Վստրեչի Ապե՞րն է ուժեղ, թե՞ Տարոն Մարգարյանը. նամակ Սերժ Սարգսյանին

Այն, որ Երեւանում հասարակական տրանսպորտի վիճակն այնքան էլ լավ չէ, բոլորին է հայտնի, եւ դրանով ոչ մեկին այսօր չես զարմացնի: Բայց կան համայնքներ կամ թաղամասեր, որտեղ մայրաքաղաքային տրանսպորտն աշխատում է միջմարզային կամ գյուղական համայնքների ավտոբուսների հաճախականությամբ՝ կես ժամը մեկ կամ ավելի ուշ: Տվյալ դեպքում Երեւանի Ավան վարչատարածքային շրջանի «Ծարավ աղբյուր» թաղամասը քաղաքային տրանսպորտի հասանելիության առումով, կարծես թե, մայրաքաղաքից դուրս է ընկնում: Այստեղ երեկոյան 20-ից հետո երթուղային չի աշխատում, իսկ ձմեռային եղանակներին 19-ից հետո չի աշխատում:

Այս թաղամասի մի բավականին խոշոր հատված կառուցվել է վերջին 5-6 տարիների ընթացքում: Սա Սերժ Սարգսյանի՝ դեռեւս 2008թ. նախընտրական խոստումներից մեկն էր երիտասարդ ընտանիքներին: Այստեղ ԵՊՀ շրջանավարտների միավորման կողմից շուկայական գներից մի փոքր մատչելի բնակարաններ են կառուցում եւ վաճառում երիտասարդ ընտանիքներին:

Սա ինչ-որ տեղ համարվում էր նաեւ սոցիալական ծրագիր, որտեղ բնակարանային ծրագրեր են իրականացրել մասնագիտական տարբեր խմբերի՝ բժիշկների, լրագրողների, մանկավարժների, սպորտսմենների, ՏՏ եւ բանկային ոլորտների, համալսարանականների համար: Արդեն շահագործման է հանձնվել 14 բարձրահարկ բազմաբնակարան շենք, որտեղ ապրում են հարյուրավոր ընտանիքներ: Ընդ որում՝ դեռ նոր շենքերի հիմք է գցվում:

Բայց այդ թաղամասը մայրաքաղաքից կտրված է բառիս բուն իմաստով, քանի որ կենտրոն հասնելը եւ վերադառնալը տարիներ շարունակ մեծ խնդիր է եղել: Այդ թաղամաս մայրաքաղաքի կենտրոնից բարձրանում է միայն թիվ 38 երթուղայինը, իսկ Մալաթիա-Սեբաստիա համայնքից՝ 34-ը: Ինչպես նշեցինք, երկուսն էլ ժամը 20-ից հետո գրեթե չեն աշխատում, իսկ ժամը 18-ից հետո մի երկու երթուղային է հասնում այդ շենքերի մոտ: Միայն առավոտվա մի երկու ժամերին է, որ հնարավոր է 15-20 րոպեն մեկ երթուղայինի հանդիպել:

Տարածքի բնակիչները տարիներ շարունակ այդ հարցը բարձրացրել են քաղաքապետարանի համապատասխան պաշտոնյաների ու անգամ քաղաքապետ Տարոն Մարգարյանի մոտ, խոստումներ են լսել, բայց հարցը այդպես էլ չի լուծվել: Բնակիչներից ոմանք տրանսպորտի խնդրի պատճառով վաճառել են իրենց բնակարանները, կան բնակիչներ, որոնք անհույս սպասումներից հետո հիմա են ցանկանում վաճառել: Եվ այդ իմաստով Ս.Սարգսյանի բնակարանաշինության ծրագիրը ամբողջական չէ:

Երեկ մենք փորձեցինք քաղաքապետարանի տրանսպորտի վարչության պետ Հենրիկ Նավասարդյանից պարզել, թե ի վերջո, երբ է այս թաղամասը սպասարկող տրանսպորտ ունենալու, երբ է քաղաքապետարանն ի վերջո կատարելու Ծարավ Աղբյուրի մի քանի հազար բնակիչներին արդեն երկար տարիներ տրվող խոստումը: Վերջինս պատասխանեց, որ հիմա ինքը զբաղված է դեպի Ծիծեռնակաբերդի հուշահամալիր եւ հակառակ ուղղությամբ մարդկանց տեղափոխելու հարցով եւ չի կարող այլ բնույթի խնդիրներին անդրադառնալ:

Ի դեպ, հույսը կտրելով քաղաքապետ Տ. Մարգարյանից՝ բնակիչները մտածում են հավաքվել եւ այդ հարցը բարձրացնել Սերժ Սարգսյանի մոտ: Եվ մոտ մեկ տարի առաջ, երբ այդ մասին տեղյակ է պահվել քաղաքապետարանի տրանսպորտի վարչության պետ Հենրիկ Նավասարդյանին, վերջինս վախենալով այդ հեռանկարից՝ միանգամից երրորդ երթուղային գիծն է անցկացրել այդ տարածքով՝ թիվ 10 համարի երթուղին:

Ընդ որում, սա ոչ թե նոր երթուղի էր, այլ կենտրոնից Ավան բարձրացող գիծ, որը պարզապես ճանապարհը մի փոքր շեղում եւ այդ հատվածով է անցնում: Դա թեթեւացրել էր Ծարավ Աղբյուր տանող բնակիչների հոգսը: Այդ երջանկությունը, սակայն, ընդամենը 10 օր տեւեց, քանի որ թիվ 38-ի գծի տերերը ստիպելով հանել էին տվել 10 համարին:

Բանն այն է, որ թիվ 38-ը պատկանում է Արամ Վարդանյանին՝ հայտնի Վստրեչի Ապերին: Համենայնդեպս այդպես են ակնարկում վարորդները: Եվ նա քաղաքապետարանին ստիպել է հանել տալ իր սեփական երթուղուն խանգարող 10 համարի երթուղին: Դրանից հետո քաղաքապետարանը պարբերաբար խոստումներ է տալիս, բայց հարցը այդպես էլ չի լուծվում: Եվ հիմա բնակիչները նորից են ցանկանում դիմել Ս. Սարգսյանին, որ ի վերջո նա միջամտի այս հարցի լուծմանը, թե չէ, ինչպես իրենք են կատակում, հայտնվել են քարտեզից դուրս:

Իսկ քաղաքապետարանը անզոր գտնվեց մի թաղային հեղինակության նկատմամբ եւ մի քանի հազար բնակչի շահերը ստորադասեց նրա բիզնեսին: Մինչդեռ նորմալ երկրներում հասարակական տրանսպորտը ոչ թե գերշահույթ ապահովող, ինչպես տարիներ շարունակ եղել է մեր երկրում, այլեւ պետության կողմից սուբսիդավորվող եւ բնակչությանը սպասարկող ոլորտ է եղել: Ընդ որում, բոլորովին պետք չէ նոր երթուղային գիծ բացել: Հակառակը, դա արդյունավետ չի լինի: Ընդամենը պետք է բուն Ավան գնացող մեկ-երկու երթուղի շեղել եւ այդ հատվածով անցկացնել: