Վարչապետի հերքման հերքման հերքումը․ խմբագրական

ՀՀ վարչապետ Կարեն Կարապետյանը համաձայն է այն մտքի հետ, որ որպես անվտանգության երաշխավոր՝ Սերժ Սարգսյանն անփոխարինելի է։ Կարեն Կարապետյանը նաեւ 2018 թվականից հետո հավակնում է ՀՀ վարչապետի պաշտոնին։ Նման հայտարարություններ նա արել է երեկ տեղի ունեցած ասուլիսի ժամանակ, լրագրողների հարցերին ի պատասխան։ Ճիշտ է՝ վերը նշվածն ամբողջությամբ ինքնուրույն չի ասել, այն իմաստով, որ մեջբերված մտքերի մի մասը լրագրողներն իրենք են դրել իրենց հարցերի մեջ, եւ Կարապետյանը դրանց ընդամենը համաձայնություն է հայտնել։ Բայց սրանից ասվածի քաղաքական նշանակությունը չի փոխվում։ Այս է պատճառը, որ պետք է հասկանալ, թե ինչ է ի վերջո ասում վարչապետը։ Հասկանալու անհրաժեշտություն կա, քանի որ վերը նշված մտքերը խորը հակասություններ ունեն։

Եթե Կարապետյանն իրոք համարում է, որ Սերժ Սարգսյանը որպես անվտանգության երաշխավոր անփոխարինելի է, ուրեմն պետք է նաեւ ասի, որ հենց Սարգսյանը պետք է լինի ՀՀ հաջորդ վարչապետը։ Որովհետեւ ստացվում է, որ վարչապետ դառնալու իր պատրաստակամությամբ Կարապետյանը հարվածի տակ է դնում Հայաստանի անվտանգությունը։ Նրա ասածից ստացվում է, որ նույնիսկ ինքը ի վիճակի չի կատարել անվտանգության երաշխավորի գործառույթը, որովհետեւ իր կարծիքով այս հարցում Սերժ Սարգսյանը անփոխարինելի է, եւ նրան չի կարոող փոխարինել նույնիսկ ինքը։

Հետեւաբար՝ Կարեն Կարապետյանը ինչ-որ տեղ խաբում է հանրությանը, որովհետեւ, եթե նա անկեղծ լիներ Սերժ Սարգսյանի մասին իր կարծիքի մեջ, 2018-ի ապրիլից հետո վարչապետ դառնալու որեւէ հավակնություն չպետք է ցուցաբերեր։ Իսկ եթե ցուցաբերում է նման հավակնություն, Սերժ Սարգսյանի մասին նման կարծիք չպետք է արտահայտեր, որովհետեւ 2018-ի ապրիլից հետո երկրի գերագույն գլխավոր հրամանատարը, հետեւաբար՝ անվտանգության երաշխավորը վարչապետն է լինելու։ Եթե Կարապետյանն ասում է, որ Սերժ Սարգսյանը անվտանգության ոլորտում անփոխարինելի է, նաեւ խոստովանում է, որ ինքը նույնպես անպիտան է նման աշխատանք կատարելու համար։

Իսկ եթե այս մտքերի խորը հակասությունն ու փոխադարձ բացառումը չի հասկանում Կարապետյանը, կնշանակի, որ ոչ միայն վարչապետի, այլեւ նախարարի համար անհրաժեշտ որակավորում չունի։ Բայց մտածել, թե Կարապետյանը չի հասկանում, թե ինչ է խոսում, ճիշտ չի լինի։ Հետեւաբար՝ ի՞նչն է խնդիրը։

Կարծում ենք, այնուամենայնիվ, իրականությանը համապատասխանում են այն տեղեկությունները, թե Սերժ Սարգսյանին հաջողվել է Կարեն Կարապետյանին համոզել, որ հրաժարվի 2018 թվականին վարչապետի պաշտոնին հավակնելուց եւ համաձայնվի զբաղեցնել ՀՀ փոխվարչապետի պաշտոնը։ Եվ հիմա Կարապետյանը փորձում է այս կոմբինացիայի համար ինչ-որ տեսական հիմնավորում հորինել՝ միեւնույն ժամանակ չհրաժարվելով նախկինում արտահայտած իր մտքերից։ Եվ եթե այս տեսակետից ենք մոտենում խնդրին, կարող ենք արձանագրել, որ Կարապետյանն ուզում է լինել այնպիսի վարչապետ, որը երկրի անվտանգության երաշխավորը չէ։ Կարո՞ղ է արդյոք լինել նման վարչապետ։ Իհարկե կարող է, եթե դա ոչ թե սովորական, այլ ընդամենը փոխվարչապետ է։ Իսկ եթե Կարեն Կարապետյանը լինում է առաջին փոխվարչապետ, Սերժ Սարգսյանը՝ վարչապետ, պահպանվում է այսօրվա ստատուս-քվոն, երբ Սերժ Սարգսյանը նախագահ է, Կարեն Կարապետյանը՝ վարչապետ։

Բոլորը, ինչպես ասում են, գոհ են ու երջանիկ։ Համ երկրի անվտանգությունն է ապահովված, համ երկիրը դրայվ է բռնում կայֆի մեջ, կամ էլ կայֆ է բռնում դրայվի մեջ։

Սրանում է, թերեւս, Կարեն Կարապետյանի՝ մաքուր ճապոներեն լեզվով տված մեկնաբանությունների հայերեն թարգմանությունը, չնայած ինքը՝ Կարապետյանը հերքել է մամուլի հրապարակումները, թե ինքն ու Սերժ Սարգսյանը պայմանավորվել են այս ամենի շուրջ։ Հերքի-չհերքի, բայց ամենասկզբում մեր մեջբերած արտահայտությունները ինչ-որ բան պիտի նշանակեն, եւ եթե որեւէ բան նշանակում են, թերեւս միայն այն, ինչ ասացինք։ Իսկ եթե Կարեն Կարապետյանի մտքերը որեւէ բան չեն նշանակում, նշանակություն չունի նաեւ հերքումը, որովհետեւ, եթե մենք ձեռքի տակ ունենք հերքում, մի հատ էլ հերքման հերքում, մի հատ էլ հերքման հերքման հերքում, ու բոլորը ստորագրված են նույն անձի կողմից՝ ի վերջո որի՞ն պետք է հավատանք։

Կարեն Կարապետյանի երեկվա ասուլիսն իսկապես նման էր հերքման հերքումի հերքման հերքումի, ինչը նշանակում է, որ վարչապետն ի վիճակի չէ նույնիսկ սեփական մտքերի անվտանգությունն ապահովել, էլ ուր մնաց ի վիճակի լինի ներքաղաքական լուրջ քայլերի։ Ստացվում է, որ մեր նախնական տպավորությունը ճիշտ է․ Կարեն Կարապետյանը կանի այն, ինչ նրան կասի անփոխարինելի Սերժ Սարգսյանը։