեպազրույցի ժամանակ, երբ կատարվում էր «Ելք» դաշինքում ներգրավված կուսակցությունների կառավարման մարմինների կողմից դաշինքի համամասնական ցուցակի առաջին եռյակը ձեւավորումը:

Լրագրողներից մեկի դիտարկմանը, որ պաշտպանության նախկին նախարար Սեյրան Օհանյանը հայտարարել է, թե իշխանության գալով կբացահայտեն մարտի մեկը, որ Հայաստանում քաղբանտարկյալներ կան, Նիկոլ Փաշինյանն այսպես արձագանքեց. «Գիտեք, վաղը նման հայտարարությամբ հանդես կգա Հովիկ Աբրահամյանը եւ ի՞նչ է դա փոխելու քաղաքական իրավիճակում: Մենք այդ հարցերի շուրջ մեր սկզբունքներն ասել ենք: Մենք քաղբանտարկյալների մասին չենք խոսել մեր պաշտոնավարման ավարտից հետո, մենք դրա մասին խոսել ենք միշտ, նույնիսկ շատ ավելի վաղ»: Նիկոլ Փաշինյանի կարծիքով՝ պատահական չի, որ «Ելք» դաշինքի նախընտրական ծրագրում ամրագրված է, որ դաշինքի գործունեության, իշխանության պայմաններում բացառվելու են քաղաքական հետապնդումները եւ շարունակելու են զբաղվել քաղբանտարկյալների խնդիրներով:

Հարցին՝ հնարավո՞ր է համագործակցեք այդ ուժերի հետ, ԱԺ պատգամավորը պատասխանեց, որ մյուս դաշինքները հնարավոր է որ հենց ՀՀԿ-ի հետ կոալիցիա կազմեն, բայց նրանք դեռ պետք է ապացուցեն, թե ինչ նկատի ունեն, որ ասում են ընդդիմադիր են:

Լրագրողներից մեկը Նիկոլ Փաշինյանին հիշեցրեց տեղական ինքնակառավարման մարմինների ընտրությունների ժամանակ «Լուսավոր Հայաստան»-ի եւ նրա առաջնորդ Էդմոն Մարուքյանի մասին Նիկոլ Փաշինյանի հայտարարությունները՝ նշելով, որ Մարուքյանի հասցեին ասվել է «իշխանության դրածո»: «Այդպիսի արտահայտություն երբեք չի եղել…: Մենք ունեցել ենք տարաձայնություններ եւ այդ տարաձայնությունները կապված են եղել համագործակցության փնտրտուքի հետ»,- ասաց Նիկոլ Փաշինյանը՝ նշելով, որ այդ փնտրտուքի արդյունքում քաղաքական համագործակցության հուշագիր է ստորագրվել, որը կյանքի կկոչեն:

Անդրադառնալով «Ժառանգություն» կուսակցության հետ չստացված համագործակցությանը, Նիկոլ Փաշինյանը նշեց. «Մենք «Ժառանգությանը հրավիրել ենք «Ելք» դաշինքի մաս կազմել նույն պայմաններով, խնդրում եմ ուշադրություն դարձրեք, նույն պայմաններով, ինչ պայմաններով, որ մենք ինքներս ենք ընդգրկվել: Այսինքն՝ մենք մեզնից ոչինչ պակաս չենք առաջարկել «Ժառանգություն» կուսակցությանը, սակայն «Ժառանգություն»-ն ընտրեց այլ ճանապարհ եւ մենք տեսնում ենք «Ժառանգության» ամենահայտնի ներկայացուցիչներից մեկը, եթե ոչ ամենահայտնի ներկայացուցիչը, այդ որոշումը չի կիսում եւ մենք ցավում ենք «Ժառանգություն» կուսակցության համար»:

Նիկոլ Փաշինյանը նշեց, որ համագործակցություն վերաբերյալ զրույց շատերի հետ է եղել, բայց բանակցություններ՝ ոչ: «Թեւան Պողոսյանի հետ էլ զրույց ունեցել ենք եւ կա զրույց եւ հույս ունենք՝ այդ զրույցն ինչ-որ արդյունքի կբերի»,- մանրամասնեց Փաշինյանը:

Պատասխանելով ՀԱԿ կուսակցության ներկայացուցիչների կողմից «Ելք» դաշինքի հասցեին ուղղված քննադատություններին, թե իբր նրանք վիժեցրել են լայն կոնսոլիդացիան, Նիկոլ Փաշինյանը հայտարարեց, որ «Ելք» դաշինքի ուժերից որեւէ մեկը ՀԱԿ-ի հետ նման հարց չի քննարկել: