Քաղաքապետարանի աշխատակիցները կրկին ծեծե՞լ են փուչիկ վաճառող տղային. ասում են՝ հայհոյել է

Մեր տեղեկություններով, նախօրին կրկին միջադեպ է տեղի ունեցել Երեւանի քաղաքապետարանի առեւտրի բաժնի աշխատակիցների եւ արդեն մի քանի տարի փուչիկ վաճառող 24-ամյա Արմեն Մնացականյանի հետ:

Ականատեսները մեզ պատմեցին, որ աշխատակիցները ծեծի են ենթարկել փուչիկ վաճառող Մնացականյանին: Նոյեմբերի 19-ին՝ ժամը 14:00-ի սահմաններում, Թումանյան-Աբովյան փողոցների խաչմերուկում քաղաքապետարանի առեւտրի բաժնի աշխատակիցները մոտեցել են տղային եւ արգելել այդ հատվածում  փուչիկ վաճառել, ապա հեռացել են: Այդ ընթացքում փուչիկ վաճառող տղան ցածր ձայնով հայհոյել է, ինչը լսել են մայթին կանգնած առեւտրի բաժնի աշխատակիցները: Ականատեսների վկայությամբ նրանք հարձակվել են Արմեն Մնացականյանի վրա, նրան դեմ տվել մեքենային ու սկսել բռունցքներով հարվածել: Ծեծկռտուքը բաժանել են հարակից խանութների աշխատակիցները: Միջադեպից հետո առեւտրի բաժնի աշխատակիցները հեռացել են դեպքի վայրից: Նրանցից մեկը հեռախոսով խոսելիս ինչ-որ մեկին ներկայացրել է, որ իրենց հայհոյել է, իրենք էլ ծեծել են տղային:

Երեկ փորձեցինք գտնել Արմենին, որը սովորաբար լինում է Տիկնիկային թատրոնի մոտ, սակայն ապարդյուն:

Երեւանի քաղաքապետարանի հասարակայնության եւ լրատվության հետ կապերի վարչության պետ Արթուր Գեւորգյանից վերը նշվածի հետ կապված պարզաբանում խնդրեցինք: Ի պատասխան մեր հարցին Գեւորգյանը հերքեց Արմենին ծեծի ենթարկելու մասին տեղեկությունները, նշելով, թե նման բան չի եղել: Ըստ նրա՝ Կենտրոն վարչական շրջանի առեւտրի բաժնի աշխատակիցներն այդ օրն ընդամենը արգելել են նրան բացօթյա ապօրինի առեւտուր իրականացնել եւ պահանջել հեռանալ տարածքից: Նրա խոսքով՝ տվյալ անձը՝ Արմեն Մնացականյանը, պարբերաբար խախտում է այդ կարգը եւ փորձում է տպավորություն ստեղծել, որ իր հանդեպ մշտապես բռնություն է գործադրվում. «Կան սահմանված կանոններ, բոլորը պարտավոր են ենթարկվել դրանց»,- ասաց Գեւորգյանը:

Նշենք, որ սա առաջին անգամը չէ, երբ Արմեն Մնացականյանն ու քաղաքապետարանի աշխատակիցները հայտնվում են մամուլի ուշադրության կենտրոնում: Մասնավորապես՝ 2013 թվականին մամուլը գրեց, որ Երեւանի քաղաքապետարանի առևտրի վարչության պետ Արման Եդոյանը Հանրապետության հրապարկում ծեծել է փուչիկներ վաճառող երիտասարդին:

Այս տարի էլ Արմեն Մնացականյանը մեզ հետ զրույցում պատմել էր, որ Արման Եդոյանը ծաղրում է, իրեն կոպտում: Նշվածի վերաբերյալ տեսանյութը՝ ստորեւ.